រាជធានីភ្នំពេញ ៖ ខណៈដែលបញ្ហាស្រូវ អង្ករ កំពុងតែមានតម្លៃទាប រដ្ឋមន្ត្រីក្រសួងកសិកម្ម រុក្ខប្រមាញ់ និងនេសាទបានស្នើដល់វៀតណាមជួយដោះស្រាយដោយទិញស្រូវ អង្ករឲ្យតាមតម្លៃទីផ្សារនៅប្រទេសវៀតណាម ។…
រាជធានីភ្នំពេញ ៖ ខណៈដែលបញ្ហាស្រូវ អង្ករ កំពុងតែមានតម្លៃទាប រដ្ឋមន្ត្រីក្រសួងកសិកម្ម រុក្ខប្រមាញ់ និងនេសាទបានស្នើដល់វៀតណាមជួយដោះស្រាយដោយទិញស្រូវ អង្ករឲ្យតាមតម្លៃទីផ្សារនៅប្រទេសវៀតណាម ។
បញ្ហាតម្លៃស្រូវ អង្ករ ត្រូវបានលោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបាន និងលោក Vu Quang Minh ឯកអគ្គរដ្ឋទូតនៃសាធារណរដ្ឋសង្គមនិយមវៀតណាមបានបើកកិច្ចប្រជុំពិភាក្សាអំពីស្ថានភាពការប្រមូលទិញស្រូវពីកសិករកម្ពុជាក្នុងពេលបច្ចុប្បន្ន ។ យោងតាមបណ្តាញសង្គមហ្វេសប៊ុករបស់ក្រសួងកសិកម្មបានឲ្យដឹងថា ក្នុងកិច្ចប្រជុំកាលពីថ្ងៃទី៣០ មករា នៅទីស្តីការក្រសួងដោយមានចូលរួមពីសំណាក់ឯកឧត្តមថ្នាក់ទឹកនាំក្រសួង លោកឧកញ៉ា លោកអគ្គនាយកធនាគារ AGRI BANK តំណាងក្រុមហ៊ុនដែលធ្វើអាជីវកម្មស្រូវ-អង្ករវៀតណាម មន្ត្រីស្ថានទូត និងមន្ត្រីជំនាញក្រោមឱវាទមួយចំនួនទៀត ។ បានពិភាក្សាលើបញ្ហាសំខាន់ចំនួនពីរគឺ ទី១- ធ្វើការពិនិត្យ និងវាយតម្លៃជារួមលើស្ថានភាពតម្លៃស្រូវក្នុងពេលបច្ចុប្បន្ន និងទី២-រួមគ្នាដោះស្រាយ និងដាក់ចេញនូវយន្តការនៃការប្រមូលទិញស្រូវ-អង្ករពីកម្ពុជាឱ្យបានសមស្របទៅនឹងតម្លៃលើទីផ្សារនៅប្រទេសវៀតណាម ។
ប្រភពបានបានលើកឡើងថា បន្ទាប់ពីភាគីទាំងពីរបានពិភាក្សាគ្នាយ៉ាងល្អិតល្អន់រួចមកកិច្ចប្រជុំបានដាក់ចេញនូវយន្តការដោះស្រាយនូវបញ្ហាតម្លៃស្រូវក្នុងរយៈពេលខ្លី មធ្យម និងវែងដូចខាងក្រោម ១- ភាគីវៀតណាមនឹងរៀបចំកិច្ចប្រជុំបន្ទាន់មួយ ជាមួយពាណិជ្ជករវៀតណាមបន្ទាប់មកនឹងធ្វើរបាយការណ៍លម្អិតជូននាយករដ្ឋមន្ត្រីវៀតណាម ដើម្បីជំរុញឱ្យពាណិជ្ជករវៀតណាមជួយប្រមូលទិញស្រូវពីកម្ពុជាក្នុងតម្លៃសមរម្យ ។
២- ធនាគារ AGRI BANK នឹងពិនិត្យលទ្ធភាព និងធ្វើការសម្រួលបែបបទផ្សេងៗ ដើម្បីផ្តល់កម្ចីឥណទានដល់ពាណិជ្ជករវៀតណាមសម្រាប់ជាទុនប្រមូលទិញស្រូវក្នុងរដូវប្រមូលផលនេះព្រមទាំងគាំទ្រដល់ការផ្តល់ឥណទានដល់ពាណិជ្ជករកម្ពុជាដែលខ្វះទុនក្នុងការប្រមូលទិញកសិផល ។ ៣- ភាគីទាំងពីរនឹងបន្តពង្រឹង និងពង្រីកការអនុវត្តផលិតកម្មកសិកម្មតាមកិច្ច សន្យាឱ្យបានទូលំទូលាយ និងមានប្រសិទ្ធភាព ដើម្បីរក្សានិរន្តរភាពនៃភាពជាដៃគូរវាងអ្នកផលិត និងអ្នកទិញ ។ ៤- ភាគីទាំងពីរបានឯកភាពគ្នាថា នឹងសហការគ្នាដោះស្រាយបញ្ហាប្រឈមដែលមានឱ្យបានទាន់ពេលវេលា និងមានប្រសិទ្ធភាពទាំងក្នុងពេលបច្ចុប្បន្ន និងពេលអនាគត ។
៥-ទូរទស្សន៍វៀតណាមនឹងចុះទៅកន្លែងប្រមូលផលធ្វើការផ្សព្វផ្សាយពីវិធានការនៃប្រជុំនេះជូនដល់ពាណិជ្ជករវៀតណាមឱ្យជួយទិញស្រូវក្នុងតម្លៃសមរម្យ ។ ៦-ភាគីវៀតណាមបានបញ្ជាក់ជូនថា នឹងជំរុញឱ្យមានការចុះអនុស្សរណនៃការយោគយល់គ្នាស្តីពីការធ្វើពាណិជ្ជកម្ម រវាងប្រទេសទាំងពីរ ជាពិសេសលើផលិតផលថ្នាំជក់ និងស្រូវ-អង្ករដោយអត្រាពន្ធសូន្យក្នុងរយៈពេលដ៏ខ្លីខាងមុខ ៕
ចែករំលែកព័តមាននេះ