រាជធានីភ្នំពេញ៖ ជម្លោះរវាងតារាចម្រៀងលោកជី ដេវីដ និងអាចារ្យធំបានបន្ថយកម្តៅបន្តិចហើយ បន្ទាប់ពីមានការចូលជួយធ្វើអន្តរាគមន៍ពីសមាគមសិល្បករខ្មែរ ។ ជម្លោះនេះបានក្លាយជាប្រធានបទក្តៅគគុក និងមានការរិះគន់ខ្លាំង ។
ជម្លោះរវាងអ្នកសិល្បៈទាំងពីរបានកើតមានឡើងបន្ទាប់ពីតារាចម្រៀងលោកជី ដេវីដ បានចេញបទចម្រៀង«បង្វិលផែនដី» នាំឲ្យអាចារ្យធំបានផ្ទុះការរិះគន់ ជាមួយនឹងពាក្យសម្តីមិនសមរម្យ ។ ជី ដេវីដ បានចេញវីដេអូឃ្លីបឆ្លើយតបភ្លាមទៅកាន់អាចារ្យធំ ។ ពាក្យឆ្លើយឆ្លងនេះបានក្លាយជម្លោះបែកផ្កាភ្លើង និងផ្អើលពេញហ្វេសប៊ុក ធ្វើឲ្យអ្នកលេងហ្វេសប៊ុកជាច្រើនរិះគន់ ដោយថាវាធ្វើឲ្យអាប់ឱនដល់តម្លៃសិល្បករខ្មែរ ។ មើលឃើញបញ្ហានេះសមាគមសិល្បករខ្មែរបានចូលអន្តរាគមន៍ ដោយស្នើឲ្យភាគីទាំងសងខាងបញ្ចប់ជម្លោះជាបន្ទាន់ ហើយបើការសម្របសម្រួលមិនជោគជ័យនឹងមានវិធានទៅក្រសួងវប្បធម៌ ។ ក្រុមប្រឹក្សាភិបាលនៃសមាគមសិល្បករខ្មែរលោកហេង ឡុង បានបង្ហោះសារតាមហ្វេសប៊ុកកាលពីថ្ងៃទី៣ ឧសភា ២០១៩ថា «ក្នុងនាមសមាគមសិល្បករខ្មែរ ខ្ញុំសំណូមពរដល់ប្អូន G David និងប្អូនអាចារ្យធំ សូមមេត្តាបញ្ឈប់ការវាយប្រហារគ្នាដោយពាក្យសំដីអសុរោះ ក្នុងនាមជាសិល្បករដែលមហាជនគោរពស្រឡាញ់ឱ្យតម្លៃ គួរតែរក្សានូវសេចក្តីថ្លៃថ្នូរ ដើម្បីជាគំរូដល់សិល្បករសិល្បការិនីជំនាន់ក្រោយ ។ សង្ឃឹមថាប្អូនទាំងពីរនឹងសហការដើម្បីបង្ហាញពីភាពអត់ឱនឱ្យគ្នា ក្នុងនយ័ខ្មែរស្រឡាញ់ខ្មែរ ខ្មែរសាមគ្គីខ្មែរឈ្នះ »។
បន្ទាប់ពីមានសំណូមពរយ៉ាងដូច្នេះតារាចម្រៀងលោកជី ដេវីដ បានដកថយមួយជំហានតាមការស្នើសុំ បើទោះបីជាលោកនៅតែប្រកាន់ជំហរថា ជម្លោះនេះមិនមែនផ្តើមដោយលោកមុននោះក៏ដោយ ។ ដេវីតបានសរសេរលើហ្វេសប៊ុកថា« រឿងដែលបានកើតឡើងវានឹងក្លាយជាអតីតកាល និងមេរៀនជីវិតដែលមនុស្សមិនអាចចៀសផុត ប៉ុន្តែបើសិនជាល្បីដោយការជេប្រមាថអ្នកដទៃខ្ញុំមិនដែលប្រាថ្នាឡើយ កាន់តែមិនចង់ឆ្លៀតឱកាស ឬគេហៅមួយទៀតថាយកមុខ។ មនុស្សប្រភេទខ្លះគេជួយយើងនៅពេលដែលយើងខ្សោយ ឬនៅពេលដែលយើងដួល គឺដោយក្តីអាណិតស្រលាញ់ ប៉ុន្តែមនុស្សប្រភេទខ្លះទៀតគឺដើម្បីប្រើប្រាស់ផលប្រយោជន៍សមស្របណាមួយនៅពេលក្រោយដោយលើកឡើងថាគេធ្លាប់ជួយយើងមកធ្វើជាគំនាបដោយមិនរាប់បញ្ចូលនូវអ្វីដែលយើងធ្លាប់សង ឬធ្វើដើម្បីនោះឡើយ ។ ពេលវេលាជីវិតខិតទៅមុខបន្តិចម្តងដោយមិនខ្វល់ពីសកម្មភាពរបស់យើងឡើយ ដូច្នោះហើយសូមជ្រើសរើសនឹងធ្វើអ្វីមួយដែលយើងចង់ ដែលយើងស្រលាញ់ ជ្រើសរើសផ្លូវដើរដោយខ្លួនឯងសម្រេចជោគវាសនាដោយខ្លួនឯងកុំចាំគេ គេគិតមិនដូចយើងគិតទេ ជ្រើសយកផ្លូវមួយដែលអាចសម្រួលអារម្មណ៍នៃចិត្តបុណ្យរបស់យើង និងអ្នកដទៃ កុំដើម្បីអស្ចារ្យប្រាថ្នាឲ្យគេឈឺចាប់ ។
