ខេត្តមណ្ឌលគិរី ៖ ទីតាំងល្បែងស៊ីសងក្នុងចម្ការស្រល់មួយកន្លែង ស្ថិតនៅក្នុងភូមិពូត្រែង ឃុំដាក់ដាំ ស្រុកអូររាំង កំពុងបើកឲ្យជនជាតិខ្មែរចូលលេងម៉ាសេរីជារៀងរាល់ថ្ងៃ ចាប់តាំងពីដើមខែកុម្ភៈមក ដោយបើកលេងល្បែងជាច្រើនមុខជ្រកក្រោមស្លាកស្រមោលកាស៊ីណូ ។…
ខេត្តមណ្ឌលគិរី ៖ ទីតាំងល្បែងស៊ីសងក្នុងចម្ការស្រល់មួយកន្លែង ស្ថិតនៅក្នុងភូមិពូត្រែង ឃុំដាក់ដាំ ស្រុកអូររាំង កំពុងបើកឲ្យជនជាតិខ្មែរចូលលេងម៉ាសេរីជារៀងរាល់ថ្ងៃ ចាប់តាំងពីដើមខែកុម្ភៈមក ដោយបើកលេងល្បែងជាច្រើនមុខជ្រកក្រោមស្លាកស្រមោលកាស៊ីណូ ។ គេសង្កេតឃើញមានពលរដ្ឋខ្មែររាប់រយនាក់បានសម្រុកទៅលេងល្បែងនៅក្នុងកាស៊ីណូមួយនេះ ដែលស្ទើរតែគ្មានវត្តមានជនបរទេសសូម្បីតែម្នាក់ ។
មិនត្រឹមតែប៉ុណ្ណោះ បនល្បែងនេះបានបើកដំណើរការនៅជិតភូមិឋានប្រជាពលរដ្ឋដែលនៅឆ្ងាយពីព្រំដែន ទោះបីច្បាប់មិនអនុញ្ញាតឲ្យមានការលេងល្បែងភ្នាល់់នៅក្នុងស្រុកក្តី ប៉ុន្តែបនល្បែងនេះបែរជាអាចបើកលេងយ៉ាងរំភើយទៅវិញដូចស្រុកអត់ច្បាប់ ។ យោងតាមលិខិតរបស់ទីស្តីការគណៈរដ្ឋមន្ត្រីលេខ១៧៧៤សជណ ចុះថ្ងៃទី៣១ ខែធ្នូ ឆ្នាំ២០១៤ ស្តីពីការសុំអនុញ្ញាតជាគោលការណ៍សាងសង់មជ្ឈមណ្ឌលកម្សាន្តឈ្មោះ Resort Of Mondulkiri Entertainement Co.,Ltd រួមមានសណ្ឋាគារខ្នាតអន្តរជាតិ ហាងលក់ទំនិញរួចពន្ធ ភោជនីយដ្ឋាន មជ្ឈមណ្ឌលកម្សាន្តនា នា រង្គសាលទាន់សម័យ ហាងម៉ាស្សា ខារ៉ាអូខេ កីឡាវាយកូនហ្គោល បក្សីកីឡា ប្រណាំងសេះ-ឆ្កែ ឆ្នោតផ្សងសំណាង ល្បែងអនឡាញតាមប្រព័ន្ធអុីនធើរណេត ម៉ាស៊ីនអេឡិចត្រូនិកគ្រប់ប្រភេទតាមប្រព័ន្ធអុីនធើណេតក្នុងនិងក្រៅប្រទេស កីឡាភ្នាល់គ្រប់ប្រភេទ និងក្លិបកម្សាន្តគ្រប់ប្រភេទ គឺមានលក្ខណៈអចិន្ត្រៃយ៍ដែលរដ្ឋទទួលស្គាល់ ។ ប៉ុន្តែអ្វីៗដែលមានក្នុងច្បាប់សុំនោះមានតែស្រមោលប៉ុណ្ណោះមិនខុសពីបោកប្រាស់ច្បាប់ដែលយល់ព្រមនោះឡើយ ។
តាមលិខិតខាងលើ គឺទីតាំងមជ្ឈមណ្ឌលនេះស្ថិតនៅច្រកព្រំដែនដាក់ដាំ ក្នុងឃុំដាក់ដាំ ស្រុកអូររាំង ខេត្តមណ្ឌលគិរី ព្រំប្រទល់កម្ពុជា-វៀតណាម តែគេបែរជាឃើញលិខិតមួយស្នើសុំទៅអភិបាលខេត្តមណ្ឌលគិរី សុំអនុញ្ញាត ច្បាប់សាងសង់ និងបើកដំណើរការមជ្ឈមណ្ឌលកម្សាន្តនៅភូមិពូត្រែង ឃុំដាក់ដាំ ស្រុកអូររាំង ដែលមានចម្ងាយជាង១០គីឡូម៉ែត្រពីព្រំដែនកម្ពុជា-វៀតណាមទៅវិញ និងទើបចុះកាលបរិច្ឆេទនៅថ្ងៃទី៨ ខែកុម្ភៈ ឆ្នាំ២០១៩ សើមៗនេះកោតថ្នាក់ក្រោមជាតិយល់ព្រមកើតដែរ ។
ប្រភពព័ត៌មានបានរាយការណ៍ថា កាស៊ីណូធ្វើតែរោងដែកប្រក់សង្កសី ដែលកំពុងបើកដំណើរការលេងក្នុងទីតាំងខាងលើនេះធ្វើសកម្មភាពផ្ទុយពីច្បាប់អនុញ្ញាត ដែលទីស្ដីការគណៈរដ្ឋមន្ត្រីសម្រេចឲ្យ ដោយត្រូវធ្វើការសាងសង់សំណង់កាសុីណូនៅព្រំដែនដាក់ដាំ មិនមែននៅទីនេះទេ ។ ប៉ុន្តែម្ចាស់ទីតាំងនេះ បានទៅធ្វើកាស៊ីណូនៅជិតភូមិអ្នកស្រុក និងអនុញ្ញាតឲ្យជនជាតិខ្មែរចូលលេងម៉ាសេរី មានតាំងពីល្បែងបញ្ជល់មាន់ អាប៉ោង យូគី ដែលផ្ទុយពីច្បាប់អនុញ្ញាតទៅវិញ ។
មិនត្រឹមតែប៉ុណ្ណោះ ម្ចាស់កាស៊ីណូនេះមិនបានគោរពទៅតាមគោលការណ៍ដែលច្បាប់បានអនុញ្ញាតទេ ដោយគេគ្រាន់តែសាងសង់រោងបញ្ជល់មាន់មួយកន្លែងសម្រាប់ភ្នាល់ ដោយគេមិនបានសាងសង់សំណង់តាមលិខិតស្នើសុំរបស់ខ្លួនឡើយ ៕
ចែករំលែកព័តមាននេះ