ខេត្តកំពង់ធំ ៖ បុរសចំណាស់ម្នាក់ដើរទៅទិញស្រាផឹក តែគេមិនលក់ឱ្យ រួចគាត់ក៏ត្រឡប់មកវិញ ប៉ុន្តែមិនឃើញគាត់មកផ្ទះនោះទេ ស្រាប់តែមានគេប្រទះឃើញគាត់ដេកតាមផ្លូវ ក៏ទៅប្រាប់កូនប្រុសឱ្យទៅមើលទើបដឹងថាឪពុកស្លាប់បាត់ទៅហើយ បង្កការភ្ញាក់ផ្អើលកាលពីវេលាម៉ោង២និង១៥ឈានចូលថ្ងៃទី២០ ខែមីនា ឆ្នាំ២០១៩ ស្ថិតនៅក្នុងភូមិសាស្ត្រឃុំចំណាក្រោម ស្រុកស្ទោង ខេត្តកំពង់ធំ។
សមត្ថកិច្ចបានឱ្យដឹងថា ជនរងគ្រោះដែលស្លាប់ឈ្មោះ លីវ ញឹម ភេទប្រុស អាយុ៦៧ឆ្នាំ រស់នៅភូមិស្ពានគ្រង ឃុំចំណាក្រោម ស្រុកស្ទោង ខេត្តកំពង់ធំ ។
តាមការបំភ្លឺពីឈ្មោះ ញឹម យ៉ត ភេទប្រុស អាយុ៤១ឆ្នាំ ត្រូវជាកូនបង្កើតរបស់ជនរងគ្រោះបានបញ្ជាក់ថា ឪពុករបស់គាត់តែងតែផឹកស្រាស្រវឹងជាប្រចាំ នៅមុនពេលកើតហេតុ កាលពីវេលាម៉ោងប្រហែល១០ព្រឹកថ្ងៃទី១៩ មីនា ឪពុកគាត់ផឹកស្រាស្រវឹងយ៉ាងខ្លាំង រហូតដល់យប់ ។
ប្រភពដដែលបានបន្តថា បន្ទាប់មកនៅវេលាម៉ោងប្រហែល២ឈានចូលថ្ងៃទី២០ មីនា ឪពុករបស់គាត់បានដើរសំដៅទៅរោងឈ្មោះ សី ដើម្បីរកទិញស្រាផឹកជាបន្តទៀត តែដោយសារគាត់ស្រវឹងពេក គេពុំលក់អោយ រួចឪពុករបស់គាត់ក៏ដើរត្រឡប់មកវិញ ប៉ុន្តែមិនឃើតឪពុករបស់គាត់មកផ្ទះឡើយ ។ រហូតដល់វេលាម៉ោងប្រហែល៣ឈានចូលថ្ងៃទី២០ មីនា ទើបឈ្មោះ ហុក និងឈ្មោះ ហ៊ីម បានជិះម៉ូតូមកប្រាប់គាត់ថា ពួកគេឃើញឪពុករបស់គាត់ដេកនៅតាមផ្លូវ ។ ភ្លាមៗនោះគាត់បានទៅមើលឃើញឪពុកដេកផ្កាប់មុខស្លាប់តាមផ្លូវក្បែរព្រៃបាត់ទៅហើយ បន្ទាប់មកគាត់ក៏ដឹកសពតាមម៉ូតូយកទៅផ្ទះនៅភូមិស្ពានគ្រង រួចក៏រាយការណ៍ទៅសមត្ថកិច្ចដើម្បីចុះមកពិនិត្យ។
បន្ទាប់ពីទទួលបានព័ត៌មានខាងលើភ្លាម កម្លាំងជំនាញស្រុកសហការជាមួយអាជ្ញាធរមូលដ្ឋានភូមិឃុំចុះធ្វើការពិនិត្យ និងធ្វើកោសល្យវិច្ច័យលើសពជនរងគ្រោះ រកឃើញថា នៅលើខ្លួនជនរងគ្រោះមានស្នាមរបកស្បែកនៅលើខ្នង និងនៅលើភ្លៅខាងឆ្វេង ដោយសារត្រូវកំដៅថ្ងៃហើយកកិតជាមួយម៉ូតូពេលកូនប្រុសដឹកសពតាមម៉ូតូយកទៅផ្ទះ ក្រៅពីនេះពុំមានស្លាកស្នាមអ្វីផ្សេងគួរឱ្យកត់សម្គាល់ឡើយ ។ តាមការសន្និដ្ឋានបានឱ្យដឹងថា ការស្លាប់របស់ជនរងគ្រោះគឺបណ្តាលមកពីផឹកស្រាច្រើនអត់ហូបបាយទើបកើតខ្យល់គរ និងគាំងបេះដូងស្លាប់តែម្តង ។
បន្ទាប់ពីពិនិត្យរួច សមត្ថកិច្ចបានប្រគល់សពអោយកូនប្រុសយកទៅធ្វើបុណ្យតាមប្រពៃណី ៕
ចែករំលែកព័តមាននេះ