រាជធានីភ្នំពេញ ៖ គម្រោងកែលំស្ពានជ្រោយចង្វារចាស់មិត្តភាពកម្ពុជា-ជប៉ុន មកទល់ពេលនេះ បានស្ថាបនាសម្រេចបាន១០០ភាគរយហើយ នៅឡើយរង់ចាំតែពិធីបើកសម្ពោធជាផ្លូវការប៉ុណ្ណោះ ដែលធ្វើក្នុងពេលឆាប់ៗនេះ ដើម្បីសម្រួលដល់ការធ្វើចរាចរណ៍របស់ប្រជាពលរដ្ឋ ។ មន្ត្រីជាន់ខ្ពស់ក្រសួងសាធារណការបានឱ្យដឹងថា…
រាជធានីភ្នំពេញ ៖ គម្រោងកែលំស្ពានជ្រោយចង្វារចាស់មិត្តភាពកម្ពុជា-ជប៉ុន មកទល់ពេលនេះ បានស្ថាបនាសម្រេចបាន១០០ភាគរយហើយ នៅឡើយរង់ចាំតែពិធីបើកសម្ពោធជាផ្លូវការប៉ុណ្ណោះ ដែលធ្វើក្នុងពេលឆាប់ៗនេះ ដើម្បីសម្រួលដល់ការធ្វើចរាចរណ៍របស់ប្រជាពលរដ្ឋ ។
មន្ត្រីជាន់ខ្ពស់ក្រសួងសាធារណការបានឱ្យដឹងថា ស្ពានជ្រោយចង្វារចាស់មិត្តភាពកម្ពុជា-ជប៉ុន គ្រោងបើកសម្ពោធជាផ្លូវការនៅថ្ងៃទី៣ មេសា ខាងមុខនេះ ក្រោមអធិបតីភាពសម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
លោកឈឹម ផល្លា ប្រធានយកដ្ឋានផ្លូវថ្នល់នៃក្រសួងសាធារណការ និងដឹកជញ្ជូនបានប្រាប់នៅព្រឹកថ្ងៃទី២៦ មីនា នេះថា ក្រុមការងារជំនាញទាំងជប៉ុននិងកម្ពុជា បានខិតខំប្រឹងប្រែងយ៉ាងខ្លាំង ក្នុងការសម្រុកការជួសជុលគម្រោងកែលម្អស្ពានជ្រោយចង្វារចាស់ទាំងយប់ទាំងថ្ងៃ ដើម្បីឱ្យហើយមុនផែនការ ដែលបង្កលក្ខណៈងាយស្រួលដល់ការធ្វើដំណើររបស់ប្រជាពលរដ្ឋ ខណៈស្ពានជ្រោយចង្វារថ្មីមានចរាចរណ៍មមារញឹកខ្លាំង ប្រឈមការកកស្ទះចរាចរណ៍ជារៀងរាល់ថ្ងៃ ។ ពិសេស ការសម្រួលចរាចរណ៍ក្នុងឱកាសបុណ្យចូលឆ្នាំខ្មែរ ដែលប្រជាពលរដ្ឋធ្វើចរចរណ៍ចេញទៅស្រុកកំណើត មិនប្រឈមការកកស្ទះ ។
លោកបន្តថា តាមបច្ចេកទេសនេះ គម្រោងកែលម្អស្ពាននេះ បានសាងសង់ទម្រស្ពានថ្មីជួសជុលផ្នែកកណ្តាលស្ពានឆ្លងកាត់ទន្លេ និងកែលម្អគល់ស្ពានទាំងសងខាង ។ ស្ពាននេះមានប្រវែង៧០៩ម៉ែត្រ ឆ្លងកាត់ទន្លេសាប ត្រូវបានសាងសង់ឡើងកាលពីឆ្នាំ១៩៦៣ ប៉ុន្តែដោយសារសង្គ្រាមស៊ីវិលក្នុងកំឡុងទស្សវត្សទី៧០ ស្ពាននេះត្រូវបានទទួលរងការខូចខាតទាំងស្រុង ហើយរហូតដល់ឆ្នាំ១៩៩២ ទើបជួសជុលស្តារឡើងវិញ ។
មន្ត្រីស្ថានទូតជប៉ុនប្រចាំកម្ពុជាបានអោយដឹងថា គម្រោងជួសជុលស្តារឡើងវិញស្ពានជ្រោយចង្វារទី១ បានធ្វើឡើង ដើម្បីជួយអភិវឌ្ឍន៍ហេដ្ឋារចនាសម្ព័ន្ធដឹកជញ្ជូននៅកម្ពុជា ។ ស្ពានជ្រោយចង្វារនេះមាន សារសំខាន់ណាស់ សម្រាប់រថយន្តធុនធ្ងន់ឆ្លងកាត់ និងដឹកជញ្ជូនទំនិញ និងជាច្រករបៀងសេដ្ឋកិច្ចដោយតភ្ជាប់ពីរាជធានីភ្នំពេញ ឆ្ពោះទៅកាន់ខេត្តចំនួន៩ភាគខាងជើងប្រទេស ។
សូមបញ្ជាក់ទៀតថា គម្រោងជួសជុលស្ពានជ្រោយចង្វារចាស់មិត្តភាពកម្ពុជា-ជប៉ុនឡើងវិញនេះ ប្រើរយៈពេលពេល២២ខែ ដោយត្រូវចំណាយថវិការហូតដល់ជាង៣០លានដុល្លារ ដែលជាជំនួយឥតសំណងរបស់រដ្ឋាភិបាលជប៉ុន ។
ចែករំលែកព័តមាននេះ