រាជធានីភ្នំពេញ៖ ក្រសួងវប្បធម៌ និងវិចិត្រសិល្បៈ មានគម្រោងស្នើដាក់បញ្ចូលសិល្បៈបុរាណយីកេ និងសិល្បៈមួយចំនួនទៀតចូលជាបេតិភណ្ឌពិភពលោក ។ សាស្ត្រាចារ្យផ្នែកយីកេនៃសាលាភូមិន្ទមធ្យមវិចិត្រសិល្បៈអ្នកគ្រូឃី សាឃន កាលពីពេលថ្មីៗកន្លងមកបានសាទរចំពោះការគិតគូររបស់ក្រសួងវប្បធម៌ក្នុងការដាក់បញ្ចូលសិល្បៈយីកេជាសម្បត្តិបេតិភណ្ឌពិភពលោក។
ចៅស្រីតាឃី គ្រូយីកេដ៏ល្បីនៅខេត្តតាកែវរូបនេះថ្លែងថា «វាជាការល្អបំផុតដែលយើងធ្វើបែបនេះ ព្រោះទម្រង់សិល្បៈយីកេ គឺជាសិល្បៈបង្ហាញពីអត្តសញ្ញាណរបស់ខ្មែរ ដែលយើងត្រូវតែចូលរួមលើកស្ទួយ និងថែរក្សា។ បើទោះបីជាបច្ចុប្បន្នសិល្បៈមួយនេះហាក់មិនសូវមានការគាំទ្រពីយុវវ័យក៏ដោយ ប៉ុន្តែប្រសិនភាគីពាក់ព័ន្ធមិនជួយអភិរក្ស និងលើកស្ទួយទេនោះ វាអាចនឹងបាត់បង់នៅថ្ងៃណាមួយជាមិនខានឡើយ»។
បើតាមអ្នកគ្រូឃី សាឃន បច្ចុប្បន្នមានសិស្សជំនាន់ក្រោយជាច្រើនបានចាប់អារម្មណ៍ហាត់រៀនយីកេ ។ ពួកគេមានការចាប់អារម្មណ៍លើសិល្បៈមួយច្រើនជាងគេ ដោយសារតែយីកេវាមានលំនាំដូចជារបាំដែរ ទាំងកាយវិកា រ ការច្រៀងគឺហាក់មិនសូវជាពិបាកដូចសិល្បៈបុរាណមួយចំនួនទៀតឡើយ ។
អ្នកគ្រូឃី សាខន បានស្នើសុំដល់ស្ថានីយទូរទស្សន៍ទាំងអស់គួរមានការចាក់ផ្សាយសិល្បៈយីកេនៅក្នុងម៉ោងល្អណាមួយសម្រាប់ទស្សនិកជនបានទស្សនា ចៀសវាងផ្សាយម៉ោងដែលមិនសូវមានអ្នកទស្សនា ។
ជាអតីតតួឯកយីកេប្រចាំក្រុមមន្ទីរវប្បធម៌ និងវិចិត្រសិល្បៈខេត្តតាកែវលោកចាន់ សុធី បានសម្តែងក្តីរីករាយនៅពេលដែលក្រសួងគ្រោងដាក់ស្នើសិល្បៈបុរាណយីកេជាបេតិភណ្ឌពិភពលោក ។ លោកសុធី ថ្លែងថា «បញ្ហានេះគឺបង្ហាញពីការយកចិត្តទុកដាក់ ក៏ដូជាចជាការគិតគូររបស់ក្រសួងទៅលើសិល្បៈដែលជាកេរដំណែលដូចតាយើង ។
កត្តានេះវានឹងធ្វើឲ្យមានការផុលផុសឡើងវិញសម្រាប់ស្រទាប់មហាជន ជាពិសេសយុវវ័យឲ្យមានការចូលរួមគាំទ្រ និងថែរក្សាសិល្បៈយីកេឡើងវិញ ក្នុងពេលដែលបច្ចុប្បន្នយុវវ័យភាគច្រើនបានងាកមកគាំទ្រខ្លាំងលើសិល្បៈសម័យ ។ យីកេនេះគឺជាសិល្បៈកេររបស់យើង ហើយសិល្បៈមួយនេះក៏មានទម្រង់បង្ហាញនូវអត្តចរិតរបស់ខ្មែរដែរ ព្រោះវាមានភាពទន់ភ្លន់ មិនឆេវឆាវ »។
ក្នុងនាមជាអ្នកប្រតិបត្តិលើទម្រង់សិល្បៈបុរាណយីកេជាមួយនឹងដើមកំណើតពីខេត្តតាកែវលោកចាន់ សុធី បានស្នើដល់យុវវ័យឲ្យជួយគាំទ្រសិល្បៈបុរាណខ្មែរព្រោះវាជាអត្តសញ្ញាណជាតិ និងដួងព្រលឹងជាតិមួយផងដែរ។ យុវវ័យបានដើរតួនាទីសំខាន់ណាស់ សម្រាប់ការបន្តវេននូវសិល្បៈបុរាណដូនតា នៅពេលដែលធនធាន ចាស់ៗបានបាត់បង់ បន្តិចម្តងៗ ។
តាមសៀវភៅយីកេ និងល្ខោនបាសាក់ របស់លោកពេជ្រ ក្រទុំវិល ឆ្នាំ ១៩៩៧ បានរៀបរាប់ថាចំណុចពិសេសរបស់ល្ខោនយីកេ គឺស្ថិតនៅលើការពោល ដឹករឿង រួមនឹងស្គរយីកេ អាច២ ឬមាន១៣ស្គរស្រេចលើវង់តូច និងវង់ធំ ខណៈពេលអ្នកពោលជាគ្រូនៃវង់ល្ខោនយីកេ គឺជាអ្នកដឹកនាំការសម្ដែងទាំងមូលក្នុងដំណើររឿង ។
លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ កាលពីថ្ងៃទី២០ កុម្ភៈ២០១៩ បានថ្លែងថា ក្រសួងបាន និងកំពុងគិតគូរលើការដាក់បញ្ចូលសម្បត្តិវប្បធម៌ទាំងរូបី និងអរូបីក្នុងបញ្ជីបេតិកភណ្ឌពិភពលោក ក្នុងនោះក្រសួងកំពុងត្រៀមនូវអ្វីដែលជាតំណាងខ្មែរដូចជា យីកេ ឬគ្រឿងចម្លាក់ប្រាក់ជាដើម ។
បើគេនិយាយពីសិល្បៈយីកេ នោះគេនឹងនឹកឃើញដល់ខេត្តតាកែវដែលមានវង់ល្ខោនយីកេល្បីល្បាញជាងគេក្នុងប្រទេស ជាពិសេសគឺវង់ល្ខោនរបស់លោកតាឃី ដែលជាប្រភពក្បួនខ្នាតយីកេ ។ កន្លងមកក្រសួងវប្បធម៌បានចាត់ឲ្យមានការស្រាវជ្រាវលើទម្រង់សិល្បៈយីកេនេះពីលោកតាឃី ហើយពេលនោះហើយដែលអ្នកស្រាវជ្រាវបានរកឃើញនូវបទចម្រៀងយីកេ និងបានចងក្រងទុកជាឯកសារបានប្រមាណជា១៥០បទ ៕
ចែករំលែកព័តមាននេះ