រាជធានីភ្នំពេញ ៖ ដើម្បីទាក់ទាញវិនិយោគិនបន្ថែមពីបណ្ដាប្រទេសធំៗលើពិភពលោក មន្ត្រីជាន់ខ្ពស់កម្ពុជាតែងតែផ្សព្វផ្សាយ និងបង្ហាញពីសក្ដានុពលរបស់ខ្លួន ទៅកាន់វិនិយោគិននានាក្នុងគោលបំណងឲ្យមកវិនិយោគកាន់តែច្រើន សម្រាប់ជំរុញកំណើនសេដ្ឋកិច្ច និងប្រាក់ចំណូលប្រជាជន ។
នៅក្នុងជំនួបជាមួយវិនិយោគិនទីក្រុងឡុងប៊ិច កាលពីរសៀលថ្ងៃទី៣០ មករា កន្លងមកលោកប៉ាន សូរស័ក្តិ បានលើកឡើងពីកំណើនសេដ្ឋកិច្ចដ៏រឹងមាំរបស់កម្ពុជា ព្រមទាំងចក្ខុវិស័យឆ្នាំ២០៣០ និងឆ្នាំ២០៥០ ក៏ដូចជាកិច្ចប្រឹងប្រែងនានារបស់រាជរដ្ឋាភិបាល ក្នុងការលើកកម្ពស់ឧត្តមភាពប្រកួតប្រជែង តាមរយៈការដាក់ចេញនូវកំណែទម្រង់ស៊ីជម្រៅ ជាមួយគោលនយោបាយវិនិយោគដ៏ទាក់ទាញ, ការធ្វើទំនើបកម្មវិស័យអប់រំ, ការកសាងហេដ្ឋារចនាសម្ព័ន្ធថ្មីៗ (ផ្លូវថ្នល់, ផ្លូវដែក, ផ្លូវល្បឿនលឿន, ព្រលានយន្តហោះ និងកំពង់ផែអន្តរជាតិ) សំដៅគាំទ្រការអភិវឌ្ឍវិស័យសេដ្ឋកិច្ច និងពាណិជ្ជកម្ម ជាដើម ។
លោក ប៉ាន សូរស័ក្តិ បានបង្ហាញពីសក្ដានុពលវិនិយោគទៅកាន់វិនិយោគិនអាមេរិក ពីការអភិវឌ្ឍខេត្តព្រះសីហនុ និងគម្រោង Plus One នៅតាមតំបន់សេដ្ឋកិច្ចពិសេសនានា ព្រមទាំងគោលនយោបាយអភិវឌ្ឍន៍ឧស្សាហកម្ម (IDP) របស់រាជរដ្ឋាភិបាល ដែលមានគោលបំណងប្រែក្លាយកម្ពុជា ទៅជាមជ្ឈមណ្ឌលផលិតកម្មចម្រុះ សម្រាប់បម្រើវិស័យនាំចេញ និងជាឋានសួគ៌សម្រាប់គម្រោងវិនិយោគអន្តរជាតិតូចធំ ។
លោក រ៉ូប៊ើត ហ្គាសៀ អ្នកដឹកនាំប្រតិភូវិនិយោគិនទីក្រុងឡុងប៊ិច ដែលបានមកកាន់កម្ពុជា បានបង្ហាញពីការពេញចិត្តរបស់ខ្លួនលើកំណើនសេដ្ឋកិច្ច និងវឌ្ឍនភាពថ្មីៗរបស់កម្ពុជា ដោយលោកបានមានប្រសាសន៍ថា លោកនឹងផ្សព្វផ្សាយពីសក្ដានុពលទាំងនេះ ទៅកាន់វិនិយោគិនទីក្រុងឡុងប៊ិច ដើម្បីពិចារណា មកវិនិយោគនៅក្នុងប្រទេសកម្ពុជា តាមការស្នើរបស់កម្ពុជា ដើម្បីបង្កើនទំនាក់ទំនង ពាណិជ្ជកម្មរវាងគ្នានឹងគ្នា ។
គួរបញ្ជាក់ថា ទំហំពាណិជ្ជកម្មរវាងប្រទេសកម្ពុជា និងសហរដ្ឋអាមេរិក នៅក្នុងឆ្នាំ ២០១៨កន្លងទៅនេះសម្រេចបានប្រមាណ៣,៣១ពាន់លានដុល្លារអាមេរិក កើនឡើងប្រមាណ២៧ភាគរយធៀបនឹងឆ្នាំ ២០១៧ ក្នុងនោះកម្ពុជានាំចេញទៅកាន់អាមេរិក មានទឹកប្រាក់ជាង២,៨៨ពាន់លានដុល្លារអាមេរិកដែលធ្វើឲ្យអាមេរិក ក្លាយជាទីផ្សារធំទី២របស់កម្ពុជា និងនាំចូលពីសហរដ្ឋអាមេរិក មកកាន់កម្ពុជាវិញមានទំហំទឹកប្រាក់ប្រមាណ៤២៦លានដុល្លារ
អាមេរិក ៕
ចែករំលែកព័តមាននេះ