រាជធានីភ្នំពេញ ៖ ដោយកត់សម្គាល់ឃើញថាវិស័យសំណង់នៅតែមានសន្ទុះវិនិយោគយ៉ាងខ្លាំងក្លា ជាពិសេសគឺមានកំណើនមិនឈប់មិនឈរ និងក្នុងន័យជួយសម្រួលដល់វិនិយោគិនជាតិនិងអន្តរជាតិដែលបាននឹងកំពុងធ្វើការវិនិយោគយ៉ាងដុតដៃដុតជើងលើវិស័យនេះ ក្រសួងដែនដី នគរូបីយកម្មនិងសំណង់បានសម្រេចធ្វើទំនើបកម្មផ្នែកមួយចំនួនរបស់ខ្លួន តាមរយៈការដាក់អោយប្រើប្រាស់នូវ Apps មួយឈ្មោះថា Cambodian Construction Apps ។
រហូតមកដល់ពេលនេះវិស័យសំណង់ នៅតែមានសន្ទុះវិនិយោគជាបន្តបន្ទាប់ជាពិសេសលំហូរទុនវិនិយោគផ្ទាល់ពីបរទេស ដែលធ្វើអោយទុនក្នុងវិស័យសម្រាប់ប្រទេសកម្ពុជា បានកើនឡើងជាបន្តបន្ទាប់ជាក់ស្ដែងនៅក្នុងរយៈពេលតែ៤ខែដើមឆ្នាំ២០១៩នេះកម្ពុជាទទួលបានទុនវិនិយោគសរុបពីប្រទេសក្រៅនិងទុនវិនិយោគ នៅក្នុងស្រុកប្រមាណជិត៣ពាន់លានដុល្លារអាមេរិក ។
បើតាមប្រសាសន៍របស់លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា ការអភិវឌ្ឍន៍វិស័យអចលនទ្រព្យនិងសំណង់ បានក្លាយទៅជាសរសរស្ដម្ភស្នូល ដែលជំរុញកំណើនសេដ្ឋកិច្ចកម្ពុជា ជាក់ស្ដែងទុនវិនិយោគក្នុងវិស័យសំណង់រយៈពេល១០ ឆ្នាំ គិតចាប់ពី ឆ្នាំ ២០០៩ ដល់ ឆ្នាំ ២០១៩ មានប្រមាណជាង៤៣ពាន់លានដុល្លារអាមេរិក ក្នុងនោះ ឆ្នាំ ២០១៨ មាន៥.៧៥៧លានដុល្លារ ។ លោកបានបន្តទៀតថា ដោយឡែកក្នុងរយៈពេល៤ខែ ដើមឆ្នាំ២០១៩នេះដែរ កម្ពុជាក៏ទទួលបានទុនវិនិយោគប្រមាណ ២.៧៤២ លានដុល្លារអាមេរិក ដែលមានកំណើនប្រមាណជាង ៦៧ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨ កន្លងទៅ ហេតុដូច្នេះហើយទើបក្រសួងបានដាក់ឲ្យដំណើរការនូវកម្មវិធី Apps មួយចំនួនដើម្បីកុំឲ្យមានការរាំងស្ទះ ឬយឺតយ៉ាងក្នុងការផ្តល់ព័ត៏មានដល់អ្នកពាក់ព័ន្ធនៅក្នុងវិស័យសំណង់និងអចលនទ្រព្យ
នេះ ។
លោក ប៉ែន សុផល បានបញ្ជាក់យ៉ាងដូច្នេះថា «ជាមួយគ្នានេះដែរក្រសួងបានធ្វើទំនើបកម្មក្នុងការផ្ដល់ព័ត៌មាន ដោយបានដាក់អោយប្រើប្រាស់ Apps មួយឈ្មោះថា Cambodian Construction Apps ក្នុងគោលបំណងលើកកម្ពស់ តម្លាភាពព័ត៌មានជាសាធារណៈ និងអាចទទួលយកព័ត៌មាន អំពីការអភិវឌ្ឍន៍សំណង់ និងអចលនទ្រព្យ នៅគ្រប់ពេលនៅក្នុងApps របស់ក្រសួង » ។ លោកបានបន្តទៀតថា ការរីកចម្រើននិងការវិនិយោគនៃវិស័យអចលនទ្រព្យ បង្ហាញអោយឃើញថា កម្ពុជាបន្តស្ថិតនៅលើវិថីដ៏ត្រឹមត្រូវ និងមានវិបុលភាព នៅគ្រប់វិស័យ ដោយចាត់ទុកវិស័យឯកជនជាដៃគូរនិងលើកកម្ពស់តួនាទីវិស័យឯកជនក្នុងការអភិវឌ្ឍអចលនទ្រព្យ ដែលធ្វើអោយទីផ្សារអចលនទ្រព្យ នៅកម្ពុជា មានកំណើនយ៉ាងឆាប់រហ័ស ព្រមទាំងមានការប្រកួតប្រជែងយ៉ាងស្វិតស្វាញជាមួយទីផ្សារអាស៊ានផងដែរ ។
