ខេត្តបាត់ដំបង ៖ សេចក្តីរាយការណ៍បន្តថា បើតាមការសន្និដ្ឋានបឋមពីសមត្ថកិច្ចដឹងទៀតថា ចំពោះការខូចខាតដែលធ្ងន់ធ្ងរជាងគេក្នុងហេតុការណ៍ខ្យល់កន្ត្រាក់នោះ គឺឃ្លាំងស្ដុកកសិផលនិងសម្ភារៈនានា នៅក្នុងឃ្លាំងរបស់លោកហែម ថ្លៃថ្លា (ជាម្ចាស់ឃ្លាំង) គឺបានខូចខាតដែលសរុបទឹកប្រាក់មានរហូតដល់ទៅរាប់សិបម៉ឺនដុល្លារឯណោះ…
ខេត្តបាត់ដំបង ៖ សេចក្តីរាយការណ៍បន្តថា បើតាមការសន្និដ្ឋានបឋមពីសមត្ថកិច្ចដឹងទៀតថា ចំពោះការខូចខាតដែលធ្ងន់ធ្ងរជាងគេក្នុងហេតុការណ៍ខ្យល់កន្ត្រាក់នោះ គឺឃ្លាំងស្ដុកកសិផលនិងសម្ភារៈនានា នៅ
ក្នុងឃ្លាំងរបស់លោកហែម ថ្លៃថ្លា (ជាម្ចាស់ឃ្លាំង) គឺបានខូចខាតដែលសរុបទឹកប្រាក់មានរហូតដល់ទៅរាប់សិបម៉ឺនដុល្លារឯណោះ ។
គួររំលឹកថា លំនៅឋានប្រជាពលរដ្ឋប្រមាណ២០ខ្នង និងឃ្លាំងស្ដុកកសិផលដ៏ធំមួយខ្នងទៀត រួមទាំងសម្ភារនៅក្នុងឃ្លាំងនេះជាច្រើនផង ត្រូវបានរងការខូចខាតស្ទើរទាំងស្រុង ដោយសារតែខ្យល់កន្ត្រាក់ខែប្រាំងបានវាយប្រហារក្នុងរយៈពេលខ្លី កាលពីវេលាម៉ោង០៣ និង៤០នាទីរសៀលថ្ងៃទី១៧កុម្ភៈ ស្ថិតលើភូមិតាក្រី ឃុំតាក្រី ស្រុកកំរៀង តែមិនបង្កគ្រោះថ្នាក់ដល់មនុស្សនោះទេ ។
អធិការនគរបាលស្រុកកំរៀង លោកគឹម ពន្លក បានផ្ដល់ព័ត៌មាននេះក្រោយពេលកើតហេតុថា ខ្យល់
កន្ត្រាក់បានកើតឡើងយ៉ាងខ្លាំងក្លាក្នុងរយៈពេលដ៏ខ្លី ជាមួយនិងភ្លៀងរលឹមមួយប្រាវប៉ុណ្ណោះ ហើយក៏
វាយប្រហារយ៉ាងគំហុក មកលើផ្ទះប្រជាពលរដ្ឋនៅក្នុងភូមិតាក្រី ឃុំតាក្រី ខណៈភូមិដទៃទៀត មិនប៉ះពាល់ទេ ។ លោកអធិការបន្តថា ខ្យល់កន្ត្រាក់ខុសរដូវនេះ បានបំផ្លាញឃ្លាំងស្ដុកកសិផល(សៃឡូ)មួយខ្នង និងផ្ទះរបស់ប្រជាពលរដ្ឋអស់ចំនួន២០ខ្នង ក្នុងនោះចំនួន១៥ខ្នងរបើកដំបូល និងចំនួន៥ខ្នងទៀត ខូចខាតទាំងស្រុង តែមិនបង្កគ្រោះថ្នាក់ដល់មនុស្សទេ។
