ខេត្តបាត់ដំបង ៖ សូមកងកម្លាំងប្រដាប់អាវុធបន្តជួយជំរុញការរុករកដោះមីនតាមខ្សែបន្ទាត់ព្រំដែនជាបន្តទៅទៀតជាមតិផ្តាំផ្ញើរបស់លោកឧត្តមសេនីយ៍ទោ អេង ហុង មេបញ្ជាការរងយោធភូមិភាគទី៥ ទទួលបន្ទុកការងារព្រំដែន ក្នុងកិច្ចប្រជុំបូកសរុបលទ្ឋផលការងារយោធា សន្តិសុខ ឆ្នាំ២០១៨ នឹងទិសដៅការងារយោធា សន្តិសុខ ឆ្នាំ២០១៩ របស់ អង្គភាពកងការពារព្រំដែនគោកលេខ៥០២ បានធ្វើឡើង កាលពីថ្ងៃទី២៣ ខែមករា ឆ្នាំ២០១៩ នៅទីបញ្ជាការកងការពារព្រំដែនគោកលេខ៥០២ ស្ថិតក្នុងភូមិកញ្ជាំង ឃុំស៊ុង ស្រុកសំឡូត ខេត្តបាត់ដំបង ។
ក្នុងមតិស្វាគមន៍របស់លោក ហុក ប៊ុនហ៊ត មេបញ្ជាការកងកាពារព្រំដែនលេខ៥០២ រួចមកលោកវរសេនីយ៍ទោ កែ សិរីវឌ្ឍន៍ នាយសេនាធិការកងព្រំដែនគោកលេខ៥០២បានអានរបាយការណ៍អោយដឹងថា គ្រប់សកម្មភាពការងារ ដែលអង្គភាពកងការពារព្រំដែនគោកលេខ៥០២សម្រេចបានកន្លងមកគឺជាការខិតខំរបស់នាយទាហាន និងពលទាហាន យ៉ាងយកចិត្តទុកដាក់ក្រោមការណែនាំ និងការចង្អុលបង្ហាញពីថ្នាក់ដឹកនាំយោធភូមិភាគ ទីបញ្ជាការមុខតំបន់៣សំឡូតអនុវត្តន៍មានប្រសាសន៍បូកសរុប និងសំណេះសំណាលនាឱកាសនោះ ។
លោកឧត្តមសេនីយ៍ទោ អេង ហុង ជំនួសមុខអោយលោកមេបញ្ជាការយោធភូមិភាគបានធ្វើការវាយតម្លៃខ្ពស់ និងបានសម្តែងការលើកសរសើរចំពោះអង្គភាពកងការពារព្រំដែនគោកលេខ៥០២ដែលរយៈពេល០១ឆ្នាំកន្លងមកនេះបានបំពេញតួនាទីភារកិច្ចទទួលខុសត្រូវការពារបានរឹងមាំលើខ្សែបន្ទាត់ព្រំដែន និងភូមិសាស្ត្រឈរជើងសំខាន់ថា នាបាននូវសន្តិសុខសន្តិភាព និងការរួមចំណែកជួយអភិវឌ្ឍដើម្បីធានាជីវភាពកងទ័ពឲ្យកាន់តែមានភាពប្រសើរឡើងថែមទៀត ។
លោកឧត្តមសេនីយ៍ទោបានបន្ថែមថា កងទ័ពត្រូវរួមចំណែកបន្ថែមទៀតក្នុងការធានាភូមិឃុំមានសុវត្ថិភាពជូនប្រជាពលរដ្ឋ និងទប់ស្កាត់រាល់បទល្មើសដែលកើតមានតាមខ្សែបន្ទាត់ព្រំដែន សំខាន់ការរួមចំណែករំដោះគ្រាប់មីនដែលនៅសេសសល់ពីសម័យសង្គ្រាមតាមព្រំដែន ហើយរាការណ៍ឲ្យអង្គភាពកំចាត់មីនរំដោះចេញ ដើម្បីឲ្យប្រជាកសិករប្រកបមុខរបរធានាបានសុវត្ថិភាពគ្មានការព្រួយបារម្ភអ្វីឡើយ ៕
ចែករំលែកព័តមាននេះ