ខេត្តកំពង់ធំ ៖ អគ្គិភ័យបានឆាបឆេះចំការកៅស៊ូអស់ចំនួន៣០ហិតា បានកើតឡើងកាលពីវេលាម៉ោង១និង៣០នាទីរសៀលថ្ងៃទី២៤ ខែកុម្ភៈ ឆ្នាំ២០១៩ ដែលមានទីតាំងស្ថិតក្នុងភូមិស្រែស្រម៉ ឃុំទីពោ ស្រុកសន្ទុក ខេត្តកំពង់ធំ…
ខេត្តកំពង់ធំ ៖ អគ្គិភ័យបានឆាបឆេះចំការកៅស៊ូអស់ចំនួន៣០ហិតា បានកើតឡើងកាលពីវេលាម៉ោង១និង៣០នាទីរសៀលថ្ងៃទី២៤ ខែកុម្ភៈ ឆ្នាំ២០១៩ ដែលមានទីតាំងស្ថិតក្នុងភូមិស្រែស្រម៉ ឃុំទីពោ ស្រុកសន្ទុក ខេត្តកំពង់ធំ ។
លោក ទូច សុខា អភិបាលស្រុកសន្ទុកបានឱ្យដឹងថា នៅពេលមានករណីអគ្គិភ័យឆេះចំការកៅស៊ូខាងលើ លោកជាប់រវល់នៅឯទីក្រុងភ្នំពេញ មិនបានចុះទៅដល់កន្លែងកើតហេតុផ្ទាល់នោះទេ តែបើតាមសេចក្តីរាយការណ៍ពីថ្នាក់ក្រោមដែលលោកទទួលបានគឺចំការកៅស៊ូកើតហេតុខាងជារបស់ក្រុមហ៊ុន BNA ត្រូវអគ្គិភ័យឆាបឆេះអស់ចំនួន៣០ហិកតា មូលហេតុបណ្តាលមកពីភ្លើងព្រៃឆេះរាល ។
លោកអភិបាលស្រុកសន្ទុកបានបន្តថា បើចង់ដឹងព័ត៍មានច្បាស់ សូមទំនាក់ទំនងទៅលោកអធិការស្រុកទើបបានដឹងច្បាស់ ព្រោះលោកអធិការស្រុកបានចុះទៅដល់ចំការកៅស៊ូកើតហេតុខាងលើ ។
តាមប្រភពពីលោកវរសេនីយ៍ឯក ពេជ ថាល់ អធិការនគរបាលស្រុកសន្ទុក បានឱ្យកោះសន្តិភាពដឹងតាមទូរស័ព្ទនៅព្រឹកថ្ងៃទី២៥ ខែកុម្ភៈ ឆ្នាំ២០១៩ នេះថា លោកមិនបានដឹងថា ក្រុមហ៊ុន BNA ខាងលើនេះវិនិយោគនៅលើផ្ទៃដីប៉ុន្មានហិកតានោះទេ ពីព្រោះក្រុមហ៊ុននេះមានដីជាច្រើនកន្លែង ចំណែកករណីអគ្គិភ័យឆាបឆេះចំការកៅស៊ូខាងលើអស់ចំនួន៣០ហិតា ។
តាមប្រភពដដែលបានបន្តថា ចំការកៅស៊ូខាងលើនោះគឺក្រុមហ៊ុនដាក់ដាំចោលដោយគ្មានការថែទាំដូចក្រុមហ៊ុនដទៃទៀតនោះឡើយ ធ្វើឲ្យស្មៅ និងព្រៃដុះពេញ បណ្តាលឲ្យភ្លើងឆេះព្រៃរាលដាលដល់ចំការកៅស៊ូដោយមិនដឹងមូលហេតុ ហើយត្រូវបានកម្លាំងសមត្ថកិច្ចយកមែកឈើវាយពន្លត់រលត់អស់ទាំងស្រុងមិនបង្កឲ្យឆេះរាលដាលទៀតឡើយ ចំណែករថយន្តអគ្គិភ័យរបស់អធិការដ្ឋាននគរបាលស្រុកសន្ទុកចេញមកជួយអន្តរាគមន៍ដែរ តែមិនបានមកទាន់ពេលវេលានោះទេ ដោយសារផ្លូវតូចចង្អៀត ។
លោកអធិការបន្តទៀតថា ករណីអគ្គិសភ័យឆាបឆេះចំការកៅស៊ូខាងលើនេះសង្ស័យបណ្តាលមកពីអ្នកជក់បារីបោះកន្ទុយបារីចោលមិនប្រយ័ត្នទើបធ្វើឲ្យឆេះ ព្រោះនេះជារដូវក្តៅ ។ ជុំវិញករណីអគ្គិភ័យឆាបឆេះចំការកៅស៊ូខាងលើ សមត្ថកិច្ចកំពុងតែបន្តធ្វើការស្រាវជ្រាវរកមូលហេតុពិតប្រាកដ ៕
ចែករំលែកព័តមាននេះ