ខេត្តសៀមរាប ៖ ផ្ទះបុគ្គលិករបស់អង្គការជប៉ុន២នាក់ ប្តីប្រពន្ធត្រូវបានអគ្គិភ័យឆេះគ្មានសល់ មួយប៉ព្រិចភ្នែក សូម្បីតែខោអាវ១កំប្លេ ខណៈម្ចាស់កំពុងទៅធ្វើការបាត់ ចំណែកប្រពន្ធយកម្តាយក្មេកទៅមើលជម្ងឺនៅប្រទេសថៃទុកឱ្យម្តាយបង្កើត និងកូនតូចៗចំនួន៣នាក់ឱ្យនៅមើលចាំផ្ទះ ប៉ុន្តែពុំមានអ្នករងរបួសក្នុងហេតុការណ៍គ្រោះអាក្រក់នេះកើតឡើងទេគ្រាន់តែពួកគាត់ភ័យស្លន់ស្លោតែប៉ុណ្ណោះ បង្កឱ្យមានការភ្ញាក់ផ្អើលឆោរឡោដល់ផ្ទះ២ល្វែងខាងមុខដែលគាត់ឱ្យរស់នៅក្នុងបរិវេណដីឡូតិ៍តែមួយ នៅពីខាងមុខនាំគ្នាប្រម៉ែប្រមូលគ្រែ ទូ ខោ អាវ និងរថយន្ត ម៉ូតូចេញពីក្នុងផ្ទះរៀងៗខ្លួន ហើយមិនបានរាលដាលដល់ផ្ទះអ្នកជិតខាងឡើយ ។
ហេតុការណ៍គ្រោះអគ្គិភ័យនេះបានកើតឡើងនៅវេលាម៉ោង៤និង៣០នាទីរសៀល ថ្ងៃទី៣០ ខែមេសា ឆ្នាំ២០១៩ ស្ថិតនៅក្នុងក្រុមទី១០ ភូមិវាល សង្កាត់គោកចក ក្រុងសៀមរាប ។ បើតាមសាក្សីប្អូនថ្លៃខាងប្រុសផ្ទះនៅខាងមុខដែលរស់នៅក្នុងដីឡូតិ៍ជាមួយបានប្រាប់នៅកន្លែងកើតហេតុថា មុនពេលកើតហេតុពួកខ្ញុំកំពុងអង្គុយលេងជាមួយក្រុមគ្រួសារនៅខាងមុខផ្ទះ២ល្វែងពីមុខផ្លូវចូលផ្ទះបងថ្លៃ ដែលឆេះនោះ ។ ខណៈពេលនោះត្រូវបានម្តាយបង្កើតខាងប្រុស និងកូនតូចៗរបស់ម្ចាស់ផ្ទះបានចុះរត់មកប្រាប់ទាំងភ័យស្លន់ស្លោថា ឃើញភ្លើងឆេះចេញពីកន្លែងកុងម៉ាខាងលើឱ្យពួកខ្ញុំជួយផង ។
ប្រភពបានបន្តថា បន្ទាប់ពីម្តាយបង្កើតរបស់គាត់មកប្រាប់ភ្លាមពួកខ្ញុំក៏ទូរស័ព្ទទៅប្រាប់សមត្ថកិច្ចប៉ុស្តិ៍នគរបាលគោកចក ដើម្បីឱ្យជួយហៅរថយន្តពន្លត់អគ្គិភ័យមកជួយផង ព្រោះវាកំពុងតែឆេះយ៉ាងសន្ធោសន្ធៅមួយសន្ទុះក្រោយមកក៏ឃើញមានរថយន្តជាច្រើនគ្រឿងមកជួយដូចចិត្តប្រាថ្នា ប៉ុន្តែអកុសលត្រូវភ្លើងឆេះចង់អស់ទៅហើយព្រោះផ្លូវវាបត់បែនច្រើនពេក ។
បើតាមប្រសាសន៍របស់លោកឧត្តមសេនីយ៍ត្រី ភឹង សម្បត្តិ សង្នការរងទទួលផែនការិយាល័យបង្ការពន្លត់អគ្គិភ័យ និងសង្គ្រោះនៃស្នងការនគរបាលខេត្តបានប្រាប់ថា ករណីភ្លើងឆេះផ្ទះពលរដ្ឋអស់១ខ្នងនៅក្នុងសង្កាត់គោកចកនោះព្រោះម្ចាស់ផ្ទះមិននៅទាំងអស់គ្នាទៅធ្វើការបាត់ នៅតែម្តាយបង្កើតខាងប្រុស និងកូនតូចៗចំនួន៣នាក់ទុកឱ្យចាំផ្ទះ ។ ចំណែកប្រពន្ធយកម្តាយទៅមើលជម្ងឺនៅឯប្រទេសថៃ ។ លោកបានបញ្ជាក់ថា ម្ចាស់ផ្ទះឈ្មោះ ស ឈយ ភេទប្រុស អាយុ៣៥ឆ្នាំមុខរបរ បុគ្គលិកអង្គការជប៉ុន និងប្រពន្ធឈ្មោះ ស៊ា ផល្លា អាយុ២៩ឆ្នាំ មុខរបរនៅផ្ទះមានកូនចំនួន៣នាក់ (ស្រី១ ប្រុស២) រស់នៅក្រុមទី១០ ភូមិវាល សង្កាត់គោចក ក្រុង-ខេត្តសៀមរាប។
លោកបានបញ្ជាក់បន្ថែមថា ករណីឆេះផ្ទះពលរដ្ឋដែលមានសម្ភារៈបាត់បង់នោះរួមមាន ផ្ទះ អស់១ខ្នងទាំងស្រុងទំហំ១២ម៉ែត្រគុណ១៦ម៉ែត្រកំពស់៧ម៉ែត្រធ្វើអំពីថ្មក្រោមឈើលើ សៀវភៅស្នាក់នៅចំនួន១ សំបុត្រកំណើត កាតគ្រី ឡាន និងកាតគ្រីម៉ូតូ ខោ អាវ តុ ទូ និងសម្ភារ ព្រមទាំងលុយកាក់សរុបទាំងអស់ប្រមាណជាង៥០០០០ដុល្លារ ។ មូលហេតុទុស្សេខ្សែភ្លើង ។ លោកបានបញ្ជាក់ទៀតថា ក្នុងការជួយអន្តរាគមន៍ករណីភ្លើងឆេះផ្ទះនោះមានរថយន្ត ចំនួន៥គ្រឿង ក្នុងនោះមាន រថយន្តពន្លត់អគ្គិភ័យរបស់ស្នងការខេត្តចំនួន២គ្រឿង រថយន្ត ពន្លត់អគ្គិភ័យរបស់អាជ្ញាធរជាតិអប្សរាចំនួន២គ្រឿង និងរថយន្តពន្លត់អគ្គិភ័យរបស់បេតិកភ័ណ្ឌ ចំនួន១គ្រឿងប្រើទឹកអស់ទាំងអស់ចំនួន៦ឡាន ៕
ចែករំលែកព័តមាននេះ