រាជធានីភ្នំពេញ ៖ ដោយសារតែមានជីវភាពក្រីក្រ ក្មេងប្រុសម៉ូន ទ្រីន ដែលស្ថិតក្នុងវ័យក្រេបយកចំណេះដឹងដើម្បីអនាគត ត្រូវបង្ខំចិត្តបោះបង់ការសិក្សាដើម្បីងាកទៅប្រកបរបររកកម្រៃចិញ្ចឹមបងប្អូនវិញ ។ ដោយសារតែមិនចង់ឃើញក្រុមគ្រួសារដេកអត់បាយ ទើបក្មេងប្រុសម្នាក់នេះតស៊ូដើរលក់សណ្តែកដីតាមទីសាធារណៈគ្រប់ច្រកទាំងចិត្តរបស់គេនៅតែចង់សិក្សា និងដក់ជាប់ការសោកស្តាយដែលមិនបានសិក្សាដូចកុមារទូទៅ ។ ក្មេងប្រុសរូបនេះឈ្មោះម៉ូន ទ្រីន អាយុ១៤ឆ្នាំ ។
ម៉ូន ទ្រីន ស្រុកកំណើតនៅខេត្តព្រៃវែងមានបងប្អូនចំនួន៥នាក់ ក្នុងនោះស្រីម្នាក់ ។ ទ្រីនមានតែឪពុកប៉ុណ្ណោះ ចំណែកម្តាយបាត់បង់ជីវិតប្រមាណជាង២ខែមុន ដោយសារជម្ងឺ ។ នៅពេលបាត់បង់អ្នកមានគុណម្ខាងទាំងខ្លួននៅក្មេង បងប្អូនរបស់ម៉ូន ទ្រីន ទាំង៥នាក់បាត់បង់ភាពកក់ក្តៅក្នុងជីវិត ។ តាំងពីម្តាយចែកឋានទៅ ការរស់នៅប្រចាំថ្ងៃមិនសូវជាល្អទេសម្រាប់គ្រួសាររបស់ទ្រីន ព្រោះកាលពីម្តាយនៅរស់គាត់លក់នេះលក់នោះយកប្រាក់ទ្រទ្រង់ជីវភាពបានគ្រាន់បើបន្តិច ។
នៅពេលជីវភាពគ្រួសារនៅស្រុកកំណើតពិបាកពេក ម៉ូន ទ្រីន បង្ខំចិត្ត ឈប់រៀនត្រឹមថ្នាក់ទី៥ ហើយមកភ្នំពេញជាមួយបងប្រុសដើម្បីដើររកការងារធ្វើ ។ ពីដំបូងទ្រីន គិតថាខ្លួននៅក្មេងអត់មានមុខរបរអីទេ លុយក៏គ្មាន បើទៅធ្វើជាកម្មករសំណង់ច្បាស់ជាបាក់កម្លាំង ម្យា៉ងគេមិនឱ្យធ្វើទេខ្លាចប៉ះពាល់សិទ្ធិកុមារ ដូច្នេះមានតែដើរសុំទានគេ ។ គិតចង់ដើរសុំទានគេ តែទ្រីនខ្លាចគេមើលងាយ ដូច្នេះលះបង់គំនិតនេះវិញ ។ ពេលបងប្រុសសល់ប្រាក់ខ្លះបានពីធ្វើកម្មករសំណង់ក៏ផ្តល់ឱ្យទ្រីន ធ្វើជាដើមទុនទៅទិញសណ្តែកដីយកមកស្ងោរដើរលក់តាមដងផ្លូវ និងតាមហាងផឹកសីុជាប្រចាំរៀងរាល់យប់ចាប់ពីម៉ោង៦ល្ងាចដល់ម៉ោង១០យប់ ។
ប្រាក់កម្រៃដែលបានមក ទ្រីន ជួយឧបត្ថម្ភប្អូនរៀនខ្លះ និងជួយឪពុកមួយផ្នែកពីរបររត់ម៉ូតូឌុបរបស់គាត់ដែលបានប្រាក់មិនទៀងទេ ។
ម៉ូន ទ្រីន និយាយថា រវល់តែខំរកប្រាក់រាល់យប់ធ្វើឱ្យរូបគេស្ទើរតែភ្លេចអក្សរអស់ទៅហើយ ។ គេអានអក្សរទាំងរដាក់រដុប សូម្បីតែឈ្មោះខ្លួនឯងសរសេរមិនចង់កើត ព្រោះភ្លេចស្រៈ និងព្យញ្ជនៈច្រើនពេក ។ រាល់ថ្ងៃ ម៉ូន ទ្រីន ដើរលក់សណ្តែកដីបានប្រាក់ពី២ទៅ៣ម៉ឺនរៀលគិតទាំងដើមទាំងផលចំណេញ ។ សណ្តែកដីស្ងោរគេដាក់ក្នុងថង់ពី៨ទៅ១០ថង់ ឬលើសនេះ ដោយក្នុង១ថង់លក់២ពាន់រៀល ។ ប្រាក់ដែលលក់បាន ឱ្យបងប្រុសទុក ហើយត្រូវបងប្រុសឱ្យចាយវិញក្នុង១ថ្ងៃពី១.៥០០ទៅ២ពាន់រៀល ។
បើនៅតែគ្មានឱកាសបានរៀនសូត្របែបនេះ ទៅថ្ងៃក្រោយ ម៉ូន ទ្រីន ចង់ក្លាយជាជាងជួសជុលរថយន្ត ឬជួសជុលម៉ូតូដើម្បីរកប្រាក់កម្រៃចិញ្ចឹមជីវិត ។ ទ្រីន យល់ថារបរនេះស្រួលរកលុយ ។
កញ្ញាជា សុភ័ក្រ និស្សិតផ្នែកទេសចរណ៍សម្តែងក្តីអាណិតអាសូរ និងកោតសរសើរចំពោះការតស៊ូប្រកបរបរសុចរិតរបស់ក្មេងប្រុស ម៉ូន ទ្រីន តែនាងបារម្ភចំពោះជោគវាសនា អនាគតរបស់គេ ខណៈមិនបានរៀនសូត្របែបនេះ ។ នាងយល់ថា ក្នុងវ័យនេះសមតែនៅក្នុងថ្នាក់រៀនជាជាងដើររកប្រាក់ចិញ្ចឹមគ្រួសារ ៕
ចែករំលែកព័តមាននេះ