ADផ្ទាំងផ្សព្វផ្សាយពាណិជ្ជកម្ម

Picture

ថ្ងៃ​ដ៏​ពិសេស​! ក្រុមហ៊ុន​ធានា​រ៉ាប់រង​អាយុ​ជីវិត​​របស់​ជប៉ុន​មួយ ផ្តើម​ប្រតិបត្តិការ​ផ្លូវ​ការ​នៅ​​កម្ពុជា​ហើយ

4 ឆ្នាំ មុន
  • ភ្នំពេញ

រាជធានី​ភ្នំពេញ ៖ ក្រុមហ៊ុន​ធានា​រ៉ាប់រង​អាយុជីវិត​ឈានមុខ​គេ​របស់​ប្រទេស​ជប៉ុន Dai-ichi Life Holdings, Inc. (“Dai-ichi Life Group”)…

រាជធានី​ភ្នំពេញ ៖ ក្រុមហ៊ុន​ធានា​រ៉ាប់រង​អាយុជីវិត​ឈានមុខ​គេ​របស់​ប្រទេស​ជប៉ុន Dai-ichi Life Holdings, Inc. (“Dai-ichi Life Group”) បាន​ប្រកាស​បើក​សម្ពោធ​ក្រុមហ៊ុន​បុត្រ​សម្ព័ន្ធ របស់​ខ្លួន​នៅ​ក្នុង​ព្រះរាជាណាចក្រ​កម្ពុជា នៅ​ថ្ងៃ​ទី​24 ខែមេសា ឆ្នាំ​2019 ដែល​ជា​ក្រុមហ៊ុន​ធានា​រ៉ាប់រង​អាយុ​ជីវិត​របស់​ជប៉ុន​ដំបូង​គេ​នៅ​ក្នុង​ព្រះរាជាណាចក្រ​កម្ពុជា​។

ការិយាល័យ​កណ្តាល​ស្ថិត​នៅ​ក្នុង​អគារ Vattanac Capital ត្រូវ​បាន​បើក​សម្ពោធ​ដោយ​លោក Seiji Inagaki អគ្គនាយក​ក្រុមហ៊ុន Dai-ichi Life Group និង​លោក Allen Thai អគ្គនាយក នៃ​ក្រុម​ហ៊ុន Dai-ichi Life (Cambodia) PLC. (“Dai-ichi Life Cambodia”) ។

ពិធី​ទទួលទាន​អាហារ​ពេល​ល្ងាច​ត្រូវ​បាន​ប្រព្រឹត្ត​ធ្វើ​ឡើង​នៅ​សណ្ឋាគារ សូ​ហ្វី​តែ​ល ភ្នំពេញ ភូ​គី​ត្រា ដើម្បី​អបអរសាទរ​ក្នុង​ឱកាស​ដាក់​ឱ្យ​ដំណើរការ​ជា​ផ្លូវការ​របស់​ក្រុមហ៊ុន Dai-ichi Life Cambodia ដោយ​មានការ​ចូលរួម​ពី​សំណាក់​ថ្នាក់ដឹកនាំ​ជាន់ខ្ពស់​នៅ​ពី​ក្រសួង​សេដ្ឋកិច្ច និង​ហិរញ្ញវត្ថុ អ្នកតំណាង​ពី​ធនាគារ​ជា​ច្រើន និង​អ្នក​សារព័ត៌មាន ព្រមទាំង​ប្រព័ន្ធ​ផ្សព្វផ្សាយ​ជា​ច្រើន​។

ក្រុមហ៊ុន Dai-ichi Life Group ពេញចិត្ត​ក្នុង​ការ​ចូលរួម​ចំណែក​ជួយ​ដល់​សហគមន៍​ដែល​ជា​កន្លែង​ដែល​ខ្លួន​កំពុង​មាន​ប្រតិបត្តិការ ព្រោះ​វា​ជា​ការ​ជួយ​កសាង​សង្គម និង​សេដ្ឋកិច្ច ប្រកបដោយ​និរន្ត​ភាព​។ ដូច្នេះ​ក្រុមហ៊ុន Dai-ichi Life Group និង​ក្រុមហ៊ុន Dai-ichi Life Cambodia បាន​រួម​គ្នា​បរិច្ចាគ​​ទឹកប្រាក់​ចំនួន 200,000,000 រៀល​ទៅ​ឱ្យ​អង្គការ​សុខភាព Japan Heart Cambodia ដើម្បី​ជួយ​ដល់​កុមារ​កម្ពុជា ដែល​ជា​ជន​រង​គ្រោះ​នៃ​ជំងឺមហារីក​។

