ខេត្តមណ្ឌលគិរី ៖ រដូវប្រាំងបានអូសបន្លាយរយៈពេលវែង បង្កឲ្យមានការប៉ះពាល់យ៉ាងធ្ងន់ធ្ងរ ដល់ការប្រើទឹកប្រចាំថ្ងៃ ក្នុងដែនជម្រកសត្វព្រៃស្រែពក ដែលសម្បូរទៅដោយធនធានធម្មជាតិ និងជីវៈចម្រុះ ព្រមទាំងផូស៊ីលផងនោះ កាលពីពេលថ្មីៗនេះមន្ទីរបរិស្ថានខេត្ត ក៏បានបង្ហាញអំពីបច្ចេកវិទ្យាថ្មីសន្លាង មួយទៀត គឺឧបករណ៍សម្រាប់ស្រូបយកសំណើមជាតិទឹកពីបរិយាកាស ឬទឹកសន្សើម ដើម្បីស្ដុកទឹកសម្រាប់ប្រើប្រាស់ នៅគ្រាដែលរដូវក្ដៅបានឈានចូលមកដល់ ។
លោកកែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានមានប្រសាសន៍ឲ្យដឹងថា នេះជាឧបករណ៍ថ្មី សន្លាងមួយទៀត ដែលជាបច្ចេកវិទ្យាថ្មីដើម្បីស្រូបយកសំណើមជាតិទឹកពីបរិយាកាស ទុកសម្រាប់ឲ្យមន្ត្រីឧទ្យានុរក្សប្រើប្រាស់ ។ លោកថ្លែងថា «ឧបករណ៍នេះអាចស្រូបយកសំណើមជាតិទឹក ពីបរិយាកាសបានប្រមាណជា២០លីត្រក្នុង១ថ្ងៃ» ។ លោកបញ្ជាក់ថា ឧបករណ៍នេះ គឺជាជួយឧបត្ថម្ភគាំទ្រពីសំណាក់អង្គការ WWF ដែលជាអង្គការដៃគូ ហើយការស្រូបយកជាតិទឹកពីបរិយាកាស ឬទឹកសន្សើមនេះ គឺអ្នកជំនាញដែលរៀបចំដំឡើងបាន និងកំពុងយកទឹកដែលស្រូបយកបាន ទៅវិភាគសិន ដោយមិនទាន់អនុញ្ញាតឲ្យប្រើប្រាស់ឡើយ ។
ទន្ទឹមគ្នានេះ លោកប្រធានមន្ទីរបរិស្ថានខេត្តមណ្ឌលគិរីបានសហការជាមួយអង្គការដៃគូ WWF ត្រៀមដឹកទឹកដោយប្រើស៊ីទែន យកទៅបង្ហូរចូលទៅក្នុងថ្លុកត្រពាំងទឹកច្រប់មួយចំនួន នៅក្នុងព្រៃនៃដែនជម្រកសត្វព្រៃស្រែពក ជាទីដែលសត្វព្រៃចូលចិត្តមកផឹកជាប្រចាំផងដែរ ៕
ចែករំលែកព័តមាននេះ