តាមប្រភពពី Metroបានឱ្យដឹងថា ក្មេងប្រុសជាសិស្សសាលាអាយុ១៣ឆ្នាំម្នាក់ បានដាច់ចិត្តបញ្ចប់ជីវិតខ្លួនឯង ក្រោយពីទទួលរងការធ្វើបាបផ្លូវចិត្តពីសំណាក់មិត្តភក្តិ ដែលតែងតែបង្អាប់រូបគេពីរាងធាត់ពេក ពាក់វ៉ែនតា និងដាក់ដែកពត់ធ្មេញ ។
ក្មេងប្រុស Michael Martin បានស្លាប់នៅថ្ងៃទី២៥ មករា កន្លងមក ក្រោយពីព្យាយាមសម្លាប់ខ្លួន២ដងរួចមកហើយនោះ ។ រឿងនេះ កើតឡើងក្រោយពីមានមិត្តភក្តិធ្វើបាបផ្លូវចិត្តនៅវិទ្យាល័យ Everett ក្នុងទីក្រុង Lansing រដ្ឋ Michigan សហរដ្ឋអាមេរិក។
ម្តាយរបស់គេ ឈ្មោះ Joanna Wohlfert រន្ធត់ចិត្តជាខ្លាំង ក្រោយពីដឹងថា មានគេធ្វើបាបកូននៅក្នុងសាលា ។ ក្រោយពី Martin បានស្លាប់ មិត្តភក្តិរបស់គេមួយចំនួនបានមកប្រាប់ម្តាយគេថា មានអ្នកធ្វើបាបនៅសាលារៀន ដែលនៅពេលខ្លះដល់ថ្នាក់ ត្រូវគេរុញបុកនឹងជញ្ជាំងទៀតផង ។
នៅមុនពេល Martin ស្លាប់ ម្តាយរបស់គេក៏បានផ្ញើសារទៅសាលា ដើម្បីឱ្យគេជួយដោះស្រាយបញ្ហានេះដែរ។ តែខាងសាលាថា Martin មិនព្រមសហការជាមួយនឹងសាលាសោះ បើទោះបីជាពួកគេខំប្រឹងជួយក៏ដោយ ពោលគឺ Martin មិនប្រាប់ថា មានគេធ្វើបាបនោះទេ ។ ខាងសាលាក៏មិនទាន់អាចនិយាយពីការស្លាប់របស់ Martin បានដែរ ដោយសារតែខាងប៉ូលិសកំពុងតែស៊ើបក្តីនៅឡើយ ។
ចែករំលែកព័តមាននេះ