រាជធានីភ្នំពេញ ៖ប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានប្រកាសដាក់ទិសដៅឆ្នាំ២០១៩នេះ ការអភិវឌ្ឍ និងវិយោគផ្សេងៗនឹងចេញពីទីក្រុងភ្នំពេញ ឆ្ពោះទៅកាន់បណ្តាលខេត្តនានានៅទូទាំងប្រទេសកម្ពុជា ។
ក្នុងពិធីអញ្ជើញជួបសំណេះសំណាលជាមួយបងប្អូនកូនក្មួយកម្មករ កម្មការិនីជាង១ម៉ឺននាក់ មកពីរោងចក្រ សហគ្រាសចំនួន៣៤ នៅមជ្ឈមណ្ឌលពាណិជ្ជកម្ម Chengdu Bayi (Cambodia) ស្ថិតនៅភូមិព្រៃរកា ឃុំឆក់ឈើនាង ស្រុកអង្គស្នួល ខេត្តកណ្តាល កាលពីថ្ងៃទី ២០ ខែកុម្ភៈ ម្សិលមិញ សម្តេចតេជោនាយករដ្ឋមន្ត្រី បានសម្តែងមោទនភាពយ៉ាងខ្លាំង ចំពោះភាពរីកចម្រើននៃវិស័យឧស្សាហកម្មកម្ពុជា ក្នុងរយៈពេលប៉ុន្មានឆ្នាំចុងក្រោយនេះ ស្របពេលដែលរាជរដ្ឋាភិបាលកំពុងតែជំរុញនូវគោលនយោបាយអភិវឌ្ឍន៍វិស័យឧស្សាហកម្ម (២០១៥-២០២៥) ឲ្យកាន់តែមានប្រសិទ្ធភាពខ្ពស់ ។
សម្តេចតេជោ ថ្លែងថា ៖«ឆ្នាំនេះ ជាឆ្នាំដែលរាជរដ្ឋាភិបាលកំពុងតែតម្រង់ទិសការអភិវឌ្ឍ និងវិនិយោគផ្សេងៗពីទីក្រុងភ្នំពេញ ឆ្ពោះទៅកាន់បណ្តាលខេត្តនានា ដែលទាំងនេះ គឺទាមទាឲ្យយើងកសាងនូវហេដ្ឋារចនាសម្ព័ន្ធចាំបាច់នានាឲ្យបានច្រើន ដូចជាផ្លូវតភ្ជាប់ជាដើម »។ សម្តេចបន្តថា ៖« ជាក់ស្តែងដូចជាផ្លូវជាតិលេខ៤ និងផ្លូវជាតិលេខ៣ ដែលពេលនេះមានរោងចក្រ និងសហគ្រាកើនឡើងជាច្រើនសន្ធឹកសន្ធាប់ ដែលបានផ្តល់ការងារយ៉ាងច្រើនដល់កូនក្មួយកម្មករ កម្មការិនីរបស់យើង »។
សម្តេចតេជោនាយករដ្ឋមន្ត្រី មានប្រសាសន៍ផងដែរថា កម្ពុជាមិនពឹងផ្អែកតែវិស័យកសិកម្មមួយមុខនោះទេ យើងត្រូវពឹងផ្អែកលើវិស័យផ្សេងៗសំខាន់ៗជាច្រើនទៀតដូចជា វិស័យឧស្សាហកម្ម សេវាកម្មទេសចរណ៍ និងកសិ ឧស្សាហកម្មដែលមានការកែច្នៃផលិតផលកសិកម្មផ្សេងៗក្នុងការនាំចេញទៅកាន់ទីផ្សារអន្តរជាតិ៕
ចែករំលែកព័តមាននេះ