រាល់ការប្រមាថពូជពង្សវង្សត្រកូលវាជាការឈឺចាប់សម្រាប់មនុស្សគ្រប់គ្នានិងជារឿងដែលពិបាកទទួលយក ខ្ញុំធ្លាប់បានមើលភាពយន្ត super hero ក្នុងរឿងមួយណាក៏ដោយក៏តួអង្គពលីដើម្បីយកសេចក្តីល្អ សុខចិត្តស្លាប់ខ្លួនក៏មិនឲ្យអ្នកដទៃរងគ្រោះ ។ ផ្ទុយពី«super hero ក្រៅឆាកហែកមាត់សំយាកជេរជនប្រុសស្រីដោយមិនបានគិតថាខ្លួនជាអ្វីក្រោមមេឃលើដីគឺមានតែអញ ។ ឆ្អឹងដែកស្បែកស្ពាន់អាគមយុទ្ធភណ្ឌមកពីដូនតា លោកគង់លោកនៅជាមួយជនណា ដែលមានប្រាជ្ញានិងសច្ចធម៌ លោកមិនគង់ទេមនុស្សហែកមាត់ជេរពូជពង្សាវតារ គង់តែថ្ងៃមួយលោកនឹងបរា ចំពោះជនណាលេងសើចនឹងលោក »។ សម្រាប់រឿងអ្នកជេរប្រមាថខ្ញុំនឹងនៅស្ងៀមសិនទុកឳកាសឲ្យអ្នកពិចារណាកំហុសបញ្ឈប់រាល់អំពើជេរប្រមាថអ្នកដែលគ្មានកំហុស ហើយសុំទោសខ្ញុំជាសាធារណៈដើម្បីកិត្តិយសខ្ញុំ និងជាពិសេសដើម្បីទឹកចិត្តមហាជនទាំងមូល» ។
ជាការឆ្លើយតបលោកហេង ឡុង បានបញ្ជាក់វិញថា «សូមអរគុណប្អូន G Davith ដែលបានឆ្លើយតប ភ្លាមៗបន្ទាប់ពីការអំពាវនាវរបស់បង ។ ក្នុងនាមសមាគមសិល្បករខ្មែរដូចជាម៉ែឪរបស់សិល្បករសិល្បការិនីទាំងអស់ ជំហានដំបូងសមាគមដើរតួសម្របសម្រួលឲ្យអស់លទ្ធភាព បើក្នុងករណីមានទំនាស់រវាងសិល្បករ។ សូមបញ្ជាក់ថាដំណាក់កាលសម្របសម្រួលដំបូងគឺយើងមិនបានវាយតម្លៃដាក់កំហុសទៅខាងភាគីណាឡើយ បើក្នុងករណីភាគីទាំងពីរទទួលយកការសម្របសម្រួលរបស់សមាគម នោះយើងខ្ញុំនឹងអញ្ជើញភាគី នីមួយៗដើម្បីមកពិភាក្សាលម្អិតរកហេតុផលឈានទៅអាចវាយតម្លៃបានថាភាគីណាជាភាគីបង្ក និងភាគីជនរងគ្រោះ ។ បើក្នុងករណីសមាគមមិនអាចសម្របសម្រួលបានទេនោះ យើងខ្ញុំនឹងជូនដំណឹងជាលាយលក្ខណ៍អក្សរ ស្នើសុំក្រុមប្រឹក្សាវិន័យ និងលើកសរសើររបស់ក្រសួងវប្បធម៌ និងវិចិត្រសិល្បៈដើម្បីជួយសម្របសម្រួលមុននឹងឈានទៅដល់ភាគីទាំងសងខាងចាត់វិធានការតាមផ្លូវច្បាប់ ដើម្បីធានាបានយុត្តិធម៌សម្រាប់ភាគីជនរងគ្រោះ »។
ជុំវិញបញ្ហានេះគេនៅមិនទាន់មានការឃើញការឆ្លើយតបណាមួយពីភាគីអាចារ្យធំនៅឡើយទេ គិតត្រឹមថ្ងៃទី៣ ខែឧសភា បើទោះបីជាភាគីលោកជី ដេវីដ និងសមាគមសិល្បករខ្មែរបានសម្របសម្រួលគ្នាបានមួយកម្រិតក៏ដោយ៕
ចែករំលែកព័តមាននេះ