រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានកោតសរសើរចំពោះចំណាត់ការរបស់មត្ថកិច្ចក្នុងការបង្ក្រាបគ្រឿងញៀន នៅក្នុងក្លឹបកម្សាន្តរ៉ុក ។ សម្តេច ស ខេង បានសរសេរលើបណ្តាញសង្គមយ៉ាងដូច្នេះថា«ខ្ញុំសូមកោតសរសើរដោយស្មោះចំពោះកិច្ចខិតខំប្រឹងប្រឹងក្នុងស្មារតីទទួលខុសត្រូវខ្ពស់របស់ស្នងការដ្ឋាននគរបាលរាជធានីភ្នំពេញដែលបានធ្វើប្រតិបត្តិការបង្ក្រាបបទល្មើសគ្រឿងញៀននៅមជ្ឈមណ្ឌលកម្សាន្តរ៉ុក កាលពីថ្ងៃទី២៣ ខែកុម្ភៈ ឆ្នាំ២០១៩ កន្លងទៅនេះ ដោយរឹបអូសបានវត្ថុតាងថ្នាំញៀនជាច្រើនគីឡូក្រាម និងបានឃាត់ខ្លួនជនសង្ស័យមួយចំនួនផងដែរ» ។
សម្តេចបន្តថា បន្ទាប់ពីការបង្ក្រាបដោយជោគជ័យរបស់កងកម្លាំងនគរបាលលើករណីនេះក៏បានកើតមានពាក្យចចាមអារាមថា ករណីបទល្មើសគ្រឿងញៀននេះមានការពាក់ព័ន្ធនឹងបុគ្គលផ្សេងៗដែលខ្ញុំសូមយកឱកាសនេះជម្រាបជូនសាធារណជន និងប្រជាពលរដ្ឋទាំងអស់ជ្រាបថា តាមរយៈការស៊ើបអង្កេតយ៉ាងយកចិត្តទុកដាក់មកដល់ពេលនេះសមត្ថកិច្ចរកពុំឃើញភស្តុតាងណាមួយបញ្ជាក់ថា មានការពាក់ព័ន្ធនឹងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជានោះទេ ។
សូមជម្រាបថា លោក ស ថេត ស្នងការរាជធានីភ្នំពេញ កាលពីថ្ងៃទី២៣ កុម្ភៈ បានដឹកនាំកម្លាំងចុះបង្ក្រាបអ្នកប្រើប្រាស់គ្រឿងញៀន នៅក្នុងក្លឹបកម្សាន្តរ៉ុក ។ លោកស្នងការបានសរសេរលើបណ្តាញសង្គមយ៉ាងដូច្នេះ ខ្ញុំ និងស្នងការរងជាច្រើនរូបព្រមទាំងកម្លាំងជំនាញចម្រុះ បានចុះបង្ក្រាបគ្រឿងញៀនទ្រង់ទ្រាយធំដោយផ្ទាល់ នៅមជ្ឈមណ្ឌលកម្សាន្តរ៉ុកដោយឃាត់ខ្លួនជនសង្ស័យអ្នកប្រើប្រាស់ និងអ្នកចែកចាយជាង៣០០នាក់ ក្នុងនោះមានជនជាតិចិន១៤នាក់ ហើយដកហូតបានគ្រឿងញៀនជាង៣៩គីឡូក្រាម និងសារធាតុញៀនជាទឹក៩គីឡូក្រាម២ខាំ ជញ្ជីងថ្លឹងគ្រឿងញៀន១២ និងកាំភ្លើងខ្លី១ដើម ។
លោងស្នងការក៏បានលើកឡើងថា ការធ្វើតេស្តទឹកនោមរកសារធាតុញៀន និងធ្វើកំណត់ហេតុទៅលើយុវជនយុវនារីជាង៣០០នាក់កំពុងតែដំណើរការនៅស្នងការដ្ឋាននគរបាលរាជធានីភ្នំពេញ ហើយភាគច្រើនសុទ្ធតែរកឃើញមានសារធាតុញៀននៅក្នុងខ្លួន ។ សមត្ថកិច្ចជំនាញកំពុងមមាញឹកបំពេញការងារនេះ ហើយសន្និសីទកាសែតនឹងធ្វើនៅពេលការងារបញ្ចប់ ។ ចំពោះគ្រឿងញៀនគ្រប់ប្រភេទដែលដកហូតបានសរុបទៅមិនតិចជាង៥០គីឡូក្រាមឡើយ ៕
ចែករំលែកព័តមាននេះ