ប្រទេសកូរ៉េខាងជើង-ចិន ៖ បណ្ដាសារព័ត៌មានកូរ៉េខាងត្បូងរាយការណ៍ថា មេដឹកនាំកូរ៉េខាងជើង លោកគីមជុងអ៊ុននាថ្ងៃទី៧មករា បានធ្វើដំណើរមកបំពេញទស្សនកិច្ចថ្មីមួយនៅប្រទេសចិន ដែលនៅទិីនោះលោកជួបគ្នាកំពូលលើកទី៤ជាមួយប្រធានាធិបតីចិនលោកស៊ីជីនពីង។
ដកស្រង់ប្រភពមួយរបស់ផ្នែកទទួលបន្ទុកទំនាក់ទំនងអន្តរកូរ៉េ កាសែតកូរ៉េខាងត្បូងHANKYOREHរៀបរាប់ថា លោកគីមជុងអ៊ុនមកកាន់ក្រុងប៉េកាំងដើម្បីជួបជាមួយលោកសីុជីនពីង។ ចំណែកទីភ្នាក់ងារព័ត៌មានកូរ៉េខាងត្បូងYONHAP ដែលដកស្រង់ប្រភពមួយរបស់ផ្នែកទទួលបន្ទុកបញ្ហាកូរ៉េខាងជើង រាយការណ៍ថារថភ្លើងមួយដែលដឹកអ្នកទទួលខុសត្រូវជាន់ខ្ពស់មួយរូប បានបើកឆ្លងកាត់ព្រំដែនចិន។
ភ្នាក់ងារនោះពុំអះអាងថានរណាពិតប្រាកដស្ថិតក្នុងរថភ្លើងនេះឡើយ ប៉ុន្តែថា មានរថយន្តច្រើនសិបគ្រឿងនិងបណ្ដាភ្នាក់ងារសន្តិសុខបានរាំងខ្ទប់ផ្លូវថ្នល់នានា នៅក្បែរស្ថានីយរថភ្លើងក្រុងដានដុង ជាទីីក្រុងចិននៅជាប់ព្រំដែនជាមួយកូុរ៉េខាងជើង ពេលរថភ្លើងនោះឆ្លងកាត់។
ចំណែកប្រភពការទូតនិយាយថា លោកសីុជីនពីីងពិតណាស់នាពេលខាងមុខនឹងទៅកាន់កូរ៉េខាងជើង។ ពេលនោះលោកនឹងក្លាយជាមេដឹកនាំចិនដំបូូងគេទៅកាន់ប្រទេសនេះ ចាប់តាំងពីឆ្នាំ២០០៥មក។
ទីភ្នាក់ងារព័ត៌មានផ្លូវការកូរ៉េខាងជើងKCNAរាយការណ៍នាថ្ងៃទី៨មករាថា លោកគីមជុងអ៊ុនកំពុងតែបំពេញទស្សនកិច្ចរយៈពេល៤ថ្ងៃមួយនៅចិន តាមការអញ្ជើញរបស់ប្រធានាធិបតីចិនលោកស៊ីជីនពីង។ ទស្សនកិច្ចនោះរបស់លោកគីម មានទិសដៅពិភាក្សាពីយុទ្ធសាស្ត្រនានា នៃការចរចាជាមួយសម្ព័ន្ធមិត្តជិតដិតបំផុត មុនការជួបគ្នាកំពូលលើកទី២ជាយថាហេតុជាមួយប្រធានាធិបតីអាមេរិក លោកដូណាល់ត្រាំនាពេលដ៏ឆាប់ខាងមុខ។
តាមKCNAថាលោកគីមនិងភរិយាលោកស្រី រីសូលជូបានចេញដំណើរមកកាន់ប្រទេសចិន កាលពីរសៀលថ្ងៃទី៧មករា អមដោយបណ្ដាអ្នកទទួលខុសត្រូវជាន់ខ្ពស់របស់បក្សរដ្ឋាភិបាលនិងកងទ័ព។ រយៈពេល៤ថ្ងៃនៃទស្សនកិច្ចនេះ លោកគីមជួបជាមួយលោកសីុពិភាក្សាគ្នាជាពិសេសពីការជួបគ្នាកំពូលលើកទី២ រវាងលោកត្រាំនិងលោកគីម។ កាលពីឆ្នាំទៅមិញ លោកគីមជុងអ៊ុនបានមកកាន់ចិនដល់ទៅ៣ដង ដើម្បីជួបជាមួយលោកស៊ីជីនពីង។
រីឯកាសែតកូរ៉េខាងត្បូងMUNHWA ILBOរាយការណ៍នាពេលថ្មីៗនេះថា បណ្ដាអ្នកទទួលខុសត្រូវ នៃក្រសួងការបរទេសអាមេរិក បានមកជួបជាច្រើនលើកជាមួយបណ្ដាអ្នកទទួលខុសត្រូវកូរ៉េខាងជើង នាទីក្រុងហាណូយ ដើម្បីនិយាយពីការរៀបចំ ការជួបគ្នាកំពូលថ្មីរវាងលោកដូណាល់ត្រាំនិងលោកគីមជុងអ៊ុន ដែលនាំឲ្យគេគិតថាការជួបគ្នាកំពូលថ្មីនោះអាចធ្វើនៅវៀតណាម៕
ចែករំលែកព័តមាននេះ