លោក​ជំទាវ ងួ​ន សុខា រដ្ឋលេខាធិការ​នៃ​ក្រសួង​សេដ្ឋកិច្ច និង​ហិរញ្ញវត្ថុ​បាន​មាន​ប្រសាសន៍​នា រាត្រី​ស​មោ​លស​ថា​៖ «​ខ្ញុំ​ជឿជាក់​យ៉ាង​មុតមាំ​ថា វត្តមាន​របស់​ក្រុមហ៊ុន ដាយ អ៊ិ​ឈិ ឡាយ​ហ្វ៍ កម្ពុជា នឹង​ចូលរួម​ចំណែក​ដល់​ការ​អភិវឌ្ឍន៍​វិស័យ​ធានា​រ៉ាប់រង​អាយុជីវិត​នៅ​កម្ពុជា​យើង តាម​រយៈ​បទ​ពិសោធន៍ ចំណេះដឹង ជំនាញ ដែល​ក្រុមហ៊ុន​ដាយ អ៊ិ​ឈិ ឡាយ​ហ្វ៍ មាន​ក្នុង​វិស័យ​ធានា​រ៉ាប់រង​អាយុជីវិត​អស់​រយៈពេល​ជាង ១០០ ឆ្នាំ ក្នុង​ប្រទេស​ជប៉ុន​»​។

លោក​អគ្គនាយក អា​ឡិន ថៃ បាន​មាន​ប្រសាសន៍​ថា «​ក្នុង​នាម​ជា​វិនិយោគិន​ជប៉ុន ដែល​មានការ​ប្តេជ្ញា​ចិត្ត​ខ្ពស់ ក្រុមហ៊ុន Dai-ichi Life Cambodia នឹង​ផ្តល់​ជូន​នូវ​ផលិតផល និង​សេវាកម្ម​របស់​ខ្លួន​នៅ​ក្នុង​ប្រទេស​កម្ពុជា​សម្រាប់​រយៈពេល​វែង​។ ក្រុមហ៊ុន​បាន​ត្រៀមខ្លួន​រួច​ជា​ស្រេច ដើម្បី​បម្រើ និង​បំពេញ​តម្រូវការ​ធានា​រ៉ាប់រង​អាយុជីវិត​ជូន​ដល់​ប្រជាជន​កម្ពុជា​គ្រប់​រូប ដូច​ពាក្យស្លោក​របស់​ក្រុមហ៊ុន Dai-ichi Life Cambodia និយាយ​ថា «​នៅ​ក្បែរ​អ្នកជា​និច្ច »​។

ក្នុង​សន្និសីទ​សារព័ត៌មាន​ក៏​បាន​ប្រព្រឹត្ត​ទៅ​នៅ​ថ្ងៃ​ដដែល​នេះ នៅ​សណ្ឋាគារ Rosewood ភ្នំពេញ ដើម្បី​ប្រកាស​ពី​កិច្ច​សហប្រតិបត្តិការ​រវាង​ក្រុមហ៊ុន Dai-ichi Life Cambodia ជាមួយនឹង​ធនាគារ​វឌ្ឍនៈ​។ តាម​រយៈ​ការ​ចងសម្ព័ន្ធភាព​ធុរកិច្ច​រវាង​ក្រុមហ៊ុន​ធំ​ទាំង​ពីរ​នេះ នឹង​ធ្វើ​ឱ្យ​ក្រុមហ៊ុន Dai-ichi Life Cambodia អាច​ប្រើប្រាស់​បណ្តាញ​របស់​ធនាគារ វឌ្ឍនៈ និង​ទំនាក់ទំនង​មក​អតិថិជន​របស់​ខ្លួន​បាន​កាន់តែ​ឆាប់រហ័ស​ឡើង​។

លោក ចាន់ កុក​ច​យ នាយក​ប្រតិបត្តិ​/​នាយក​គ្រប់គ្រង​ទូទៅ នៃ​ធនាគារ​វឌ្ឍនៈ​បាន​មាន​ប្រសាសន៍​ថា​៖ «​យើង​មាន​ទំនុកចិត្ត និង​សុទិដ្ឋិនិយម​ចំពោះ​កិច្ច​សហប្រតិបត្តិការ​នេះ​។ យើង​ជឿជាក់​ថា ផលិតផល​របស់​ក្រុមហ៊ុន ដាយ អ៊ិ​ឈិ ឡាយ​ហ្វ៍ កម្ពុជា នឹង​បំពេញ​នូវ​តម្រូវការ​របស់​អតិថិជន​របស់​យើងខ្ញុំ​។ ពួក​យើង​ជឿជាក់​ទៅ​លើ​វិជ្ជាជីវៈ សុច្ចរិត​ភាព និង​ការ​បេ​ជ្ញា​ចិត្ត​របស់​ក្រុមហ៊ុន ដាយ អ៊ិ​ឈិ ឡាយ​ហ្វ៍ កម្ពុជា ក្នុង​ការ​សហការ​ជាមួយ​យើងខ្ញុំ​»​។

ក្រុមហ៊ុន​ធានា​រ៉ាប់​អាយុជីវិត Dai-ichi Life Cambodia មាន​សេចក្តី​រំភើប​រីករាយ​ជា​ខ្លាំង​ក្នុង​ការ​ចាប់ផ្តើម​ដំណើរការ​ប្រតិបត្តិការ​របស់​ខ្លួន ដើម្បី​បំពេញ​នូវ​តម្រូវការ​ធានា​រ៉ាប់រង​អាយុជីវិត​ជូន​ដល់​ប្រជាជន​កម្ពុជា​គ្រប់​រូប​៕ ដោយ​សហការ

អត្ថបទសរសេរ ដោយ

កែសម្រួលដោយ