ចិន​ចាប់​យក​តំបន់​សមុទ្រ​របស់​កម្ពុជា​សម្រាប់​ការ​វិនិយោគ


រាជធានី​ភ្នំពេញ ៖ ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ ការ​វិនិយោគ​នៅ​ក្នុង​ប្រទេស​កម្ពុជា ត្រូវ​បាន​គេ​មើលឃើញ​ថា វិនិយោគិន​ចិន​គឺ​ឈរ​លំដាប់​ទី​១ ពិសេស​ការ​វិនិយោគ​លើ​វិស័យ​សំណង់​ធំ​ៗ ហើយ​បច្ចុប្បន្ន​តំបន់​ដែល​ចិន​ចូល​ចិត្ត​និង​កំពុង​វិនិយោគ​ច្រើន​ជាង គឺ​នៅ​តំបន់​ជាប់មាត់​សមុទ្រ ដូច​ជា​ខេត្ត ព្រះ​សីហ​នុ និង​កោះកុង ជាដើម ។

បើ​តាម​ក្រុមហ៊ុន ព្រី​ន​ស៍រៀល​អុ​ី​ស្ទេ​ត បាន​បញ្ជាក់​ថា ខ្លួន​នឹង​បន្ថែម​ទុន​វិនិយោគ​លើ​វិស័យ​អចលនទ្រព្យ​នៅ​ក្នុង​ប្រទេស​កម្ពុជា ជា​ពិសេស​នៅ​តំបន់​ខេត្ត​ព្រះ​សីហ​នុ ស្រប​ពេល​កំណើន​នៃ​តម្រូវការ​អចលនទ្រព្យ​នៅ​ក្នុង​តំបន់​នោះ​ក៏​កើនឡើង​ខ្ពស់ ដូច​ជា សេវា​សណ្ឋាគារ កាស៊ីណូ និង​តម្រូវការ​អចលនទ្រព្យ​ផ្សេង​ទៀត ពី​សំណាក់​វិនិយោគិន​ក្នុង និង​ក្រៅប្រទេស ។

ចំណែក​ខេត្តកោះកុង​វិញ ក៏​ចាប់ផ្ដើម​មាន​សន្ទុះ​គួរ​ឲ្យ​កត់សម្គាល់​ដែរ ដោយ​មាន​គម្រោង​អចលនទ្រព្យ​ធំ​មួយ​កំពុង​កាន់កាប់​ដោយ​វិនិយោគិន​ចិន​គឺ​គម្រោង​តំបន់​វិស្សមកាល​តារា​សាគរ ហើយ​គម្រោង​នេះ ក៏​ទើបតែ​ប្រកាស​បន្ថែម​ទុន​ប្រមាណ​ជិត​២​ប៊ី​លាន​ដុល្លារ​អា​មេ​រិ​ក​ដែរ ដើម្បី​អភិវឌ្ឍន៍​ជា​គម្រោង​តំបន់​លំហែកាយ​នៅ​មាត់សមុទ្រ​នៃ​ខេត្ត​មួយ​នេះ ដែល​ធ្វើ​ឲ្យ​គម្រោង​អភិវឌ្ឍន៍​របស់​ចិន កាន់តែ​ធំ​បន្ថែម​ទៀត​នៅ​តាម​តំបន់​មាត់សមុទ្រ ។

លោក ច្រឹ​ក សុខ​នី​ម ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា បាន​មាន​ប្រសាសន៍​ថា ជា​ការ​ពិត​ណាស់ វិនិយោគិន​ចិន​បាន​មក​ដល់​ប្រទេស​កម្ពុជា និង​កំពុង​បណ្ដាក់ទុន​វិនិយោគ​នៅ​ក្នុង​ប្រទេស​កម្ពុជា ។ លោក​ថា ៖« ចិន​មាន​ប្រជាជន​ប្រមាណ​១​ភាគ​៣​នៃ​ប្រជាជន​ពិភពលោក​ទាំងមូល ហើយ​គ្រប់​ប្រទេស​ទាំងអស់​នៅ​លើ​ពិភពលោក ក៏​មាន​វត្តមាន​ជនជាតិ​ចិន​រស់នៅ និង​វិនិយោគ​ដែរ រួម​នឹង​កម្ពុជា​ក៏​កំពុង​ទទួល​បាន​វិនិយោគិន​ចិន​ជា​បន្តបន្ទាប់ » ។ លោក​បន្ត​ថា នៅ​ក្នុង​ប្រទេស​កម្ពុជា គេ​មើលឃើញ​ថា ចិន​ចូល​ចិត្ត​វិនិយោគ​នៅ​តំបន់​មាត់សមុទ្រ ជាក់ស្ដែង​បច្ចុប្បន្ន​នេះ កំពុង​បុក​ទៅ​វិនិយោគ​នៅ​ក្នុង​ខេត្ត​ព្រះ​សីហ​នុ ដោយ​អភិវឌ្ឍន៍​សំណង់​អគារ​ខ្ពស់​ៗ​ជា​ច្រើន នៅ​ទីនោះ​។ បន្ទាប់​ពី​ខេត្ត​ព្រះ​សីហ​នុ ចិន​អាច​នឹង​ងាក​ទៅ​រក​ការ​វិនិយោគ​ក្នុង​ខេត្តកំពត និង​ខេត្តកោះកុង​ជាដើម​។

