ប្រទេសវេណេស៊ុយអេឡា ៖ ការប៉ះទង្កិចគ្នាខ្លាំងក្លាកើតមានកាលពីថ្ងៃទី១ឧសភា នៅក្រុងការ៉ាកាស់រវាងអ្នកគាំទ្រមេដឹកនាំប្រឆាំង លោកJUAN GUAIDOនិងកងកម្លាំងប៉ូលិស ខាងក្រៅការប្រមូលផ្ដុំមនុស្ស ប្រារព្ធទិវាពលកម្មអន្តរជាតិ១ឧសភា។ ការប៉ះទង្គិចគ្នាទាំងនោះកើតមានក្រោយការប៉ុនប៉ងបះបោរពុំបានសម្រេច របស់កងយោធា១ក្រុមប្រឆាំងប្រធានាធិបតីលោកនីកូឡាស់ម៉ាឌូរ៉ូ។
គប់ដុំថ្មនិងដបសាំងដុត ពួកបាតុករជាច្រើនសិបនាក់ដែលបិទមុខ បានប្រឈមមុខជាមួយកងកម្លាំងប៉ូលិស ដែលតបតតាមរយៈការបាញ់ឧស្ម័នបង្ហូរទឹកភ្នែក។ នារីម្នាក់អាយុ២៧ឆ្នាំជាអ្នកគាំទ្រលោកGUAIDO បានត្រូវស្លាប់ដោយគ្រាប់កាំភ្លើង ក្នុងពេលប៉ះទង្គិចគ្នា។ មេដឹកនាំប្រឆាំងបានអំពាវនាវ នាថ្ងៃទី១ឧសភានោះឲ្យមានកូដកម្មទូទៅ ហើយឲ្យបន្តបាតុកម្មដោយទ្រង់ទ្រាយធំ ក្នុងក្ដីសង្ឃឹមថាអាចកម្ចាត់ប្រធានាធិបតី ដែលសន្យាដាក់ទោសពួកក្បត់ជាអ្នកទទួលខុសត្រូវ ក្នុងការបះបោររបស់កងយោធាមួយក្រុមកាលពីថ្ងៃទី៣០មេសា។
ចំណែករដ្ឋមន្ត្រីការបរទេសអាមេរិក លោកMIKE POMPEOថ្លែងនាថ្ងៃទី១ឧសភាថា លោកប្រធានាធិបតីត្រាំ ត្រៀមប្រសិនបើចាំបាច់ ធ្វើអន្តរាគមន៍យោធាអាមេរិក នៅវេណេស៊ុយអេឡា។
សម្រាប់ថ្ងៃទី១ឧសភាពួកប្រឆាំងជាច្រើនពាន់នាក់ ដែលគ្រវីទង់ជាតិនិងស្រែកបណ្ដេញលោកម៉ាឌូរ៉ូ បានប្រមូលផ្ដុំគ្នាតាមចំណុចប្រមាណជា១៥កន្លែងក្នុងរដ្ឋធានី។ ទោះប្រជាជនក្រុងការ៉ាកាស់ចេញធ្វើបាតុកម្មច្រើន គាំទ្រលោកGUAIDO តែនាថ្ងៃនោះលោកពុំសម្រេចបំណង ក្នុងការប្រមូលផ្ដុំមនុស្សយ៉ាងច្រើនបំផុតជាប្រវត្តិសាស្ត្រ ប្រឆាំងលោកម៉ាឌូរ៉ូឡើយ។ ក្នុងទីក្រុងការ៉ាកាស់គេឃើញបណ្ដាខ្មោចរថយន្តដែលត្រូវដុត ដែលនោះជាសញ្ញានៃភាពតានតឹងនៃការប៉ះទង្កិចគ្នាខ្លាំងក្លា។
ក្នុងការសន្ទនាគ្នាតាមទូរស័ព្ទកាលពីថ្ងៃទី១ឧសភា ជាមួយសមភាគីរុស្សុីលោកស័រហ្គេយឡាវរ៉ូវ លោកPOMPEOបានចោទប្រកាន់រុស្សុីថា បង្កអស្ថេរភាពនៅវេណេស៊ុយអេឡា ហើយស្នើជាថ្មីដល់ក្រុងមូស្គូ ឲ្យឈប់គាំទ្រប្រធានាធិបតីសង្គមនិយមលោកម៉ាឌូរ៉ូ។ លោកឡាវរ៉ូវបានតបតទៅវិញថា ការជ្រៀតជ្រែករបស់អាមេរិក ចូលកិច្ចការផ្ទៃក្នុងវេណេស៊ុយអេឡា ជាការរំលោភបំពានជាក់ស្ដែងលើច្បាប់អន្តរជាតិនិងថា ឥទ្ធិពលបំផ្លិចបំផ្លាញនេះពុំមែនទាក់ទិនជាមួយលទ្ធិប្រជាធិបតេយ្យឡើយ៕
ចែករំលែកព័តមាននេះ