បាងកក, ប្រទេសថៃ ៖ ត្រាក់ទ័ររបស់ប្រទេសជប៉ុនម៉ាក Yanmar ដែលប្រើប្រាស់បច្ចេកវិទ្យាថ្មីចុងក្រោយ បានបង្ហាញខ្លួននៅលើទីផ្សារអាស៊ានជាផ្លូវការ ក្នុងនោះកាលពីចុងខែមុននេះដែរ ត្រាក់ទ័រម៉ាក Yanmar ក៏បានបង្ហាញខ្លួនជាផ្លូវការនៅទីក្រុងបាងកក ប្រទេសថៃ ជាមួយនឹងវត្តមានអ្នកសារព័ត៌មានមកពីបណ្ដាប្រទេសនានាក្នុងតំបន់អាស៊ាន ដែលជាប្រទេសមានសក្ដានុពលខ្ពស់ក្នុងវិស័យកសិកម្ម ។
បើតាមប្រសាសន៍លោក ហ៊ីរ៉ូអាគិ គិតាអូកា ប្រធានសាជីវកម្ម កសិពាណិជ្ជកម្មនៃក្រុមហ៊ុន Yanmar បានមានប្រសាសន៍ថា ជាមួយនឹងការអភិវឌ្ឍន៍ខ្លួនទៅក្នុងទីផ្សារ ត្រាក់ទ័រក្នុងតំបន់អាស៊ាន Yanmar បានច្នៃប្រឌិតនូវបច្ចេកវិទ្យាថ្មី ដើម្បីចូលរួមចំណែកក្នុងវិស័យកសិកម្មនៅក្នុងសតវត្សរ៍ទី២១នេះ និងដើម្បីឱ្យការធ្វើកសិកម្ម ក្នុងតំបន់កាន់តែមានភាពប្រសើរឡើង ដើម្បីសម្រួលការធ្វើកសិកម្មរបស់កសិករក្នុងតំបន់នេះ ។
លោកបន្តថា ត្រាក់ទ័រស៊េរីថ្មីនេះ គឺជាត្រាក់ទ័រដែលអាចភ្ជាប់ទៅនឹងផ្កាយរណប ដើម្បីដឹងពីបញ្ហាបច្ចេកទេស មុនពេលប្រើប្រាស់ដែលជាបច្ចេកវិទ្យាចុងក្រោយរបស់ក្រុមហ៊ុន ក្នុងការផលិតនូវផលិតផលនេះផ្ដល់ជូនកសិករក្នុងតំបន់អាស៊ាន ។ លោកថា៖«យើងនឹងនាំយកនូវបច្ចេកវិទ្យាថ្មីជូនកសិករក្នុងតំបន់អាស៊ាន ស្របពេលបច្ចេកវិទ្យាកាន់តែទំនើប នៅក្នុងសម័យភាវូបនីយកម្មនេះ» ។
សូមរំលឹកផងដែរ ត្រាក់ទ័រម៉ាក Yanmar នេះ ក៏បាននាំចូលមកកាន់ទីផ្សារព្រះរាជាណាចក្រកម្ពុជា ដើម្បីចែកចាយ និងផ្ដល់ជូនទៅកាន់កសិករផងដែរ ក្នុងគោលបំណងដើម្បីឱ្យការធ្វើកសិកម្មក្នុងប្រទេសកម្ពុជា កាន់តែមានភាពទំនើប និងដើម្បីដើរឱ្យទាន់សម័យទំនើប ខណៈប្រទេសជិតខាងក៏បាននិងកំពុងប្រើប្រាស់នូវការធ្វើកសិកម្មតាមបែបទំនើបផងដែរ ។
ដោយឡែកត្រាក់ទ័រ Yanmar ស៊េរីថ្មី ដែលបានបង្ហាញនៅទីក្រុងបាងកកកាលពីពេលថ្មីៗនេះ ក៏ត្រៀមនឹងនាំចូលមកកាន់ទីផ្សារប្រទេសកម្ពុជាផងដែរ ។ នេះបើតាមការបញ្ជាក់ពីក្រុមហ៊ុន គង់នួន គ្រុប ដែលជាក្រុមហ៊ុននាំចូល និងចែកចាយត្រាក់ទ័រម៉ាក Yanmar នៅលើទីផ្សារប្រទេសកម្ពុជា ហើយក្រុមហ៊ុនក៏រំពឹងថា ការនាំចូលត្រាក់ទ័រស៊េរីថ្មីដែលជាបច្ចេកវិទ្យាចុងក្រោយក៏នឹងចូលរួមចំណែកក្នុងការអភិវឌ្ឍន៍វិស័យកសិកម្ម ក្នុងប្រទេសកម្ពុជាបានមួយចំនួនផងដែរ ៕ ដោយសហការ
ចែករំលែកព័តមាននេះ