ចំណែកលោក ច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានមានប្រសាសន៍ថា ប្រទេសកម្ពុជា ជាប្រទេសមួយដែលជាសមាជិកអាស៊ាន និងបានអភិវឌ្ឍន៍សេដ្ឋកិច្ចរីកចម្រើនគួរអោយកត់សម្គាល់ ។ បើនិយាយពីវិស័យអចលនវត្ថុ គឺដើរតួនាទីសំខាន់ ដើម្បីជួយជំរុញឱ្យវិស័យសេដ្ឋកិច្ចនៅក្នុងកម្ពុជា មានភាពរឹងមាំ ។
លោកបានបន្តថា «វិស័យអចលនវត្ថុកម្ពុជា ជាពិសេសនៅរាជធានីភ្នំពេញ បាននិងកំពុងអភិវឌ្ឍន៍យ៉ាងផុសផុល ដោយមានផ្នែកសំខាន់ៗចំនួន ៣ ដែលជាទិសដៅចំបង ក្នុងនោះទាក់ទងនឹងការអភិវឌ្ឍលំនៅឋាន ការអភិវឌ្ឍអគារពាណិជ្ជកម្ម និងមួយទៀតទាក់ទងទៅនឹង ការអភិវឌ្ឍដីដែលនៅទំនេរ» ។ លោកបន្តថា បើប្រៀបធៀបនឹងបណ្ដាប្រទេសក្នុងតំបន់អាស៊ាន ឃើញថាកម្ពុជាមានទីតាំងភូមិសាស្ត្រល្អសម្រាប់ធ្វើការអភិវឌ្ឍវិស័យអចលនទ្រព្យ ។ ហើយការងារជាចម្បង នៅពេលនេះ គឺការអភិវឌ្ឍន៍លំនៅឋាន ដែលកំពុងមានតម្រូវការខ្ពស់ពីសំណាក់ប្រជាពលរដ្ឋ ជាក់ស្ដែងក្នុងមួយឆ្នាំៗ កម្ពុជាមានតម្រូវការលំនៅឋានរាប់ពាន់រាប់ម៉ឺនខ្នង តែអ្នកផ្គត់ផ្គង់មិនទាន់បានបំពេញទៅតាមតម្រូវការនៅឡើយទេ ។ ក្រៅពីនោះ តម្រូវការអគារពាណិជ្ជកម្មសម្រាប់ជួល នៅក្នុងប្រទេសកម្ពុជាក៏មានតម្រូវការខ្ពស់ដែរ ដោយសារតែវត្តមានក្រុមហ៊ុនថ្មីៗ បានបង្កើតឡើងនៅក្នុងប្រទេសកម្ពុជា និងត្រូវការការិយាល័យសម្រាប់បំពេញការងារ ។
អ្នកឯកទេសខាងវិស័យសំណង់និងអចលនទ្រព្យបានបន្ថែមថា ក្នុងនាមជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងក្នុងនាមជាប្រឹក្សាវិនិយោគិនមួយរូប លោកលើកទឹកចិត្ត និងជំរុញឱ្យមានការវិនិយោគបន្ថែមទៀត នៅក្នុងវិស័យអចលនទ្រព្យកម្ពុជា ព្រោះប្រទេសកម្ពុជា នៅតែមានសន្ទុះកំណើន សេដ្ឋកិច្ចខ្ពស់ ក្នុងរង្វង់៧ភាគរយ ក្នុងមួយឆ្នាំ ហើយវិស័យអចលនទ្រព្យ នឹងមានស្ថានភាពល្អប្រសើរ ពីពេលនេះដល់៥ឆ្នាំខាងមុខទៀត ទិញកាន់តែច្រើន ចំណេញកាន់តែច្រើន ។
ទាក់ទងនឹងកំណើននៃវិស័យនេះដែរ ធនាគារពិភពលោកប្រចាំកម្ពុជាថ្មីៗនេះក៏បានផ្ដល់ជាទស្សនទានថា កម្ពុជាគួរតែប្រុងប្រយ័ត្នខ្ពស់ចំពោះការផ្ដល់ឥណទានក្នុងវិស័យសំណង់ ជាពិសេសចំពោះការទិញអចលនទ្រព្យបង់រំលោះ ពីព្រោះសព្វថ្ងៃនេះកំណើននៃការទិញអចលនទ្រព្យដោយបង់រំលោះ បាននិងកំពុងកើនឡើងខ្លាំង ទាំងលំនៅឋាន និង
ដីធ្លី ៕
ចែករំលែកព័តមាននេះ