ប្រទេសជប៉ុន ៖ ព្រះចៅអធិរាជជប៉ុនអាគីហ៊ីតូបានដាក់រាជ្យ ក្នុងពិធីមួយដែលរៀបចំកាលពីថ្ងៃទី៣០មេសា នៅព្រះបរមរាជវាំងនាភាគកណ្ដាលក្រុងតូក្យូ ដែលនោះជាការដាក់រាជ្យលើកដំបូង របស់ព្រះចៅអធិរាជមួយអង្គនៅជប៉ុនចាប់តាំងពីឆ្នាំ១៨១៧មក។
ព្រះចៅអធិរាជតាមរដ្ឋធម្មនុញ្ញចាត់ទុកជានិមិត្តរូបមួយរបស់រដ្ឋនិងឯកភាពរបស់ប្រជាជន ប៉ុន្តែពុំមានអំណាចនយោបាយណាមួយឡើយ។ ព្រះចៅអាគីហីុតូព្រះជន្ម៨៥ព្រះវស្សា បានបង្កើតភាពភ្ញាក់ផ្អើលមួយ ដោយទ្រង់ប្រកាសកាលពីឆ្នាំ២០១៦ ពីបំណងរបស់ព្រះអង្គដាក់រាជ្យសម្បត្តិ លើកហេតុផលពីព្រះជន្មកាន់តែច្រើនរបស់ព្រះអង្គ។
ពិធីខ្លីមួយនៅព្រះបរមរាជវាំងត្រូវផ្សាយបន្តផ្ទាល់តាមទូរទស្សន៍នាវេលារសៀល ដោយមានវត្តមានរបស់មនុស្សសំខាន់ៗ ប្រមាណជា៣០០នាក់ក្នុងនោះមាននាយករដ្ឋមន្ត្រី លោកស៊ីនហ្សូអាបេ ព្រះអង្គម្ចាស់រជ្ជទាយាទណារ៉ូហ៊ីតូ ប្រធានសភាទាំង២និងបណ្ដាចៅក្រមនៃតុលាការកំពូល។
លោកស៊ីនហ្សូអាបេប្រកាសពីការដាក់រាជ្យរបស់ព្រះចៅអាគីហ៊ីតូ ដែលទ្រង់ថ្លែងព្រះសុន្ទរកថាចុងក្រោយមួយ ក្នុងនាមព្រះចៅអធិរាជ ដែលនោះជាការបញ្ចប់សករាជHEISEIដែលបំពេញសន្តិភាព។
ការឡើងគ្រងរាជ្យរបស់ព្រះអង្គម្ចាស់ណារ៉ូហ៊ីតូ ព្រះជន្ម៥៨ព្រះវស្សាត្រូវធ្វើនាថ្ងៃទី១ឧសភា ហើយដែលកំណត់ពីព្រឹត្តិការណ៍ថ្មីមួយនៃសករាជREIWA។ ឈ្មោះនៃសករាជឬហៅGENGO ត្រូវបានប្រើយ៉ាងទូលំទូលាយនៅជប៉ុន ដូចជានៅលើកាក់ប្រាក់ ប្រតិទិន កាសែតនិងឯកសារផ្លូវការនានា៕
ចែករំលែកព័តមាននេះ