ព្រៃវែង ៖ ជាទូទៅ កសិករដែលប្រកបមុខរបរដាំឪឡឹកនៅតាមបណ្តាស្រុកមួយចំនួនក្នុងខេត្តព្រៃវែងតែងតែនិយមដាំដំណាំឱឡឹក ចាប់ពីខែវិច្ឆិការ រហូតដល់ខែមេសា ព្រោះនៅចន្លោះពេលប៉ុន្មានខែនេះមានអាកាសធាតុល្អនិងអំណោយផលដល់ដំណាំឪឡឹក ហើយអំឡុងខែនេះ ផ្លែឪឡឹកនៅលើទីផ្សារ ក៏មានតម្លៃខ្ពស់ផងដែរ។ ប៉ុន្តែនៅចុងខែមេសានេះកសិករជាច្រើនគ្រួសារនៅភូមិត្របាំងច្រឹះ ឃុំព្រៃស្នៀត ស្រុកពារាំង ខេត្តព្រៃវែង បែរជានាំគ្នាបន្តដាំឪឡឹកតទៅទៀត ដោយរំពឹងថា និងទទួលបានទិន្នផលខ្ពស់ ហើយតម្លៃនៅលើទីផ្សារ នៅតែបានថ្លៃខ្ពស់ដដែល។
លោក ហាយ ហ៊ាន អាយុ៥៩ឆ្នាំ ជាកសិករម្នាក់ក្នុងចំណោមកសិករទាំងនោះ បានរៀបរាប់ទាំងទឹកមុខញញឹមញញ៉ែម ពោរពេញដោយក្តីសង្ឃឹមថា ឪឡឹកដែលពួកគាត់ដាំ បានប្រមូលផលម្តងរួចទៅហើយ ហើយនៅពេលនេះ ពួកគាត់បានចាប់ផ្តើមដាក់ដាំម្តងទៀត ដោយសារឆ្នាំនេះ អាកាសធាតុក្តៅ មិនទាន់ធ្លាក់ភ្លៀងជោគជាំ ទើបពួកគាត់សម្រចចិត្តដាំឪឡឹកជាថ្មីម្តងទៀត ម្យ៉ាងក៏ដោយសារ ផ្លែឪឡឹកនៅលើទីផ្សារ នៅតែមានហាងឆេងល្អផងដែរ។ លោកបន្តទៀតថា ខ្ញុំបានដាំឪឡឹកសារជាថ្មីនៅលើផ្ទៃដីទំហំកន្លះហិតា ដោយចាប់ផ្តើមដាក់ដាំនាដើមខែមេសា ឆ្នាំ២០១៩នេះ ដោយប្រើដើមទុនសរុបជាង១លានរៀល ដោយគិតទាំងថ្លៃឈ្នួលភ្នួរដី ថ្លៃជីនិងប្រេងជាដើម ហើយបើអាកាសធាតុអំណោយផលបែបនេះរហូត គាត់រំពឹងថាឪឡឹករបស់គាត់និងទទួលបានលុយមកវិញចាប់ពី៦លានរៀលទៅ៨លានរៀល។
គួររំលឹកផងដែរថា តម្លៃឪឡឹកនៅលើទីផ្សារសព្វថ្ងៃសម្រាប់ផ្លែឪឡឹកលេខ១ មានតម្លៃ៥,០០០រៀល ឯលេខ២មានតម្លៃ៤,០០០រៀល និងតម្លៃទាបបំផុតក៍មួយផ្លែលក់បានតម្លៃ៣,៥០០រៀលដែល៕
ចែករំលែកព័តមាននេះ