រាជធានីភ្នំពេញ ៖ បុរសចំណាស់ជាជនជាតិអាមេរិកាំងម្នាក់ទំនងជារអិលជើងដួលបោកទៅនឹងឥដ្ឋការ៉ូក្នុងបន្ទប់ទឹក បណ្តាលឱ្យស្លាប់ ខណៈជនរងគ្រោះ និងប្រពន្ធជាជនជាតិហ្វីលីពីនទើបតែនាំគ្នាចូលមកស្នាក់នៅក្នុងផ្ទះសំណាក់បានតែ២ថ្ងៃប៉ុណ្ណោះ ។
ហេតុការណ៍ខាងលើនេះដែរបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៣និង
៣០នាទីរសៀលថ្ងៃទី១២ ខែកុម្ភៈ ឆ្នាំ ២០១៩ នៅចំណុចបន្ទប់ជាន់ទី២ ក្នុងផ្ទះសំណាក់យីហោ
ណាវីន ដែលមានទីតាំងផ្ទះលេខ២៩ (ខាងជើងវាលព្រះមេរ៍) ផ្លូវលេខ១៧៨
ក្នុងសង្កាត់ជ័យជំនះ ខណ្ឌដូនពេញ។
ជនរងគ្រោះដែលស្លាប់ឈ្មោះ WHALEN GAERIE LEONARD ភេទប្រុស អាយុ
៧៩ឆ្នាំជាជនជាតិអាមេរិកាំង និងជាភ្ញៀវទេសចរណ៍ កាន់លិខិតឆ្លងដែនលេខ ៥៤៥៩៣៥២០៤
និងមានប្រពន្ធជាជនជាតិហ្វីលីពីន។
តាមប្រភពព័ត៌មានពីនគរបាលបានប្រាប់ឱ្យដឹងថា ជនរងគ្រោះ និងប្រពន្ធបានចូលមកស្នាក់នៅផ្ទះសំណាក់ខាងលើកាលពីថ្ងៃទី១០ ខែកុម្ភៈ ឆ្នាំ២០១៩ ។ មុនពេលកើតហេតុ ជនរងគ្រោះកំពុងនៅក្នុងបន្ទប់ជាមួយនឹងប្រពន្ធជាជនជាតិហ្វីលីតែ២នាក់តែប៉ុណ្ណោះ ហើយជនរងគ្រោះបានដើរចូលទៅក្នុងបន្ទប់ទឹកនោះ ទំនងជាជនរងគ្រោះចាស់ដើររញីរញ័រ ទើបបណ្តាលអោយរអិលជើងក៏បានដួលបោកខ្លួនទៅនឹងឥដ្ឋការ៉ូស្លាប់បាត់បង់ជីវិតយ៉ាងអាណោចអាធ័មភ្លាមៗតែម្តង រួចក៏បង្កការភ្ញាក់ផ្អើលដល់ម្ចាស់ផ្ទះសំណាក់ខាងលើរាយការណ៍មកកម្លាំងសមត្ថកិច្ចមូលដ្ឋានដើម្បីចុះពិនិត្យកន្លែងកើតហេតុ ។
ក្រោយពេលកើតហេតុ កម្លាំងសមត្ថកិច្ចមូលដ្ឋានបានសហការជាមួយកម្លាំងជំនាញកោសល្យវិច្ច័យរាជធានីភ្នំពេញ
បានចុះមកធ្វើការត្រួតពិនិត្យ និងធ្វើកោសល្យវិច្ច័យលើសព បានរកឃើញថា
ជនរងគ្រោះបានស្លាប់ដោយសារគាំងបេះដូង និងបានបញ្ជូនសពយកទៅតម្កល់ទុកនៅមន្ទីរពេទ្យមិត្តភាពខ្មែរសូវៀត
ដើម្បីរង់ចាំក្រុមគ្រួសារបញ្ជូនយកទៅកាន់ប្រទេសកំណើតវិញផងដែរ ៕
ចែករំលែកព័តមាននេះ