រាជធានីភ្នំពេញ ៖ កាលពីថ្ងៃទី ១១ កុម្ភៈ កន្លងមក សហភាពអឺរ៉ុបបានចេញសេចក្ដីប្រកាសព័ត៌មានមួយថា ខ្លួនបាននិងកំពុងដំណើរការនីតិវិធីក្នុងការព្យួរជាបណ្ដោះអាសន្ននូវប្រព័ន្ធអនុគ្រោះពន្ធលើទំនិញគ្រប់យ៉ាងលើកលែងអាវុធ(EBA)ពីកម្ពុជា ដែលបានបង្កឲ្យមានការព្រួយបារម្ភនិងសោកស្ដាយមជ្ឈដ្ឋានមួយចំនួន បើទោះបីជាការដកហូតនេះ…
រាជធានីភ្នំពេញ ៖ កាលពីថ្ងៃទី ១១ កុម្ភៈ កន្លងមក សហភាពអឺរ៉ុបបានចេញសេចក្ដីប្រកាសព័ត៌មានមួយថា ខ្លួនបាននិងកំពុងដំណើរការនីតិវិធីក្នុងការព្យួរជាបណ្ដោះអាសន្ននូវប្រព័ន្ធអនុគ្រោះពន្ធលើទំនិញគ្រប់យ៉ាងលើកលែងអាវុធ(EBA)ពីកម្ពុជា ដែលបានបង្កឲ្យមានការព្រួយបារម្ភនិងសោកស្ដាយមជ្ឈដ្ឋានមួយចំនួន បើទោះបីជាការដកហូតនេះ មិនទាន់ចាប់ផ្ដើមជាផ្លូវការក៏ដោយ ។
ក្នុងនោះ យោងតាមគេហទំព័រស្ថានទូតសហរដ្ឋអាមេរិក ប្រចាំកម្ពុជា បានបង្ហាញពីកង្វល់របស់ខ្លួន ដែលសហភាពអឺរ៉ុបបាននិងកំពុងដំណើរការនីតិវិធីដកយកប្រព័ន្ធអនុគ្រោះពន្ធពីកម្ពុជា ហើយសហរដ្ឋអាមេរិកក៏បានបញ្ជាក់ថា កម្ពុជានៅតែមានឱកាសក្នុងការទទួលយកនូវប្រព័ន្ធអនុគ្រោះពន្ធនេះពីសហភាពអឺរ៉ុបបន្តទៀត បើសិនជាកម្ពុជាត្រូវផ្លាស់ប្តូរឥរិយាបថមួយចំនួន ។
នៅក្នុងសេចក្តីថ្លែងការណ៍របស់ស្ថានទូតសហរដ្ឋអាមេរិក ប្រចាំកម្ពុជា ក៏បានបញ្ជាក់ច្បាស់ថា ថ្នាក់ដឹកនាំកម្ពុជានៅមានឱកាសនៅឡើយនៅក្នុងការជៀសផុតពីផលវិបាក អវិជ្ជមានផ្នែកសេដ្ឋកិច្ចនៃការដកការអនុគ្រោះពន្ធ EBA ពីព្រោះស្នងការពាណិជ្ជកម្មសហភាពអឺរ៉ុបលោកស្រី Cecilia Malmstrom បាននិយាយថា វាច្បាស់ហើយថា ចំណាត់ការនៅក្នុងពេលនេះ មិនមែនជាការសម្រេចចិត្តចុងក្រោយ ហើយក៏មិនមែនទីបញ្ចប់នៃដំណើរការនីតិវិធីដែរ តែនាឡិកាកំពុងតែដើរទៅមុខជាផ្លូវការហើយ ហើយ EU ត្រូវការឃើញវិធានការពិតប្រាកដ ក្នុងពេលឆាប់ៗនេះ ។
សមាគមរោងចក្រកាត់ដេរសម្លៀកបំពាក់ និងស្បែកជើង កម្ពុជាក៏បានស្នើឲ្យគណៈកម្មការអឺរ៉ុប និងរដ្ឋសមាជិកសហភាពអឺរ៉ុប វាយតម្លៃឲ្យបានហ្មត់ចត់ ថាតើនីតិវិធីបែបនេះដែលអាចនាំឲ្យមានការព្យួរការអនុគ្រោះពន្ធ ក្រោមកម្មវិធីលើគ្រប់មុខទំនិញលើកលែងអាវុធ និងមានលក្ខណៈសមាមាត្រ ហើយពង្រឹងលទ្ធិប្រជាធិបតេយ្យ និងសិទ្ធិមនុស្សក្នុងប្រទេសកម្ពុជាឬអត់ ។
