ភ្នំពេញ ៖ កម្មវិធី «វេលាដ៏អស្ចារ្យ» គឺជាព្រឹត្តិការណ៍ជួបជុំគ្រួសារខ្មែរពីគ្រប់ទិសទី ដើម្បីអបអរសារទរពិធីបុណ្យចូលឆ្នាំប្រពៃណីខ្មែរ ដើម្បីទទួលពរជ័យ និងភាពរីករាយក្រោយពីនឿយហត់អស់មួយរយៈ។ ចំណុចជាគោលដែលកម្មវិធីចង់រំលេច គឺការរស់នៅសាមគ្គីគ្នាជាធ្លុងតាមរយៈចម្រៀង និងរបាំជាគោលគំនិតរួមនៃកម្មវិធី។
កម្មវិធី «វេលាដ៏អស្ចារ្យ» ធ្វើឡើងនៅថ្ងៃទី៦ ៧ ៨ ខែមេសា ឆ្នាំ២០១៩ ក្រោមការគាំទ្ររបស់ ស.ស.យ.ក ភ្នំពេញ។ កម្មវិធី «វេលាដ៏អស្ចារ្យ» បង្កើតឡើងជាលើកដំបូងក្នុងវិទ្យាល័យជាស៊ីមបឹងកេងកង ក្នុងគោលបំណង រួបរួមគ្នាដើម្បីលើកកម្ពស់នូវវប្បធម៌ ប្រពៃណី ទំនៀមទម្លាប់ដ៏ផូផង់របស់បុព្វបុរសខ្មែរ ព្រមទាំងផ្សាភ្ជាប់ទំនៀមទម្លាប់ទៅនឹងសហគ្រិនភាព ដើម្បីបណ្តុះគំនិតច្នៃប្រឌិតក្នុងការបង្កើតធុរៈកិច្ចដែលគោរពតាមប្រពៃណីជាតិ និងជួយបង្កើនចំណូលដល់ប្រជាជនក្នុងតំបន់ ហើយបង្កើតឱ្យមានភាពស្និទ្ធិស្នាលប្រកបដោយស្នាមញញឹម។ មិនត្រឹមតែប៉ុណ្ណោះបង្ហាញពីចំណងដ៏រឹងមាំរបស់ប្រជាពលរដ្ឋខ្មែរក្នុងការថែរក្សា អភិវឌ្ឍប្រពៃណី ទំនៀមទម្លាប់ខ្មែរក៏ដូចជា ផ្តល់នូវបរិយាកាសទាក់ទាញភ្ងៀវជាតិ និងអន្តរជាតិ ដើម្បីកំសាន្ត និងស្វែងយល់ពីកម្ពុជាឱ្យបានស៊ីជម្រៅ។
«វេលាដ៏អស្ចារ្យ» ជាកម្មវិធីស្នូលដែលមានលក្ខណៈពិសេសដោយកំណត់ទីតាំងធំៗដោយមានប្រធានបទផ្សេងពីគ្នា។ ក្នុងនោះមាន៦តំបន់ដែលមានគោលគំនិតទាក់ទងនឹងបទចម្រៀងប្រពៃណីខ្មែរ។ ចំណុចគោល៣ដែលសំខាន់ក្នុងកម្មវិធីគឺ ៖ស្នាមញញឹម ទំនៀមទម្លាប់ និងសហគ្រិនភាព។
1. តំបន់អនុស្សាវរីយ៍អង្គរ មានរៀបចំជាការតុបតែងបែបអង្គរសង្ក្រាន្ត ដើម្បីគាស់រំលឹកពីភាពស្រស់ស្អាតរបស់កម្មវិធីអង្គរសង្ក្រាន្តកន្លងមក ហើយក៏បានបង្ហាញពីការគោរពស្រឡាញ់ដល់ស្នាដៃ បងៗដែលបានបង្កើតកម្មវិធីដ៏អស្ចារ្យមួយនេះឡើងមក។
2. តំបន់ណាំណាវ ជាតំបន់ចម្រុះជនជាតិ ដោយមានចម្រៀង និងការរាំលេងកំសាន្ត គួរឱ្យចាប់ អារម្មណ៍។
3. តំបន់ផាមួងកទា ឆ្លុះបញ្ចាំងតាមសម័យកាលដែលជនជាតិខ្មែរជាជនជាតិស៊ីវិល័យ និងមានរសនិយមខ្ពស់លើសម្លៀកបំពាក់។ តំបន់នេះផ្តោតសំខាន់លើស្នាដៃទេពកោសល្យរបស់អ្នកច្នៃម៉ូតនានា ដែលចង់បង្ហាញពីភាពអស្ចារ្យនៃវប្បធម៌ តាមរយៈសម្លៀកបំពាក់របស់ខ្លួន ក៏ដូចជាលើកតម្កើងនូវវប្បធម៌ដ៏ស្រស់ស្អាតរបស់បណ្ដាប្រទេសនានាផងដែរ។
4. តំបន់ភិសវង់ ជាតំបន់ដែលផ្តោតលើការរាំកម្សាន្តដែលញាំងកម្មវិធីនេះ ឱ្យមានភាពមហោឡារិក។ តំបន់នេះ មានការរៀបចំជាបទចម្រៀងចង្វាក់ប្រពៃណីខ្មែរនានា ចង្វាក់រាំវង់ រាំក្បាច់ សារ៉ាវ៉ាន់ ឡាំលាវ ចូលកំពឹសជាដើម។
5. តំបន់ចាហួយសង់ខ្យា ជាតំបន់ដែលពោរពេញទៅដោយការប្រកបរបរអាជីវកម្មរបស់បងប្អូនខ្មែរនៅជុំវិញទីតាំងប្រារព្ធកម្មវិធីក៏ដូចជាក្នុងផ្សារផ្ទាល់ យើងក៏បានផ្ដួចផ្ដើមគំនិតលើកស្តួយនូវសហគ្រិនភាពរបស់ពួកគាត់តាមរយៈការបង្កើតស្តង់ម្ហូបអាហារសម្រាប់អាជីវករ។
6. តំបន់ជិះទូកតាមគង្គា ជាតំបន់ដែលយកទឹកជាគោលក្នុងការអបអរកម្មវិធីវេលាដ៏អស្ចារ្យ។
គួរបញ្ជាក់ថា កម្មវិធីវេលាដ៏អស្ចារ្យនេះនឹងរៀបចំឡើងរយៈពេល ៣ ថ្ងៃ គឺចាប់ពីថ្ងៃទី ៦ ៧ និង ៨ ខែមេសា ឆ្នាំ២០១៩៕ ដោយសហការ
ចែករំលែកព័តមាននេះ