រាជធានីភ្នំពេញ ៖ ខណៈដែលភ្ញៀវទេសចរអន្តរជាតិមកទស្សនាកម្ពុជា កាន់តែមានការកើនឡើងជាលំដាប់នោះ ប្រទេសកម្ពុជាត្រូវបានគេមើលឃើញថា កំពុងយកចិត្តទុកដាក់ជំរុញការលើកកម្ពស់ស្តង់ដាអនាម័យម្ហូបអាហារ ដើម្បីរួមចំណែកក្នុងការទាក់ទាញភ្ញៀវទេសចរ ។ រដ្ឋមន្ត្រីក្រសួងទេសចរណ៍ លោកបណ្ឌិត…
រាជធានីភ្នំពេញ ៖ ខណៈដែលភ្ញៀវទេសចរអន្តរជាតិមកទស្សនាកម្ពុជា កាន់តែមានការកើនឡើងជាលំដាប់នោះ ប្រទេសកម្ពុជាត្រូវបានគេមើលឃើញថា កំពុងយកចិត្តទុកដាក់ជំរុញការលើកកម្ពស់ស្តង់ដាអនាម័យម្ហូបអាហារ ដើម្បីរួមចំណែកក្នុងការទាក់ទាញភ្ញៀវទេសចរ ។
រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន បានថ្លែងថា ក្រសួងនិងគណៈកម្មាធិការជាតិវាយតម្លៃទីក្រុងស្អាត គ្រោងនឹងស្នើរាជរដ្ឋាភិបាលសុំដាក់បញ្ចូលស្ដង់ដាវិថីម្ហូបអាហារ (Food Street) និងស្ដង់ដាតូបលក់ម្ហូបអាហារ ចូលទៅក្នុងចលនាប្រឡងប្រណាំងទីក្រុងស្អាត ។ លោករដ្ឋមន្ត្រីថ្លែងថា ៖« ការដាក់បញ្ចូលស្តង់ដាទាំង២នេះ គឺដើម្បីលើកកម្ពស់ស្តង់ដាអនាម័យម្ហូបអាហារនៅកម្ពុជា ដែលជាសក្ដានុពលដ៏សំខាន់មួយក្នុងការទាក់ទាញភ្ញៀវទេសចរ »។
ការបញ្ជាក់របស់លោករដ្ឋមន្ត្រីបែបនេះ ត្រូវបានធ្វើឡើងក្នុងកិច្ចប្រជុំគណៈកម្មការជាតិវាយតម្លៃទីក្រុងស្អាត ដើម្បីត្រៀមរៀបចំទិវាជាតិទីក្រុងស្អាតលើកទី៧ ក្រោមប្រធានបទ « ទីក្រុងស្អាត៖ ទីក្រុងផ្តល់ភាពកក់ក្តៅ » នាថ្ងៃទី១១ ខែកុម្ភៈ ឆ្នាំ២០១៩ នៅទីស្ដីការក្រសួង ទេសចរណ៍ ។
លោករដ្ឋមន្ត្រី ថោង ខុន បានឱ្យដឹងថា ស្ដង់ដាវិថីម្ហូបអាហារ និងស្ដង់ដាតូបលក់ម្ហូបអាហារ (ទាំងចល័ត និងអចល័ត) នឹងក្លាយជាផ្នែកមួយដ៏សំខាន់ក្នុងការចូលរួមលើកកម្ពស់គោលដៅ ទេសចរណ៍កម្ពុជា ក៏ដូចជាលើកកម្ពស់សេវាកម្មម្ហូបអាហារផង និងលើកកម្ពស់ សុវត្ថិភាព អនាម័យម្ហូបអាហារជូនប្រជាពលរដ្ឋ និងភ្ញៀវទេសចរផងដែរ ។ ទន្ទឹមនោះ ក៏នឹងចូលរួមផងដែរដល់ការលើកកម្ពស់សោភ័ណភាពទីក្រុង លើកកម្ពស់ភាពស្អាត និងបៃតងនៅ តាមក្រុង-ស្រុក និងទីប្រជុំជននានានៃរាជធានី-ខេត្តគោលដៅទេសចរណ៍ទៀត ផង ។ ប្រជាពលរដ្ឋ និងភ្ញៀវទេសចរដែលបានទទួលទានអាហារដែលឆ្លងកាត់ការរៀបចំស្ដង់ដា វិថីម្ហូបអាហារនេះ នឹងទទួលបាននូវភាពកក់ក្ដៅជឿទុកចិត្តបាន ។
លោករដ្ឋមន្ត្រីបញ្ជាក់បន្ថែមថា ស្ដង់ដាវិថីម្ហូបអាហារ និងស្ដង់ដាតូបលក់ម្ហូបអាហារ នឹងលើកកម្ពស់ជីវភាព សុខុមាលភាពរបស់ប្រជាពលរដ្ឋ ព្រមទាំងជួយជំរុញអាជីវកម្មខ្នាតតូចបែបគ្រួសារ ឱ្យមានការរីកលូតលាស់ថែមទៀត។ លោករដ្ឋមន្ត្រី មានប្រសាសន៍ថា ៖« នៅពេលគេល្បីតៗគ្នាថា កម្ពុជាមានស្ដង់ដាម្ហូបអាហារល្អត្រឹមត្រូវ មានសុវត្ថិភាព មានអនាម័យត្រឹមត្រូវ នោះហើយគឺជាសក្ដានុពល ថ្មីមួយទៀត ក្នុងការទាក់ទាញភ្ញៀវទេសចរអន្តរជាតិបន្ថែម »។ លោករដ្ឋមន្ត្រី អះអាងថា ដោយមើលឃើញពីសក្តានុពលនោះហើយ ទើបក្រសួង និងគណៈ កម្មាធិការជាតិវាយតម្លៃទីក្រុងស្អាត នឹងស្នើសុំរាជរដ្ឋាភិបាលដើម្បីបញ្ចូលស្ដង់ដាទាំងពីរនេះ ទៅក្នុងសូចនាករចលនាប្រឡងប្រណាំងទីក្រុងស្អាត ។
លោកបញ្ជាក់ថា ៖« តាមគម្រោងនៅពេលរៀបចំទិវាជាតិទីក្រុងស្អាតលើកទី៧ នាថ្ងៃទី២៥ ខែកុម្ភៈ ឆ្នាំ២០១៩ ខាងមុខ គណៈកម្មា ធិការជាតិវាយតម្លៃទីក្រុងស្អាត នឹងប្រកាសដាក់ឱ្យអនុវត្តស្ដង់ដាវិថីម្ហូបអាហារ និងស្ដង់ដា តូបលក់ម្ហូបអាហារនេះ ទៅក្នុងចលនាប្រឡង ប្រណាំងទីក្រុងស្អាតតែម្តង ដើម្បីបំផុសឱ្យ ក្រុងបេក្ខភាពនានា ខិតខំរៀបចំទីក្រុងរបស់ខ្លួនឱ្យកាន់តែលេចធ្លោឡើង »៕
ចែករំលែកព័តមាននេះ