ខេត្តបាត់ដំបង ៖ នៅក្នុងពិធីបិទ «សន្និបាតបូកសរុបការងារប្រចាំឆ្នាំ២០១៨ នៃរដ្ឋបាលខេត្តបាត់ដំបង» ធ្វើឡើងកាលពីថ្ងៃទី២៨ កុម្ភៈ នៅសាលមហោស្របស្ទឹងសង្កែ សម្ដេចក្រឡាហោម ស ខេង បានជម្រុញឲ្យមានការបង្ក្រាបកាន់តែខ្លាំងនូវបទល្មើស«គ្រឿងញៀន»។ ដោយសម្ដេចបានមានប្រសាសន៍ថា យើងត្រូវតែរួមគ្នាធ្វើរឿងនេះ (គ្រឿងញៀន) ឱ្យកាន់តែខ្លាំង ។ យើងមិនត្រូវរងចាំបទបញ្ជារាល់ថ្ងៃ រាល់ម៉ោងនោះទេ ព្រោះច្បាប់គ្រឿងញៀនយើងមានគ្រប់គ្រាន់អស់ហើយ ។
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងទៅកាន់មន្ត្រីរាជការជាង១,០០០នាក់ ដែលចូលរួមក្នុងពិធីនោះថា ចំពោះបញ្ហាគោលការណ៍បង្ក្រាបគ្រឿងញៀនរបស់ប្រមុខរាជរដ្ឋាភិបាលរបស់ក្រសួងមហាផ្ទៃ របស់អគ្គស្នងការនគរបាលជាតិ សុទ្ធតែមានអស់ហើយ.. អីចឹង វាអត់ខ្វះទេ ពីបញ្ហាគោលការណ៍នោះ។ ដូច្នេះ យើងត្រូវតែដាក់ផែនការ ឬវិធានការបង្ក្រាប ព្រោះវាជារឿងបំផ្លាញអនាគតយុវជន និងអនាគតប្រទេសជាតិ ។
នៅក្នុងឱកាសនោះ សម្ដេចក្រឡាហោម បានលើកយកករណីបង្ក្រាបគ្រឿងញៀន នៅមជ្ឈមណ្ឌលកំសាន្ត
«រ៉ក់» នៅភ្នំពេញ ធ្វើជាឧទាហរណ៍ ដើម្បីពន្យល់ដល់មន្ត្រីនានាដូច្នេះថា «ការបង្ក្រាបបទល្មើសគ្រឿងញៀន នៅក្នុងមជ្ឍមណ្ឌលរ៉ក់ គឺមានសុទ្ធតែក្រុមយុវជន.. គ្មានមនុស្សចាស់អាយុ៥០ឬ៦០ឬ៨០ឆ្នាំម្នាក់ទេ..គឺមានតែក្មេងៗ»។ សម្ដេចថា រឿងនេះមានអ្នកគាំទ្រច្រើនណាស់។ ប៉ុន្តែក៏កំពុងមានអ្នកតាមមើល តាមដានច្រើនណាស់ដែរ អំពីវិធានការចុះបង្ក្រាបនៅកន្លែងដទៃទៀត តើវាយ៉ាងម៉េចដែរ ? ចុះមេខ្លោង ?។ ត្រង់ចម្ងល់នេះ សម្ដេចបានផ្ដល់ជាចម្លើយថា «វាជារឿងធម្មតាទេ.. គេមិនដែលប្រាប់មុនថា ស្អែកយើងទៅចាប់ អ្នកនេះ.. ស្អែកយើងទៅចាប់អ្នកនោះ.. គេមិនអាចប្រាប់ចឹងមុនកើតទេ។ បើថ្ងៃណាគេធ្វើ គឺគេនឹងធ្វើហើយ»។
សម្ដេចក្រឡាហោមស ខេង បានមានប្រសាសន៏ទំនងចង់ភ្ជាប់ទៅនឹងករណីបង្ក្រាបគ្រឿងញៀនដ៏ធំនៅក្នុងមជ្ឍមណ្ឌលកំសាន្ត«រ៉ក់»ដែរថា «ខ្ញុំបានប្រាប់រឿងនេះច្រើនលើកហើយ សូមឲ្យអាជីវករ ពិសេសម្ចាស់ក្លឹបកំសាន្តនានា និងម្ចាស់សណ្ធាគារទៀតផង ត្រូវចូលរួមសហការជាមួយកម្លាំងសមត្ថកិច្ច ដើម្បីបង្ការ ទប់ស្កាត់ និងបង្ក្រាបគ្រឿងញៀននៅក្នុងក្លឹបឬនៅសណ្ធាគារ។ ប៉ុន្តែកន្លងមកបងប្អូនមួយចំនួនហាក់មិនចង់ធ្វើ មិនចង់ចូលរួមសហការ ហើយថែមទាំងមិនឲ្យតំលៃ និងមិនគាំទ្រនូវវិធានការទាំងនេះទៀតផង។ ដូច្នេះចម្រើសចុងក្រោយមានតែប៉ុណ្ណឹង (បង្ក្រាប) មិនមានអ្វីលើសពីហ្នឹងទៀតទេ»។
នៅចំពោះមុខមន្ត្រីគ្រប់ស្ថាប័ន សម្ដេចក្រឡាហោមស ខេង បានបញ្ជាក់ជាចុងក្រោយយ៉ាងដូច្នេះថា «ខ្ញុំសង្ឃឹមថា គ្រប់កន្លែងទាំងអស់.. ទាំងនៅភ្នំពេញ ទាំងនៅតាមបណ្ដាខេត្តនានា សំខាន់នៅតាមទីប្រជុំជន យើងត្រូវនាំគ្នាបោសសំអាតដោយមិនរើសមុខ..។ យើងត្រូវធ្វើតាមច្បាប់ ព្រោះយើងជាអ្នកអនុវត្តច្បាប់ បើយើងខ្លាច.. ហើយបែរជាទៅគោរពអ្នកប្រព្រិត្តខុសច្បាប់ សួរថា តើយើងនឹងក្លាយជាអ្នកមិនគោរពច្បាប់ដែរឬយ៉ាងណា ? អីចឹង យើងមិនត្រូវទុកឲ្យស្ថានការនេះវឹកវរពេញប្រទេសនោះទេ។
សម្ដេចក៏បានរំលឹកដែរថា កាលយុទ្ធនាការបង្ក្រាបគ្រឿងញៀន ក្នុងឆ្នាំ២០១៧ និង២០១៨ កន្លងទៅនេះ បើតាមរបាយការណ៏របស់អាជ្ញាធរជាតិប្រយុទ្ធប្រឆាំងគ្រឿងញៀន គឺរឹបអូសបានរហូតសដល់ទៅជាងកន្លះតោនឯណោះ.. ហើយក៏មិនដឹងថា នៅមានត្រង់ណាទៀត ដែលយើងមិនទាន់ប្រមូលបាន ? សម្ដេចសូមអំពាវនាវជាថ្មីទៀត សូមឲ្យប្រជាពលរដ្ឋ សិស្សានុសិស្សទាំងអស់ ចូលរួមទប់ស្កាត់ និងលប់បំបាត់នូវបញ្ហាគ្រឿងញៀននេះ។ ព្រោះវាជាអនាគតនៃប្រទេសជាតិយើង អីចឹងបើយើងមិនចូលរួមមិនបានទេ៕
ចែករំលែកព័តមាននេះ