លោក​បន្ថែម ការ​មក​វិនិយោគ​របស់​ចិន នៅ​ក្នុង​ប្រទេស​កម្ពុជា​បាន​ហុច​សក្ដានុពល​ច្រើន មក​កាន់​ប្រទេស​កម្ពុជា ហើយ​វា​ក៏​មាន​ផល​វិជ្ជមាន និង​អវិជ្ជមាន ។ ផល​វិជ្ជមាន សម្រាប់​ប្រទេស​កម្ពុជា គឺ​នឹង​ទទួល​បានការ​អភិវឌ្ឍ​ភ្លាម​ៗ​នៅ​ក្នុង​ប្រទេស ព្រោះ​ចិន​មាន​លុយ ហើយ​គេ​នឹង​មក​អភិវឌ្ឍន៍​ភ្លាម​ៗ​ជា​អគារ​ផ្សេង​ៗ ហើយ​អគារ​ទាំងនោះ ក៏​មិន​អាច​លើក​ទៅ​ស្រុក​ចិន​វិញ​បាន​ដែរ ។ ដល់​ពេល​កំណត់​ណាមួយ អគារ​ទាំងនោះ​នឹង​ត្រូវ​ប្រគល់​មក​ឲ្យ​កម្ពុជា ហើយ​គេ​យក​តែ​លុយ​ដែល​លក់​បាន​ត្រលប់​ទៅ​វិញ​ប៉ុណ្ណោះ ។ លោក​ថា ៖« ទន្ទឹម​មាន​ផល​វិជ្ជមាន​នេះ ក៏​មាន​ផល​អវិជ្ជមាន​ដែរ ពី​ការ​មក​ដល់​របស់​ជនជាតិ​ចិន ព្រោះ​ដូច​យើង​ដឹង​ថា ក្នុង​ចំណោម​ជនជាតិ​ចិន​ទាំងអស់ តែងតែមាន​អ្នក​ល្អ និង​អ្នក​អាក្រក់ ហើយ​អ្នក​អាក្រក់​នោះ​នឹង​បង្ក​ភាព​អាណា​ធិ​ប្ប​តេ​យ្យ​ដល់​ប្រទេស​កម្ពុជា​យើង ដូច្នេះ​យើង​ត្រូវ​បង្កើន​ការ​រឹត​បន្តឹង​ច្បាប់ទម្លាប់​ឲ្យ​បាន​ល្អ ចំពោះ​ជនបរទេស​ដែល​កំពុង​រស់នៅ និង​ធ្វើ​អាជីវកម្ម​ក្នុង​ប្រទេស​យើង »​។

បើ​តាម​លោក សុខ គែន ភ្នាក់ងារ​អចលនវត្ថុ​មួយ​រូប​ប្រចាំ​ខេត្តកំពត ក៏​បាន​ឲ្យ​ដឹងផង​ដែរ កំណើន​វិនិយោគិន​ចិន ហៀរ​ចេញពី​ខេត្ត​ព្រះ​សីហ​នុ ក៏​បាន​និង​កំពុង​សំដៅ​មក​កាន់​ខេត្តកំពត​ផង​ដែរ ដែល​ធ្វើ​ឲ្យ​តម្លៃ​អចលនទ្រព្យ ជា​ពិសេស​តម្លៃ​ដីធ្លី​នៅ​ជាប់មាត់​ព្រែក និង​មាត់សមុទ្រ​កំពុង​កើន​ឡើងជា​បន្តបន្ទាប់ ក្នុង​នោះ​គេ​សង្កេត​ឃើញ​ថា សកម្មភាព​ទិញ​លក់​ដីធ្លី ក្នុង​ខេត្ត​នេះ ក៏​កំពុង​មាន​ភាព​មមាញឹក​ផង​ដែរ ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