ខេត្តបាត់ដំបង ៖ មន្ត្រីរាជការមួយចំនួននៅក្នុងជួររដ្ឋបាលស្រុកមោងប្ញស្សី បានរងការចោទប្រកាន់ពីប្រជាពលរដ្ឋថា បាននិងកំពុងនាំគ្នាដណ្ដើមកាន់កាប់ដីព្រៃលិចទឹកយ៉ាងអនាធិបតេយ្យ នៅក្នុងតំបន់២ និងតំបន់៣នៃដែនទន្លេសាប ស្ថិតក្នុងភូមិសាស្ត្រឃុំជ្រៃ ស្រុកមោងប្ញស្សី តាមរយៈការប្រើប្រាស់គ្រឿងចក្រជីកកកាយជាប្រឡាយធ្វើព្រំ វាទយកដីព្រៃលិចទឹកទាំងនោះ ដោយក្នុងម្នាក់ៗរាប់សិបហិកតា ដោយមិនខ្វាយខ្វល់អំពីច្បាប់ទម្លាប់ ដែលខ្លួនឯងកំពុងប្រតិបត្តិសព្វថ្ងៃនេះឡើយ ។
ប្រជាពលរដ្ឋបានឱ្យដឹងថា តំបន់ដីព្រៃលិចទឹកដែលក្រុមមន្ត្រីសាលាស្រុកមោងប្ញស្សី និងសមត្ថកិច្ចមួយចំនួន កំពុងឈូសឆាយរំលោភយកធ្វើជាកម្មសិទ្ធិផ្ទាល់ខ្លួននាពេលនេះ មាននៅចំណុច«រាំងអង្ក្រង ខ្ទុមតូច អណ្ដូងថ្កូវ អណ្ដូងស្នោរ និងនៅខាងជើងឈៀងខាងកើតចុងអូរតាចាន់» ។ ចំណុចទាំងនេះ មានស្ថិតក្នុងភូមិសាស្ត្រ ភូមិដូនទ្រី និងភូមិអង្គ្រង ឃុំជ្រៃ ស្រុកមោងឬស្សី។
ចំណុចខ្លះស្ថិតក្នុងតំបន់២ និងចំណុចខ្លះទៀតស្ថិតក្នុងតំបន់៣ ដែលជាតំបន់ត្រូវហាមឃាត់ ។ ប្រភពដដែលបានឲ្យដឹងទៀតថា ក្រុមអ្នកទន្ទ្រានកាន់កាប់ដីព្រៃលិចទឹកទាំងនោះ ភាគច្រើនជាមន្ត្រីនិងសមត្ថកិច្ចមួយចំនួននៅជួររដ្ឋបាលស្រុកមោងប្ញស្សី រីឯពលរដ្ឋមានចំនួនតិចតួច ហើយក៏មិនអាចវាទយកដីបានច្រើនហិកតា ដូចមន្ត្រីខិលខូចមួយចំនួននៅសាលាស្រុកដែរ ។
បើតាមព័ត៌មានដែលកោះសន្តិភាពទទួលបានក្រៅផ្លូវការ ជាបន្តបន្ទាប់នាប៉ុន្មានថ្ងៃកន្លងទៅនេះ ពីពលរដ្ឋផងនិងមន្ត្រីរាជការមួយចំនួនផង អំពីបញ្ជីឈ្មោះមន្ត្រីខិលខូចដែលកំពុងទន្ទ្រានកាន់កាប់ដីព្រៃលិចទឹកយ៉ាងគគ្លើននៅក្នុងតំបន់ខាងលើនាបច្ចុប្បន្ននេះ មានដូចជា លោកនូ ស៊ីធឿន សមាជិកក្រុមប្រឹក្សាស្រុកមោង