បើតាមលោក ខេន លូ បានលើកឡើងនៅក្នុងសេចក្តីថ្លែងការណ៍របស់សមាគមបានឲ្យដឹងថា ការចូលរួមរបស់សមាគមរោងចក្រកាត់ដេរ នៅក្នុងកម្មវិធីគម្រោងរោងចក្រកាន់តែប្រសើរ នៅកម្ពុជា បានរួមចំណែកដល់ការអភិវឌ្ឍ វប្បធម៌ តម្លាភាព និងអនុលោមភាពទៅតាមស្ដង់ដាពលកម្មការងារអន្តរជាតិ ។ សមាគមនឹងបន្តធ្វើការងារជិតស្និទ្ធជាមួយសមាជិករបស់ខ្លួនដើម្បីកែលម្អឲ្យកាន់តែប្រសើរឡើងចំពោះទំនាក់ទំនងវិជ្ជាជីវៈ តាមរយៈការគាំទ្រធ្វើឲ្យការចុះបញ្ជីការរបស់សហជីព មានលក្ខណៈសាមញ្ញជាងមុន និងមានតម្លាភាពជាងមុននៅតាមគ្រប់រោងចក្រទាំងអស់ ។ ហេតុដូចនេះផ្អែកលើលទ្ធផលរបស់វិស័យកាត់ដេរ សមាគមជឿថាការព្យួរ EBA គឺមិនស័ក្តិសម និងមិនមានហេតុផលគ្រប់គ្រាន់ ។
សេដ្ឋវិទូបណ្ឌិតម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ប្រសិនជាអឺរ៉ុបដកប្រព័ន្ធអនុគ្រោះពន្ធពីកម្ពុជា មែននោះ កម្ពុជាអាចរងផលប៉ះពាល់ ប៉ុន្តែវាក៏ជាពេលដែលកម្ពុជាត្រូវផ្លាស់ប្តូរផ្នត់គំនិត ពីការពឹងផ្អែកលើគេខ្លាំងពេក និងត្រូវខិតខំប្រឹងខ្លួនឯង ។ លោកបណ្ឌិតបានមានប្រសាសន៍ឲ្យដឹងតាមទូរស័ព្ទនាល្ងាចថ្ងៃទី១២ ខែកុម្ភៈ ម្សិលមិញ ថា ៖« រឿងEBA មិនមែនជារឿងថ្មីទេ ហើយបញ្ហាសេដ្ឋកិច្ចវាពាក់ព័ន្ធនយោបាយ កាទូត ហេតុនេះការដែលគេដកEBAយើង មកពីយើងមានបញ្ហា ហើយតែការដកEBAពិតជាកើតមាន គ្រាន់តែមុននិងក្រោយ ដូច្នេះយើងត្រូវតែពឹងផ្អែកខ្លួនឯង និងធ្វើពិពិធកម្មសេដ្ឋកិច្ច របស់យើង »។
លោកបន្តថា ៖« រាជរដ្ឋាភិបាលបានដឹងពីរឿងនេះយូរហើយ ហេតុនេះយើងត្រូវតែពឹងខ្លួនឯង ទោះជាសាកលភាវូបនីយកម្មត្រូវពឹងគ្នាទៅវិញទៅមកក្តី ក៏យើងត្រូវតែប្រឹងដែរ និងមិនត្រូវពឹងផ្អែកលើគេពេកទេ ទាំងជំនួយឥតសំណង ក៏ដូចជាEBA »។ លោកបន្តថា ៖« ក្រសួងសេដ្ឋកិច្ច និងហិរញ្ញវត្ថុបានធ្វើការកែទម្រង់ហើយ ការកែទម្រង់ពិតជាធ្វើឲ្យមានការឈឺចាប់ តែយើងត្រូវតែធ្វើ »។ លោកបណ្ឌិត ម៉ី កល្យាណ បានបន្តថា ការលុបចោលស្ថាប័នមួយចំនួនកាលពីពេលថ្មីៗនេះ ជារឿងរយៈពេលខ្លី តែបញ្ហាចំពោះមុខគឺយើងត្រូវធ្វើការងារសម្រាប់រយៈពេលវែងនៅក្នុងសេដ្ឋកិច្ចរបស់យើង ។ សេដ្ឋកិច្ចរបស់យើងត្រូវតែធ្វើពិពិធកម្ម និងត្រូវតែដោះស្រាយបញ្ហាប្រឈមទាក់ទងផ្លូវ តម្លៃអគ្គិសនី ធនធានមនុស្សដែលជាបញ្ហាជាយូរមកហើយ ៕
ចែករំលែកព័តមាននេះ