ដោយឡែក ចំពោះឃ្លាំងស្ដុកកសិផលឬសៃឡូ ដែលរងការខូចខាតដែរនេះ បើតាមរបាយការណ៍សមត្ថកិច្ច គឺឃ្លាំងមានទំហំ៣០ម៉x៦០ម៉ ធ្វើពីថ្មដែក និងប្រក់ស័ង្កសី ដែលមានម្ចាស់ឈ្មោះហែម ថ្លៃថ្លា ភេទប្រុស អាយុ៥២ឆ្នាំ ។ កម្លាំងខ្យល់កន្ត្រាក់ខុសរដូវនេះ បានវាយកម្ទេចឃ្លាំងស្ដុកកសិផលដ៏ធំមួយនេះបណ្ដាលឲ្យខូចខាតទាំងស្រុង ខណៈសម្ភារនៅក្នុងឃ្លាំងនេះក៏ត្រូវខូចខាតស្ទើរទាំងស្រុកដែរ។ នេះបើតាមសេចក្ដីរាយការណ៏របស់សមត្ថកិច្ច។
សម្ភារដែលរងការខូចខាតជាមួយឃ្លាំងនេះ បើតាមលោកហែម ថ្លៃថ្លា ដែលជាម្ចាស់ឃ្លាំងបានរាយការណ៍ប្រាប់សមត្ថកិច្ចថា សម្ភារខូចខាតរួមមានរថយន្តឡង់គ្រីស្ស័រ១គ្រឿង, គោយន្តកន្ត្រៃ៣គ្រឿង, ម៉ូតូ១គ្រឿង, ត្រាក់ទ័រ៣គ្រឿង, ម៉ាស៊ីនកិនដំឡូង៣គ្រឿង, ម៉ាស៊ីនបូមទឹក៥គ្រឿង, ម៉ាស៊ីនសម្រាប់បាញ់ថ្នាំចំនួន១០គ្រឿង, ឡសម្ងួតកសិផលចំនួន៣, ដំឡូងស្រស់៦០តោន និងស្រូវចំនួន២០តោន។
ជុំវិញគ្រោះធម្មជាតិខាងលើនេះ បើតាមអ្នកភូមិបាននិយាយថា ប៉ុន្មានថ្ងៃកន្លងទៅនេះ អាកាសធាតុហាក់ក្ដៅស្អុះស្អាប់ចម្លែកខុសប្រក្រតី បន្ទាប់មក ក៏ស្រាប់តែមានខ្យល់ព្យុះវាយប្រហារយ៉ាងកំហុកតែម្ដង ដែលគ្មាននរណានឹកស្មានដល់ ។ អ្នកភូមិបានបញ្ជាក់ថា ខ្យល់កន្ត្រាក់នោះបានវាយប្រហារយ៉ាងខ្លាំង ក្នុងរយៈពេលតែប៉ុន្មាននាទីប៉ុណ្ណោះ ។ ស្រាប់តែធ្វើឲ្យខូចខាតលំនៅឋានប្រជាពលរដ្ឋអស់ជាច្រើនខ្នង តែមិនមានភ្លៀងធ្លាក់ធំដុំទេ គ្រាន់តែរលឹមតិចៗតែប៉ុណ្ណោះ ។
ទោះជាយ៉ាងណា បើតាមមន្ត្រីរដ្ឋបាលខេត្តឱ្យដឹងថា ពេលនេះ អាជ្ញាធរនិងមន្ត្រីជំនាញបាននិងកំពុងចុះទៅកាន់ទីតាំង ដែលទទូលរងគ្រោះដោយខ្យល់កន្ត្រាក់នោះហើយ ដើម្បីពិនិត្យ និងផ្ដល់ជំនួយសង្គ្រោះបឋមដល់គ្រួសាររងគ្រោះ ។ ប៉ុន្តែអាជ្ញាធរនូវមិនទាន់វាយតំលៃជាក់លាក់អំពីទំហំ នៃការខូចខាតនៅឡើយទេ ។
ចែករំលែកព័តមាននេះ