ប្ញស្សី, លោកពេជ្រ ម៉ាឡៃ អតីតអភិបាលស្រុកមោងប្ញស្សី, លោកប្រាក់ ងួន កងរាជអាវុធហត្ថស្រុកមោងប្ញស្សី និងឈ្មោះថាច់ ស៊ន ជាប្អូនលោកមេឃុំជ្រៃ ហើយក៏នៅមានមន្ត្រីនគរបាល មន្ត្រីកងរាជអាវុធហត្ថ និងមន្ត្រីមានអំណាចមួយចំនួនទៀតនៅថ្នាក់ខេត្ត ក៏មានចំណែកដី ឬកំពុងស្ថិតនៅពីក្រោយខ្នងនៃបទល្មើលនេះដែរ ។
ជុំវិញមន្ត្រីដែលមានឈ្មោះក្នុងបញ្ជីខ្មៅ ពាក់ព័ន្ធនឹងការរំលោភបំពានដីរដ្ឋនៅតំបន់ទន្លេសាបនេះ កោះសន្តិភាពបានព្យាយាមសុំការបំភ្លឺច្រើនលើកច្រើនសារ តាមរយៈទូរស័ព្ទនាប៉ុន្មានថ្ងៃកន្លងទៅនេះ តែមិនអាចយកជាផ្លូវការបានឡើយ ។ បុគ្គលខ្លះ បានឆ្លើយតបថា «ច្រឡំលេខ» រីឯបុគ្គលខ្លះទៀតបានបិទទូរស័ព្ទជាស្ថាពរតែម្ដង ។ ជាពិសេស លោកនូ ស៊ីធឿន តែម្ដង ដែលបានបិទទូរស័ព្ទមិនព្រមបើកដំណើរការឡើយ នាប៉ុន្មានថ្ងៃចុងក្រោយនេះ ខណៈបុគ្គលពាក់ព័ន្ធខ្លះទៀតមិនអាចស្វែងរកទំនាក់ទំនងបានដែរ។
ប៉ុន្តែលោកទេព ហន អភិបាលស្រុកមោងប្ញស្សីមិនបានបដិសេធទេ ចំពោះការចោទប្រកាន់របស់ពលរដ្ឋដែលថា មន្ត្រីរដ្ឋបាលស្រុករបស់លោកមួយចំនួនកំពុងទន្ទ្រានកាន់កាប់ដីព្រៃលិចទឹកនៅតំបន់ទន្លេសាបដោយខុសច្បាប់ ។ លោកទេព ហន អភិបាលស្រុកមោងឬស្សី បានប្រាប់កោះសន្តិភាព តាមទូរស័ព្ទ នៅព្រឹកថ្ងៃទី២២ មករា ថា «ខ្ញុំបានទទូលព័ត៏មាននេះ…ពិតជាមានរឿងឈូសឆាយរំលោភដីព្រៃនៅតំបន់ខាងលើនេះមែន តែខ្ញុំមិនទាន់ច្បាស់លាស់ទាំងស្រុងទេ ព្រោះខ្ញុំទើបចូលកាន់តំណែងថ្មី»។
លោកអភិបាលស្រុករូបនេះបានបន្តថា កាលពីថ្ងៃទី២១ មករា មន្ត្រីស្រុកមួយចំនួនបានចុះទៅកាន់តំបន់ដែលមានការឈូសឆាយទាំងនោះ ដើម្បីស្រាវជ្រាវរកឈ្មោះអ្នកពាក់ព័ន្ធ និង អ្នកនៅពីក្រោយខ្នង ថែមទាំងពិនិត្យស្ថានភាពជាក់ស្ដែង ។ លោកបានបញ្ជាក់ថា ពេលដែលមន្ត្រីរបស់លោកចុះទៅមិនឃើញមានគ្រឿងចក្រឈូសឆាយដីព្រៃទេ។ គ្រឿងចក្រអាចរំដោះចេញផុត មុនពេលមន្ត្រីលោកចុះទៅដល់ ដែលបន្សល់នៅតែស្នាមឈូសឆាយព្រៃ និងកាយជាប្រឡាយតូចៗ តែទំនងទើបដកចេញថ្មីៗទេ ។
ព័ត៌មានលម្អឹតនឹងមានផ្សាយជូនបន្ត ។
ចែករំលែកព័តមាននេះ