ខេត្តប៉ៃលិន ៖ ដោយសង្កេតឃើញផ្លូវថ្នល់មានការប្រឡាក់ដីកាន់តែខ្លាំង និងបង្កទៅជាហុយ លំបាកក្នុងការធ្វើដំណើរទៅមករបស់ប្រជាពលរដ្ឋព្រមទាំងត្រៀមរៀបចំសម្រាប់ទទួលសម្តេចកិត្តិព្រឹទ្ធបណ្ឌិតដែលនឹងអញ្ជើញមកខេត្តប៉ៃលិននៅថ្ងៃទី២២-២៥ ខែមករា ឆ្នាំ២០១៩ ឆាប់ៗខាងមុខនេះកម្លាំងនគរបាលនៃអធិការស្រុករួមជាមួយនឹងអាជ្ញាធរស្រុកសាលាក្រៅបានសស្រាក់សស្រាំយករថយន្តទៅស្រោចលាងជម្រះ និងដាំដើមផ្កាលម្អផ្លូវផងដែរ នៅថ្ងៃទី១៥ ខែមករា ឆ្នាំ២០១៩ ស្ថិតនៅផ្លូវជាតិលេខ៥៩ ក្នុងបរិវេណរង្វង់មូលសាលាក្រៅ ឃុំសាលាក្រៅ ស្រុកសាលាក្រៅ ។
ប្រភពព័ត៌មានពីលោក រី តារា អធិការស្តីទីនគរបាលអធិការស្រុកសាលាក្រៅបានឱ្យដឹងថា ដោយខេត្តប៉ៃលិននឹងរៀបចំទទួលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន អញ្ជើញចូលមកក្នុងខេត្តប៉ៃលិនទើបកម្លាំងអធិការដ្ឋាននគរបាលស្រុកសាលាក្រៅដឹកនាំដោយលោក សំ សារ៉េត អភិបាលស្រុកបានចុះធ្វើការស្រោចទឹកលាងផ្លូវឱ្យជ្រះល្អ និងដើម្បីបង្ហាប់ដីដាំស្មៅនៅលើទ្រូងផ្លូវសម្រាប់ជាសោភ័ណភាពទីរួមស្រុកឱ្យទាក់ទាញភ្ញៀវទេសចរណ៍ជាតិ និងអន្តរជាតិ ។
លោកបន្តទៀតថា ខណៈខេត្តប៉ៃលិនកំពុងរៀបចំធ្វើការអភិវឌ្ឍន៍ស្ទើរគ្រប់វិស័យ ជាពិសេសហេដ្ឋារចនាសម្ព័ន្ធ ផ្លូវថ្នល់ សាលារៀន ទើបរហូតមកដល់ព្រឹកថ្ងៃដដែលនេះខាងលោកក៏បានចាត់ឱ្យកម្លាំងនគរបាលចុះជួយបោសសម្អាត និងលាងផ្លូវតែម្តង ។
ម្យ៉ាងវិញទៀតខាងអាជ្ញាធរ ខិតខំប្រឹងប្រែងដាំស្មៅ និងផ្កាភ្ញីនៅលើទ្រូងផ្លូវជាហូរហែតាំងពីទីរួមខេត្តរហូតដល់ទីរួមស្រុកដើម្បីបង្កើនភាពទាក់ទាញឱ្យកាន់តែខ្លាំងឡើង ៕
ចែករំលែកព័តមាននេះ