រាជធានីភ្នំពេញ៖ ភរិយារបស់តារាកំប្លែងនាយចយ បានប្រកាសដំណឹងពីការពពោះលើកដំបូងរបស់ខ្លួនបន្ទាប់ពីបានរៀបការរួមរស់នឹងគ្នាជិតមួយឆ្នាំមកនេះ ។
ភរិយាវ័យក្មេងរបស់នាយចយ ដែលមានឈ្មោះក្វាន់ ឌី បានបង្ហើបដំណឹងជាទីរីករាយរបស់ខ្លួននៅតាមហ្វេសប៊ុកនាពេល ថ្មីៗកន្លងមក ។ បើទោះបីជាមិនទាន់បញ្ជាក់ឲ្យបានច្បាស់ថា កូននៅក្នុងផ្ទៃជាកូនប្រុស ឬកូនស្រី ប៉ុន្តែភរិយារបស់នាយចយបានសម្តែងការរំភើបរីករាយយ៉ាងខ្លាំងចំពោះសមាជិកថ្មីដែលជាចំណងដៃរវាងនាង និងតារាកំប្លែងជាស្វាមី ។ ជាមួយនឹងរូបភាពបង្ហាញពីការពិនិត្យទឹកនោម ជាមួយលទ្ធផលបញ្ជាក់ពីការមានកូនពិតប្រាកដនោះ ភរិយានាយចយ បានភ្ជាប់សារថា «គ្មានអ្វីសប្បាយចិត្តជាងទទួលបានសមាជិកថ្មីទេ ទទួលបានកាដូពិសេសមុនថ្ងៃខួបអាពាហ៍ពិពាហ៍ »។
តាមរយៈសារ និងរូបភាពដែលភរិយានាយចយ បង្ហោះនេះ គឺពិតណាស់ថា កូនដំបូងរបស់នាងនាពេលនេះគឺជាក្តីសប្បាយរីករាយបំផុតក្នុងជីវិត ដ្បិតកន្លងមកនាងមានបំណងចង់បានកូន ឆាប់ៗ ។ បន្ទាប់ពីការប្រកាសដំណឹងចំពោះការពពោះកូនដំបូងពីភរិយារបស់នាយចយ នាពេលនេះ មានការចូលរួមអបអរសាទរពីមិត្តភក្តិ និងប្រិយមិត្តគាំទ្ររបស់តារាកំប្លែងរូបនេះជាច្រើន ។
កូនដំបូងនេះត្រូវគេគិតថា ជាចំណែកមួយយ៉ាងសំខាន់ក្នុងការសាងភាពផ្អែមល្ហែម និងរឹតចំណងស្នេហ៍រវាងនាយចយ និងភរិយាកាន់តែរឹងមាំ ដ្បិតអាពាហ៍ពិពាហ៍របស់នាយចយ ធ្លាប់រងការរិះគន់ច្រើននាពេលកន្លងមក ។ ការរិះគន់ទាំងនោះបានផ្តើមឡើង ដោយសារតែរូបរាងមិនសូវសង្ហារបស់នាយចយ ហាក់មិនសក្តិសមនឹងភរិយាវ័យក្មេង ហើយថែមទាំងមានរូបស្រស់សោភាថែមទៀតផង ។
ទម្រាំបានគ្នាជាប្តីប្រពន្ធរហូតពេលនេះទាំងនាយចយ និងភរិយាបានតស៊ូពុះពារនូវឧបសគ្គជាច្រើន ក្នុងនោះរួមទាំងការរិះគន់ផងដែរ ប៉ុន្តែទីបំផុតពួកគេនៅតែអាចចាប់ដៃគ្នាកសាងអនាគត ព្រមជាមួយការទទួលបានកូនដំបូងនាពេលនេះ ។
តារាកំប្លែងភិច សែ ហៅនាយចយ បានរៀបអាពាហ៍ពិពាហ៍ជាមួយនាងប៉ិប ក្វាន់ឌី ជាកូនអ្នកខេត្តពោធិ៍សាត់ មានអាជីពជាអ្នកសម្អាងការ កាលពីថ្ងៃ២៧ ខែមករា ឆ្នាំ២០១៨។ មុនឈានដល់ថ្ងៃមង្គលភរិយានាយចយ ធ្លាប់បានអះអាងថា ពួកគេបានស្គាល់គ្នាជាង១ឆ្នាំហើយ តាមរយៈហ្វេសប៊ុក ។ លុះស្គាល់គ្នា យូរៗទៅ ក៏នាំឲ្យអ្នកទាំង២យល់ពីគ្នា ជំពាក់ចិត្តលើគ្នាទៅវិញទៅមក រហូតស្ម័គ្ររៀបការនឹងគ្នា ។
ក្វាន់ឌី បានបញ្ជាក់ថា «ពួកយើងគឺស្រលាញ់ព្រោះចិត្ត និងដោយស្មោះមែន ហើយបើនិយាយថានាងខ្ញុំនៅជាមួយគាត់ដើម្បីលុយក៏មិនត្រូវដែរ ព្រោះយើងសុទ្ធតែអត់លុយដូចគ្នា»៕សុខ វាសនា
ចែករំលែកព័តមាននេះ