ខេត្តព្រះវិហារ ៖ មន្ទីរធនធានទឹក និងឧតុនិយមខេត្តព្រះវិហារបានអះអាងថា ឆ្នាំនេះ ខេត្តព្រះវិហារមិនមានការប្រឈមធ្ងន់ធ្ងរចំពោះការខ្វះខាតទឹកប្រើប្រាស់ដូចឆ្នាំមុនៗឡើយ បើទោះបីជាការព្យាករណ៍ថា នៅពេលខាងមុខអាកាសធាតុក្តៅបានហក់ឡើង ធ្វើឲ្យតំបន់ខ្លះប្រឈមការខ្វះទឹកក៏ដោយ ព្រោះបច្ចុប្បន្ននេះ…
ខេត្តព្រះវិហារ ៖ មន្ទីរធនធានទឹក និងឧតុនិយមខេត្តព្រះវិហារបានអះអាងថា ឆ្នាំនេះ ខេត្តព្រះវិហារមិនមានការប្រឈមធ្ងន់ធ្ងរចំពោះការខ្វះខាតទឹកប្រើប្រាស់ដូចឆ្នាំមុនៗឡើយ បើទោះបីជាការព្យាករណ៍ថា នៅពេលខាងមុខអាកាសធាតុក្តៅបានហក់ឡើង ធ្វើឲ្យតំបន់ខ្លះប្រឈមការខ្វះទឹកក៏ដោយ ព្រោះបច្ចុប្បន្ននេះ អាងស្តុកទឹកនានានៅក្នុងខេត្តព្រះវិហារ នៅមានទឹកប្រើប្រាស់គ្រប់គ្រាន់នៅឡើយ ។
ថ្លែងប្រាប់កោះសន្តិភាពនៅថ្ងៃទី១២ ខែកុម្ភៈ ឆ្នាំ២០១៩នេះ លោក ចាប កុយ ប្រធានមន្ទីរធនធានទឹក និងឧតុនិយម ខេត្តព្រះវិហារ បានលើកឡើងថា បច្ចុប្បន្ននេះ នៅទូទាំងខេត្តព្រះវិហារ មានអាងស្តុកទឹកប្រមាណជាង៣០កន្លែង នឹងមានទឹកនៅក្នុងអាងជាងពាក់កណ្តាល ដែលអាចបំពេញតម្រូវការប្រើប្រាស់របស់ប្រជាពលរដ្ឋបានគ្រប់គ្រាន់ ។
ដោយឡែកនៅតាមអូរ ប្រឡាយ និងស្ទឹង ក៏នៅមានទឹកដែរ ម្យ៉ាងវិញទៀត ខេត្តព្រះវិហារនៅតាមបណ្តាភូមិឃុំនានាមានអណ្តូងទឹកប្រើប្រាស់ជាច្រើនអាចឲ្យប្រជាពលរដ្ឋប្រើប្រាស់បាន ។
លោកថាគិតមកដល់ពេលនេះ ខេត្តព្រះវិហារពុំទាន់មានតួលេខណាមួយប្រឈមទៅនឹងកង្ខះទឹកប្រើប្រាស់នៅឡើយទេ បើទោះបីជាសីតុណ្ហភាពកម្តៅបានហក់ឡើងដល់៣៨អង្សារហើយនោះ មិនដូចកាលពីឆ្នាំ២០១៦កន្លងទៅនោះទេ ដែលខេត្តព្រះវិហារ ជួបប្រទះនឹងការខ្វះខាតទឹកប្រើប្រាស់នោះ ។
ដោយឡែកលោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ បានលើកឡើងថា គិតមកដល់ខែកុម្ភៈនេះ កសិករផលិតដំណាំកសិកម្ម ដូចជាដំណាំបន្លែជាដើមនៅខេត្តព្រះវិហារពុំទាន់ប្រឈមនឹងការខ្វះទឹកស្រោចស្រពដំណាំនៅឡើយទេ ម្យ៉ាងវិញទៀត កសិករបច្ចុប្បន្ននេះបានប្រើប្រាស់បច្ចេកទេសដាំដុះដំណាំ នឹងឧបករណ៍បំពាក់លើសួនបន្លែ ដូចជាការប្រើប្រាស់ប្រព័ន្ធដំណក់ទឹក និងក្រាលកៅស៊ូប្លាស្ទិកលើរងដំណាំ រក្សាសំណើមទឹកក្នុងសួនបន្លែ ដែលអាចឲ្យការប្រើប្រាស់ទឹក ស្រោចស្រពអស់តិច និងសន្សំសំចៃទឹកបានច្រើនជាងការដាំដុះនាពេលមុនៗ ដែលពុំទាន់មានបច្ចេកទេសដូចបច្ចុប្បន្ននេះ ។
សូមបញ្ជាក់ថា នៅទូទាំងខេត្តព្រះវិហារ មានអាងស្តុកទឹកធំៗ ជាង៣០កន្លែង ដោយឡែកការផ្គត់ផ្គង់ទឹកជនបទ របស់មន្ទីរអភិវឌ្ឍន៍ជនបទខេត្តព្រះវិហារ បានសាងសង់ អណ្តូងស្នប់ ចំនួន៧០៥អណ្តូង សាងសង់អណ្តូងលូ២០អណ្តូង ជីកស្រះសហគមន៍បាន១២ស្រះ ស្រះគ្រួសារ ចំនួន១២ស្រះ សាងសង់អាងត្រងទឹកភ្លៀងចំនួន៣១អាង សាងសង់បណ្តាញទឹកស្អាត ២កន្លែង ៕
ចែករំលែកព័តមាននេះ