ខេត្តរតនគីរី ៖ បុរសម្នាក់ស្រវឹងស្រាបានចុះងូតទឹកស្រះ បណ្តាលឱ្យលង់ស្លាប់ ដែលហេតុការណ៍នេះបានកើតឡើងកាលពីវេលាម៉ោង៩និង២០នាទីយប់ថ្ងៃទី២៧ មករា ឆ្នាំ២០១៩ នៅចំណុចស្រះទឹករបស់ឈ្មោះភារម្យ មានចម្ងាយពីផ្ទះជនរងគ្រោះ៣០ម៉ែត្រ ស្ថិតនៅភូមិបាតាង ឃុំបាតាង ស្រុកលំផាត់ ។
តាមរបាយការណ៍របស់ប៉ូលិសស្រុកលំផាត់បានអោយដឹងថា ជនរងគ្រោះដែលស្លាប់ឈ្មោះថន ផលិត
(ហៅអៀវ) ភេទប្រុស អាយុ២៨ឆ្នាំ មុខរបកម្មករស៊ីឈ្មួលជម្រះស្មៅ និងបាញ់ថ្នាំស្មៅតាមចំការអោយអ្នកភូមិ មានទីលំនៅភូមិដីឡូត៏ ឃុំជ័យឧត្ដម ស្រុកលំផាត់ ។
បើតាមរបាយការណ៍របស់សមត្ថកិច្ចបានឱ្យដឹងថា មុនពេលកើតហេតុ ជនរងគ្រោះបានទៅធ្វើកម្មករនៅចំណុចកើតហេតុខាងលើ ហើយជនរងគ្រោះបានផឹកស្រាអស់៣ទៅ៤លីត្រជាមួយកម្មកដូចគ្នា៤ទៅ៥នាក់ លុះពេលផឹកស្រាអស់ ជនរងគ្រោះបានដើរទៅងូតទឹកស្រះតែម្នាក់ឯងទាំងយប់ហើយក៏បាត់ខ្លួនរហូត ។
ប្រភពដដែលបានបន្តថា ក្រោយមកទៀត កម្មកដូចគ្នាបានដើរតាមរក ក៏ស្រាប់តែប្រទះឃើញស្បែកជើងរបស់ជនរងគ្រោះនៅក្បែមាត់ស្រះទឹក ទើបនាំគ្នាចុះរាវទើបប្រទះឃើញសព បង្កឱ្យមានការភ្ញាក់ផ្អើលដល់សាច់ញាតិជនរងគ្រោះ និងបានរាយការណ៍ទៅសមត្ថកិច្ចដើម្បីឱ្យចុះមកពិនិត្យ។
សមត្ថកិច្ចប៉ូលិសស្រុកបានឱ្យបន្តទៀតថា ក្រោយពេលកើតហេតុ សមត្ថកិច្ចបានចុះធ្វើការត្រួតពិនិត្យសព លទ្ធផលរកឃើញថា ជនរងគ្រោះពិតជាបានស្លាប់ដោយសារលង់ទឹកប្រាកដមែន គ្មានរឿងឃាតកម្មកើតឡើងនោះទេ ហើយសមត្ថកិច្ចបានប្រគល់សពជួនក្រុមគ្រួសាដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