ប្រទេសស៊ីរី ៖ ទីភ្នាក់ងារព័ត៌មានស៊ីរីSANAរាយការណ៍នាថ្ងៃទី១៧កុម្ភៈថា បណ្ដាឧទ្ធម្ភាគចក្រនៃកងទ័ពអាមេរិក បានដឹកចេញប្រអប់មាសធំៗ ដែលក្រុមរដ្ឋអិុស្លាមប្លន់យកពីណាពីណីមក នៅអីុរ៉ាក់ក៏ដូចជានៅស៊ីរី។
តាមSANAថាកងទ័ពអាមេរិកដែលមានវត្តមាននៅស៊ីរី បានប្រើបណ្ដាឧទ្ធម្ផាគចក្រដើម្បីដឹកដុំមាស ដែលប្រមូលទុកដោយក្រុមរដ្ឋអិុស្លាម។ ទីភ្នាក់ងារនោះបានរាយការណ៍ដោយយោងតាម ប្រភពមូលដ្ឋាននានាដែលរៀបរាប់ថា ប្រអប់ជាច្រើនដាក់ពេញដោយមាស ដែលក្រុមរដ្ឋអ៊ិស្លាមប្លន់យកមកពីគ្រប់ទិសទី ហើយយកមកទុក ក្នុងតំបន់AL DACHICHA ស្ថិតក្នុងខេត្តហាស់សាកេភាគឦសានស៊ីរី។
យោងតាមប្រភពទាំងនោះថា បណ្ដាប្រអប់មាស មានមាសក្នុងចំនួនច្រើនដែលក្រុមរដ្ឋអិុស្លាមបញ្ជូនមកទុកនៅAL DACHICHA ពីទីក្រុងម៉ូស៊ុលអីុរ៉ាក់ ព្រមទាំងពីតំបន់ស៊ីរីទាំងឡាយ។
តាមSANAដដែល បណ្ដាឧទ្ធម្ភាគចក្ររបស់កងទ័ពអាមេរិក បានចុះនៅAL DACHICHA ព្រមទាំងនៅហាដជីនតំបន់ខេត្តDEIR EZ ZOR ភាគអាគ្នេយ៍ ដោយក្នុងឧទ្ធម្ភាគចក្រទាំងនេះមានដឹកមេដឹកនាំច្រើននាក់របស់ក្រុមរដ្ឋអិុស្លាម ដែលចុះចូលជាមួយអាមេរិក។ សម្រាប់SANAថា ក្រុងវ៉ាស៊ិនតោនបានចុះហត្ថលេខាជាមួយពួកជីហាដ លើកិច្ចព្រមព្រៀងមួយ ដែលអាចជួយសង្គ្រោះជីវិតប្រមុខសង្គ្រាមនិងអ្នកជំនាញការក្រុមរដ្ឋអ៊ិស្លាមជាច្រើនរយនាក់៕
ចែករំលែកព័តមាននេះ