រាជធានីភ្នំពេញ ៖ អគ្គីភ័យបានឆាបឆេះផ្ទះវីឡាភ្លោះមួយខ្នងអស់ស្ទើរទាំងស្រុង ខណៈម្ចាស់ផ្ទះបាននាំគ្នាចេញទៅញ៉ាំអាហារនៅខាងក្រៅផ្ទះអស់ ដែលហេតុការណ៍នេះបង្កឱ្យមានការភ្ញាក់ផ្អើលបានកើតឡើងកាលពីវេលាម៉ោង១០យប់ថ្ងៃទី២៣ ខែមករា ឆ្នាំ២០១៩ ត្រង់ចំណុចផ្ទះវីឡាលេខ១១ ផ្លូវលេខ១៩ ក្នុងបុរីពិភពថ្មី…
រាជធានីភ្នំពេញ ៖ អគ្គីភ័យបានឆាបឆេះផ្ទះវីឡាភ្លោះមួយខ្នងអស់ស្ទើរទាំងស្រុង ខណៈម្ចាស់ផ្ទះបាននាំគ្នាចេញទៅញ៉ាំអាហារនៅខាងក្រៅផ្ទះអស់ ដែលហេតុការណ៍នេះបង្កឱ្យមានការភ្ញាក់ផ្អើលបានកើតឡើងកាលពីវេលាម៉ោង១០យប់ថ្ងៃទី២៣ ខែមករា ឆ្នាំ២០១៩ ត្រង់ចំណុចផ្ទះវីឡាលេខ១១ ផ្លូវលេខ១៩ ក្នុងបុរីពិភពថ្មី ក្បែរផ្សារទំនើបអ៊ីអនទី២ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញមានផ្សែងហុយបន្ទាប់មកក៏មានលេចចេញជាអណ្តាតភ្លើងបានឆាបឆេះចេញមកពីក្នុងផ្ទះវិឡាភ្លោះកើតហេតុជាន់ផ្ទាល់ដី ខណៈដែលម្ចាស់ផ្ទះមិននៅបានចាក់សោផ្ទះចេញទៅខាងក្រៅអស់ ក៏បង្កឲ្យមានការភ្ញាក់ផ្អើលដល់ប្រជាពលរដ្ឋដែលរស់នៅក្បែរខាង និងសន្តិសុខដែលយាមនៅក្នុងបុរីខាងលើបាននាំគ្នាទាញទុយោទឹកបាញ់ និងយកបំពង់ពន្លត់អគ្គីភ័យទៅបាញ់ពន្លត់។
ប៉ុន្តែដោយទ្វារផ្ទះវិឡាខាងលើបានជាប់សោ ទើបមិនអាចចូលទៅបាញ់ដល់ខាងក្នុងបាន បណ្តាលអោយអណ្តាតភ្លើងកាន់តែឆាបឆេះខ្លាំងទៅៗ រហូតប្រជាពលរដ្ឋសម្រេចចិត្តទម្លាយទ្វារផ្ទះខាងលើ រួចក៏បានរាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គីភ័យឲ្យមកជួយអន្តរាគមន៍ មានរថយន្តពន្លត់អគ្គីភ័យរបស់ស្នងការនគរបាលរាជធានីភ្នំពេញបានមកដល់កន្លែងកើតហេតុ និងបានធ្វើការបាញ់ពន្លត់ជាបន្តបន្ទាប់ រហូតបាញ់ទឹកពន្លត់អស់ចំនួន១៦គ្រឿង ទើបរលត់ទៅវិញជាស្ថាពរ គឺបានរលត់នៅវេលាម៉ោង១១និង៥០នាទីយប់ថ្ងៃដដែល។
តាមសម្តីពីបុរសម្នាក់ឈ្មោះ គួន ហេង ដែលជាអ្នកជួលផ្ទះវិឡាភ្លោះខាងលើបានរៀបរាប់ប្រាប់
អោយដឹងថា ផ្ទះវិឡាភ្លោះខាងលើនេះគឺគាត់បានមកជួលស្នាក់នៅជាមួយក្រុមគ្រួសាររបស់គាត់ ដែលមានគ្នាសរុបចំនួន៧នាក់អស់រយៈពេលជិត៣ខែមកហើយ។ កន្លងមកផ្ទះខាងលើនេះ តែងតែមានការលោតឌីហ្សង់ទ័រជាញឹកញាប់ ហើយគាត់ក៏បានជូនដំណឹងនេះទៅផ្ទះម្ចាស់ផ្ទះជាច្រើនដងមកហើយដែរ ។
នៅមុនពេលកើតហេតុ គាត់និងក្រុមគ្រួសាររបស់គាត់បាននាំគ្នាចេញទៅញ៉ាំអាហារនៅខាងក្រៅ ដោយបានចាក់សោទ្វារផ្ទះចោល។ លុះរហូតដល់វេលាកើតហេតុ ស្រាប់តែម្ចាស់ផ្ទះបានទូរស័ព្ទមកប្រាប់គាត់ថាភ្លើងកំពុងឆេះផ្ទះវិឡា ភ្លាមនោះគាត់ក៏ប្រញាប់ប្រញាល់ត្រឡប់មកវិញ លុះពេលមកដល់ផ្ទះរបស់គាត់ត្រូវបានភ្លើងកំពុងឆាបឆេះអស់ស្ទើរទាំងស្រុងទៅហើយ។
ប្រភពពីសមត្ថកិច្ចបានអោយដឹងថា នៅក្នុងករណីអគ្គីភ័យខាងលើនេះ មិនបណ្តាលឲ្យមានអ្នករងរបួស ឬឆេះរាលដាលដល់ផ្ទះអ្នកជិតខាងនោះទេ គឺខូចខាតតែផ្ទះកើតហេតុដែលមានចំនួនបីជាន់ និងសម្ភារៈជាច្រើនទៀតដែលនៅក្នុងផ្ទះវិឡានេះត្រូវបានភ្លើងឆេះខូចខាតអស់ស្ទើរទាំងស្រុង នៅសល់តែសម្ភារៈមួយចំនួនតូច រួមទាំងទូដែកមួយគ្រឿងដែលមានរបស់របរមានតម្លៃ រួមជាមួយប្រាក់សុទ្ធរាប់ម៉ឺនដុល្លារដែលមិនត្រូវភ្លើងឆាបឆេះ។ ករណីខាងលើសមត្ថកិច្ចសន្និដ្ឋានថាបណ្ដាលមកពីឆ្លងចរន្តអគ្គិសនីទុសេខ្សែភ្លើង ៕
ចែករំលែកព័តមាននេះ