រាជធានីភ្នំពេញ ៖ ដោយសារនិស្ស័យស្រឡាញ់ចូលចិត្តផង និងដើម្បីចាប់អាជីពរកប្រាក់កំរៃចិញ្ចឹមជីវិតផង កញ្ញាដា អារីតា បានកសាងជីវិតជាតារាសម្តែងកាយវិការខារ៉ាអូខេ ។ នាងពុំទាន់ក្លាយជាតារាល្បីនៅឡើយទេ តែនាងកំពុងខិតខំពុះពារក្នុងអាជីពនេះ ។ ទន្ទឹមអាជីពសិល្បៈនាងបើកហាងកាត់សក់អ៊ុតសក់មួយមានទីតាំងនៅម្តុំផ្សារដើមថ្កូវ។ កញ្ញា ដា អារីតា មានវ័យ២៣ឆ្នាំ ស្រុកកំណើតនៅក្រុងសួង ខេត្តកំពង់ចាម។ នាងមានបងប្អូន៤នាក់ ក្នុងនោះប្រុស២នាក់ ចំណែករូបនាងជាកូនទី ២ ។ ដោយសារជីវភាពជួបការលំបាក នៅឆ្នាំ ២០០៦ អារីតាបានចាកចេញពីឪពុកម្តាយមករស់នៅក្នុងរាជធានីភ្នំពេញ ចួករៀនអ៊ុតសក់ និងពេលទំនេរទៅហាត់រៀនសម្តែង និងច្រៀងនៅក្លឹបសិល្បៈខ្មែរអន្តរជាតិ (K.I.C) ។ តាមរយៈការហាត់រៀននោះនាងក្លាយជាតារាសម្តែងកាយវិការខារ៉ាអូខេឱ្យផលិតកម្មក្រៅប្រទេសមួយចំនួន ព្រមទាំងសម្តែងក្នុងខ្សែភាពយន្តខ្លះៗដែរ តែមិនទាន់ក្លាយជាតួឯកទេ។
កញ្ញាដា អារីតា កាលពីនៅសិក្សាធ្លាប់ប្រឡងច្រៀងជាប់ចំណាត់ថ្នាក់លេខ៣ ប្រចាំខេត្តកំពង់ចាម នាឆ្នាំ២០០៥ ព្រោះនាងមាននិស្ស័យសិល្បៈតាំងពីក្មេង ។
កន្លងមកកញ្ញាដា អារីតា ធ្លាប់សម្តែងកាយវិការខារ៉ាអូខេឱ្យផលិតកម្មនៅក្រៅប្រទេស និងផលិតកម្មមហាហង្ស ព្រមទាំងថតស្ប៉តអប់រំពីសុខភាពមួយចំនួនសំរាប់ចាក់ផ្សាយតាមកញ្ចក់ទូរទស្សន៍ ។ ក្នុងអាជីពជាអ្នកសិល្បៈនេះនាងនាងចង់ក្លាយជាតួឯក តែនាងពុំទាន់សម្រេចបំណងនោះនៅឡើយទេ ។ នាងនិយាយទាំងទឹកមុខញញឹមថា បើសិនជាមានការគាំទ្រពីទស្សនិកជននោះនាងនឹងក្លាយជាតួឯកនៅថ្ងៃណាមួយជាក់ជាមិនខានឡើយ ។ សំរាប់រូបនាងផ្ទាល់នាងសង្ឃឹមក្នុងចិត្តថា អ្វីដែលនាងប្រាថ្នានោះនឹងទទួលបានក្នុងពេលមិនយូរប៉ុន្មានទេ ។
សព្វថ្ងៃនេះអារីតា ឆ្លៀតខិតខំប្រឹងប្រែងហ្វឹកហាត់រៀនច្រៀង និងសម្តែងបន្តទៀត ដើម្បីឱ្យជំនាញសិល្បៈរបស់នាងកាន់តែល្អប្រសើរឡើង។
នៅពេលសួរអំពីរឿងស្នេហាអារីតាឆ្លើយទាំងអឹមអៀនថា នាងមិនទាន់ជាប់ពាក់ព័ន្ធ ស្នេហាជាមួយបុរសណាម្នាក់ទេ តែមានគេតាមសុំស្នេហានាងច្រើន ។ នាងរង់ចាំមានកេរ្តិ៍ឈ្មោះល្បីសិនចាំគិតពីរឿងស្នេហា ៕
ចែករំលែកព័តមាននេះ