រាជធានីភ្នំពេញ ៖ ប្រទេសកម្ពុជាអាចនឹងខាតបង់ទឹកប្រាក់ប្រមាណពី៥០០លានដុល្លារអាមេរិកទៅជាង៦០០លានដុល្លារអាមេរិកក្នុងមួយឆ្នាំ បើសិនជាសហភាពអឺរ៉ុបសម្រេចដកយកប្រព័ន្ធអនុគ្រោះពន្ធ (EBA)ពីកម្ពុជា ។ នេះ គឺជាការវាយតម្លៃរបស់ធនាគារពិភពលោកនៅក្នុងសន្និសិទកាសែតនៅថ្ងៃចន្ទ័នេះក្នុងទីក្រុងភ្នំពេញ ។ ការវាយតម្លៃនេះស្របពេលដែលសហភាពអឺរ៉ុបកំពុងដំណើរការពិនិត្យមើលលទ្ធភាពដកហូតពន្ធអនុគ្រោះអ្វីៗទាំងអស់លើកលែងតែអាវុធដែលហៅកាត់ថា EBA ។
នៅក្នុងរបាយការណ៍បច្ចុប្បន្នភាពសេដ្ឋកិច្ចកម្ពុជាចេញផ្សាយថ្ងៃទី៦ ខែឧសភា ឆ្នាំ២០១៩នេះ ធនាគារពិភពលោកបានអោយដឹងថា បើសិនជាប្រព័ន្ធនេះត្រូវបានដកការនាំចេញរបស់កម្ពុជាទៅកាន់ទីផ្សារអឺរ៉ុបអាចនឹងធ្លាក់ចុះយ៉ាងតិចបំផុត៥១៣លានដុល្លារអាមេរិក ហើយខ្ពស់បំផុតត្រឹម៦៥៤លានដុល្លារអាមេរិក ក្នុងនោះការនាំចេញសម្លៀកបំពាក់នឹងត្រូវខាតបង់ប្រមាណ៣២០លានដុល្លារអាមេរិក ព្រោះបច្ចុប្បន្នការនាំចេញសម្លៀកបំពាក់មានទំហំច្រើនជាងសម្រាប់ទីផ្សារអឺរ៉ុប ។
លោកលី សូដេត សេដ្ឋវិទូជាន់ខ្ពស់នៃធនាគារពិភពលោកប្រចាំប្រទេសកម្ពុជាបញ្ជាក់ថា រហូតមកដល់ពេលនេះ «យើងមិនដឹងថា តើ EBA នឹងត្រូវដកពីកម្ពុជាឬអត់នោះទេ តែបើសិនជាEBA ហ្នឹងត្រូវដកពីកម្ពុជាវានឹងជះឥទ្ធិពលមកលើការនាំចេញរបស់កម្ពុជា ។ ក្នុងន័យនេះ មានន័យថា កម្ពុជានឹងបាត់បង់តម្លៃនាំចេញប្រមាណ៦០០លានដុល្លារអាមេរិក» ។ លោកបន្ថែមថា«បើសិនជាយើងបាត់បង់ EBA យើងនឹងត្រូវបង់ពន្ធគយ១២ភាគរយ ហើយនៅពេលយើងត្រូវបង់ពន្ធគយតម្លៃផលិតផលយើងនឹងត្រូវកើន ។
នៅពេលដែលផលិតផលត្រូវបង់ពន្ធ១២ភាគរយនោះនឹងធ្វើអោយតម្លៃលក់រាយត្រូវកើនឡើង និងមានតម្លៃថ្លៃជាងទំនិញពីបណ្ដាប្រទេសផ្សេងៗទៀតដែលបណ្ដាលអោយអ្នកទិញត្រូវធ្លាក់ចុះ ដូច្នេះហើយទើបការប៉ាន់ស្មានចំពោះការបាត់បង់ប្រមាណ៦០០លានដុល្លារនេះឯង» ។ ប៉ុន្តែទោះបីជាយ៉ាងណាក្តីរដ្ឋាភិបាលបានរៀចំយុទ្ធសាស្ត្រហើយ ដើម្បីប្រឈមនឹងការខាតបង់ ។ ចំណែកប្រទេសចិនក៏បានសន្យាជួយកម្ពុជាផងដែរក្នុងរឿងនេះ៕
ចែករំលែកព័តមាននេះ