ម៉េចចឹង! គូស្នេហ៍មួយគូនេះឡើងផ្អើលគេឯង

ថ្ងៃទី ១១ ខែ កុម្ភៈ ឆ្នាំ ២០១៩

ម៉ោង ០៨:៥២

រាជធានីភ្នំពេញ ៖ គូស្នេហ៍វ័យក្មេងមួយគូជិះម៉ូតូក្នុងល្បឿនលឿនបានជ្រុលទៅបុក និងរថយន្តដែលបើកដោយនារីវ័យក្មេងបត់ឆ្លងផ្លូវយ៉ាងពេញទំហឹង បណ្តាលអោយមានអ្នករងរបួសធ្ងន់ម្នាក់ និងស្រាលម្នាក់ ហេតុការណ៍នេះបានកើតឡើងនៅវេលាម៉ោង២និង១០នាទីរំលងអធ្រាត្រឈានចូលថ្ងៃទី១១ ខែកុម្ភៈ ឆ្នាំ២០១៩ ចំណុចផ្លូវ២៧១កែងនិង៤៣២សង្កាត់ទួលទំពូង២ ខណ្ឌចំការមន។

តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេបានឃើញនារីវ័យក្មេងម្នាក់បើករថយន្តម៉ាក CELICA ពណ៌ខ្មៅ ពាក់ស្លាកលេខ ភ្នំពេញ 2X- 0211បានធ្វើដំណើរតាមផ្លូវ២៧១ក្នុងទិសដៅពីជើងទៅត្បូងព្រមទាំងស្រវឹងផងនោះខណៈមកដល់ចំណុចកើតហេតុបានបត់ឆ្វេងឡើងទៅផ្លូវ៤៣២ ក្នុងល្បឿនលឿនស្របពេលនោះដែរក៏ស្រាប់តែគូស្នេហ៍វ័យក្មេងមួយគូមិនដឹងថា ប្រញាប់ទៅណានោះទេ គឺបានជិះម៉ូតូម៉ាកហុងដាឌ្រីមសេរីឆ្នាំ២០១៦ ពណ៌ខ្មៅ ពាក់ស្លាកលេខ តាកែវ 1O-8918 ធ្វើដំណើរតាមផ្លូវ២៧១ ក្នុងទិសដៅបញ្ច្រាសគ្នាលឿនដូចគ្នាក៏ជ្រុលទៅបុករថយន្តចំថ្ពាល់មុខចំហៀងខាងស្តាំពេញទំហឹងបណ្តាលអោយនារីដែលអង្គុយខាងក្រោយហោះផ្លោងទៅផ្ទប់ និងកញ្ចក់រថយន្តខាងមុខរងការខូចខាតបែកមុខបែកមាត់ ។

ចំនែកបុរសជាអ្នកឌុបរងរបួសបាក់ជើងខាងស្តាំ ភ្លាមៗនោះដែរអ្នកទាំងពីរត្រូវបានរថយន្តសង្គ្រោះបានមកដឹកយកទៅសង្គ្រោះនៅគ្លីនិកឯកជនម៉ូតូរងការខូចខាតខ្ទេចផ្នែកខាងមុខ។000ដោយឡែកខាងរថយន្តរងការខូចខាតក្រពិតថ្ពាល់មុខចំហៀងស្តាំ និងបែកកញ្ចក់ខាងមុខភ្លាមនោះដែរ នារីបើកបរវ័យក្មេងរូបនោះបានចុះពីលើរថយន្តទាំងអាការស្រវឹងទ្រេតទ្រោត រួចហើយបានឡើងជិះម៉ូតូឌុបរត់គេចខ្លួនបាត់ ដោយបន្សល់ទុករថយន្តនៅនឹងកន្លែងកើតហេតុ។

ក្រោយពេលកើតហេតុឃើញសមត្ថកិច្ចមូលដ្ឋាន និងជំនាញចរាចរណ៍ខណ្ឌចំការមនបានចុះទៅកន្លែងកើតហេតុបានធ្វើការវាស់វែងយកម៉ូតូ និងរថយន្តទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយនៅពេលក្រោយ៕