ខេត្តកំពងឆ្នាំង ៖ បន្ទាប់ពីសារព័ត៌មានកោះសន្តិភាព និងស្ថាប័នព័ត៌មានជាច្រើនទៀត បានផ្សាយអំពីទីតាំងអធិការដ្ឋាននគរបាលស្រុកជលគិរី ត្រូវបានពុះឡូតិ៍លក់ ប្រជាពលរដ្ឋធ្លាប់រងគ្រោះដោយការបណ្ដេញចេញពីសម័យរដ្ឋកម្ពុជា ស្នើសុំប្រមុខរាជរដ្ឋាភិបាលដោះស្រាយសុំដីនោះវិញ ឬទិញក្នុងតម្លៃសមរម្យរួចមក នៅថ្ងៃទី០៨…
ខេត្តកំពងឆ្នាំង ៖ បន្ទាប់ពីសារព័ត៌មានកោះសន្តិភាព និងស្ថាប័នព័ត៌មានជាច្រើនទៀត បានផ្សាយអំពីទីតាំងអធិការដ្ឋាននគរបាលស្រុកជលគិរី ត្រូវបានពុះឡូតិ៍លក់ ប្រជាពលរដ្ឋធ្លាប់រងគ្រោះដោយការបណ្ដេញចេញពីសម័យរដ្ឋកម្ពុជា ស្នើសុំប្រមុខរាជរដ្ឋាភិបាលដោះស្រាយសុំដីនោះវិញ ឬទិញក្នុងតម្លៃសមរម្យរួចមក នៅថ្ងៃទី០៨ ខែកុម្ភៈ ឆ្នាំ២០១៩នេះ រដ្ឋបាលសាលាស្រុកជលគីរី បានចេញសេចក្តីបំភ្លឺមួយដោយបានរៀបរាប់ពីប្រវត្តិទីតាំងអធិការដ្ឋាននគរបាល ស្រុកដែលបានបង្កើតឡើងតាំងពីឆ្នាំ១៩៩៨។
ប៉ុន្តែសេចក្តីបំភ្លឺនេះ ធ្វើឱ្យបណ្តាញអ្នកសារព័ត៌មាន ជាពិសេសសារព័ត៌មានកោះសន្តិភាព ដែលមានវិជ្ជាជីវៈត្រឹមត្រូវមិនអាចទទួលយកបាននោះទេ នូវចំណុចដែលរដ្ឋបាលសាលាស្រុកបានចោទថា (សារព័ត៌មានកោះសន្តិភាព និងបណ្តាញសារព័ត៌មានមួយចំនួនទៀត បានចុះមកជួបប្រជាពលរដ្ឋចំនួនប្រមាណ៣០នាក់ ដែលជាសកម្មជនរបស់អតីតគណបក្សប្រឆាំង ដែលបានប្រមូលផ្តុំគ្នាទុកជាមុនក្នុងគោលបំណងញុះញង់ប្រជាពលរដ្ឋឱ្យនិយាយរឿងមិនពិត ដើម្បីតវ៉ាប្រឆាំងជាមួយអាជ្ញាធរ កងកម្លាំងមានសមត្ថកិច្ច ។
ករណីដីអធិការដ្ឋាននគរបាលស្រុក ដែលពួកគាត់បានចាកចេញពី២៩ឆ្នាំមុន ដែលបង្កភាព អាណាធិបតេយ្យ និងបង្កភាពអសន្តិសុខសង្គមក្នុងស្រុកធ្វើឱ្យប្រជាពលរដ្ឋ សាធារណជន មានការភ្ញាក់ផ្អើល និងមួយចំនួនមានការយល់ច្រឡំ ។ ដូចនេះសូមសាធារណជនទូទៅ មេត្តាជ្រាបជាព័ត៌មាន និងមេត្តាកុំយល់ច្រឡំដូចការផ្សាយបំភ្លើសនោះឡើយ) ។
ជុំវិញសេចក្តីបំភ្លឺរបស់រដ្ឋបាលសាលាស្រុក ដែលមានបោះត្រារដ្ឋបាលសាលាស្រុក និងត្រាអធិការដ្ឋាននគរបាលស្រុកជលគីរីខាងលើនេះ សារព័ត៌មានកោះសន្តិភាពមិនអាចទទួលយកបាននោះទេ ។
ទី១-សារព័ត៌មានកោះសន្តិភាព សរសេរតែពីអ្វីដែលប្រជាពលរដ្ឋចង់បាន រឿងបក្សប្រឆាំងមិនប្រឆាំង គឺមិនគិតឡើយ តើបក្សប្រឆាំងហ្នឹងមិនមែនជាមនុស្សទេអី? ពួកគាត់ក៏ជាជនរងគ្រោះធ្លាប់ត្រូវបានបណ្តេញចេញដែរ ម្យ៉ាងទៀត គាត់ក៏ធ្លាប់បោះឆ្នោតជូនគណបក្សប្រជាកម្ពុជាដែរកាលពីពេលថ្មីៗនេះ ។ សូមកុំខឹងគាត់ លាបពណ៌ដាក់គាត់ជាគណៈបក្សប្រឆាំង ។ បក្សប្រឆាំងតាមជនបទ វាកើតចេញពីការជិះជាន់នៃរដ្ឋអំណាច ខ្លះដែលត្រូវតែទទួលស្គាល់។
ទី២-ចោទថា ក្នុងគោលបំណងញុះញង់ឱ្យប្រជាពលរដ្ឋនិយាយរឿងមិនពិត? ចោទនេះគឺធ្ងន់ណាស់ សារព័ត៌មានឯណានឹងទៅញុះញង់ឱ្យប្រជាពលរដ្ឋនិយាយរឿងមិនពិត ។ ពួកគាត់ពិតជាធ្លាប់រងគ្រោះដោយការបណ្តេញចេញពិតមែន ហើយពួកគាត់លេចឮថា ដីអធិការដ្ឋាននគរបាល ដែលពួកគាត់ធ្លាប់រស់នៅត្រូវបានគេពុះឡូតិ៍លក់ បើពិតមែនពួកគាត់សុំទិញវិញក្នុងតម្លៃសមស្របណាមួយតើ? ។
ម្យ៉ាងវិញទៀត ថ្ងៃដែលកោះសន្តិភាពបានជួបប្រជាពលរដ្ឋ គឺនៅក្រោយអធិការដ្ឋាននគរបាលស្រុកជលគីរីចាស់ ចំណុចដែលប្រជាពលរដ្ឋធ្លាប់បានបង់លុយ ម្នាក់២ឬ៣ពាន់ដុល្លារឱ្យអធិការដ្ឋាន ដើម្បីបានសល់ដីក្រោយផ្ទះ២-៣ម៉ែត្រ ។ ហើយពេលជួបសម្ភាសន៍ គឺក្នុងសភាពស្ងប់ស្ងាត់គ្មានបង្កភាពអាណាធិតេយ្យ និងបង្កភាពអសន្តិសុខនោះឡើយ កុំអាងមានអំណាចចេះតែថា ចេះតែចោទ។
ចែករំលែកព័តមាននេះ