ប្រទេសកូរ៉េខាងត្បូង ៖ កងទ័ពអាកាសកូរ៉េខាងត្បូងរាយការណ៍ថា យន្តហោះប្រយុទ្ធមួយគ្រឿងរបស់កូរ៉េខាងត្បូង បានធ្លាក់នាថ្ងៃទី២៧កុម្ភៈក្នុងសមុទ្រលឿង ហើយអ្នកបើក២នាក់បានត្រូវជួយសង្គ្រោះ។ ក្នុងសារមួយផ្ដល់ដល់សារព័ត៌មាន កងទ័ពអាកាសនិយាយថា យន្តហោះប្រយុទ្ធធុនKF-16Dមានកៅអី២ បានធ្លាក់ទៅក្នុងសមុទ្រដែលពុំទាន់ដឹងពីមូលហេតុ នាវេលាម៉ោង១២និង១៣នាទីម៉ោងក្នុងស្រុក ១៣នាទីក្រោយហោះចេញពីមូលដ្ឋានអាកាសចរណ៍GUNSAN ចម្ងាយ២៧៤គីឡូម៉ែត្រខាងត្បូងក្រុងសេអ៊ូល។
អ្នកបើកទាំង២នាក់អាចលោតចេញភ្លាមៗហើយត្រូវបានជួយសង្គ្រោះ។ អ្នកទាំង២បច្ចុប្បន្នវិលទៅកាន់មូលដ្ឋានរបស់ពួកគេវិញ ហើយស្ថានភាពសុខភាពរបស់ពួកគេត្រូវបានបញ្ជាក់ថាល្អ។ កងទ័ពអាកាសបានបង្កើតក្រុមការងារមួយ ទទួលបន្ទុកត្រួតពិនិត្យលើមូលហេតុនៃគ្រោះថ្នាក់នោះ។
យន្តហោះប្រយុទ្ធធុនKF-16Dបានផ្ដល់ឲ្យកងទ័ពអាកាសកូរ៉េខាងត្បូងប្រើប្រាស់កាលពីទសវត្សឆ្នាំ៩០៕
ចែករំលែកព័តមាននេះ