ប្រទេសម៉ាឡេស៊ី ៖ ព្រះបរមរាជវាំងម៉ាឡេស៊ីប្រកាសនាថ្ងៃទី៦មករា ពីការដាក់រាជ្យរបស់ព្រះមហាក្សត្រMUHAMMADទី៥ បីឆ្នាំមុនព្រះអង្គចប់រាជ្យនិងបន្ទាប់ពីច្រើនសប្ដាហ៍លេចពាក្យចចាមអារ៉ាមពីព្រះអង្គរៀបអភិសេកជាមួយបវរកញ្ញារុស្សុីអាយុ២៥ឆ្នាំមួយរូប។
ព្រះមហាក្សត្រម៉ាឡេស៊ីអង្គនោះឡើងគ្រងរាជ្យកាលពីខែធ្នូឆ្នាំ២០១៦ ជាព្រះមហាក្សត្រទី១៥របស់ម៉ាឡេស៊ី។ យោងតាមរដ្ឋធម្មនុញ្ញក្នុងចំណោមស៊ុលតង់រដ្ឋទាំង៩ ស៊ុលតង់មួយអង្គៗឡើងគ្រងរាជ្យដូរវេនគ្នាម្តងម្នាក់៥ឆ្នាំម្ដង ។
កាលពីថ្ងៃទី២២វិច្ឆិកាកន្លងទៅព្រះចៅ MUHAMMAD FARIS PETRA ព្រះជន្ម៤៩ព្រះវស្សា បានចាប់គៀកដៃអតីតបវរកញ្ញារុស្ស៊ីម្នាក់នាង OKSANA VOEVODINA នាឱកាសនៃពិធីដឺលុចមួយនៅទីក្រុងមូស្គូ ដោយគេចាត់ទុកពិធីនោះថាជាពិធីអភិសេករបស់អ្នកទាំង២។ បណ្ដារូបភាពបង្ហាញព្រះមហាក្សត្រអង្គនោះ គ្រងសម្លៀកបំពាក់ប្រពៃណីម៉ាឡេស៊ី គង់ក្បែរនារីអាយុ២៥ឆ្នាំរូបនោះ ដែលជាបវរកញ្ញាក្រុងមូស្គូឆ្នាំ២០១៥ ស្លៀកពាក់រូបពណ៌សនិងមានស្បៃបិទមុខ ព័ទ្ធជុំវិញដោយផ្កានិងភ្ញៀវទាំងឡាយ។
សម្រាប់ពេលនេះការពិតពីការរៀបអភិសេកនៅរុស្ស៊ីនោះ ពុំទាន់មានការអះអាងនៅឡើយ ទាំងមហេសីមុនរបស់ទ្រង់ជាម្ចាស់ក្សត្រីថៃមួយអង្គ ដែលលែងលះគ្នាចាប់តាំងពី១០ឆ្នាំមកហើយ ទាំងដោយព្រះបរមរាជវាំង។ ចាប់តាំងពីពេលនោះមក ព្រះមហាក្សត្រអង្គនេះបានអវត្តមានជាផ្លូវការដោយថាជាប់ព្យាបាលព្រះរោគ ហើយព្រះចៅស៊ុលតង់PERAK ជាព្រះមហាក្សត្រស្ដីទី។
នេះជាលើកដំបូងដែលព្រះមហាក្សត្រម៉ាឡេស៊ីមួយអង្គទ្រង់ដាក់រាជ្យ ចាប់តាំងពីម៉ាឡេស៊ីទទួលបានឯករាជ្យពីអង់គ្លេសកាលពីឆ្នាំ១៩៥៧មក។ ម៉ាឡេស៊ីជាព្រះរាជាណាចក្រអាស្រ័យរដ្ឋធម្មនុញ្ញ មានគំរូខុសប្លែកពីគេតែមួយគត់លើពិភបលោក។ ព្រះមហាក្សត្រត្រូវដូររៀងរាល់៥ឆ្នាម្ដង ហើយជ្រើសរើសក្នុងចមណោមគ្រូសាររាជវង្ស ដែលដឹកនាំរដ្ឋ៩ ក្នុងចំណោមរដ្ឋទាំង១៣របស់ប្រទេស។
ព្រះបរមរាជវាំងប្រកាសថា ព្រះមហាក្សត្រទ្រង់ដាក់រាជ្យ ក្នុងឋានៈជាព្រះមហាក្សត្រទី១៥ និងថាការសម្រេចនោះចូលជាធរមានចាប់ពីថ្ងៃទី៦មករាទៅ។ ក្នុងសេចក្ដីប្រកាសមួយព្រះបរមរាជវាំងពុំបានផ្ដល់ហេតុផលណាមួយ នៃការចាកចេញរបស់ទ្រង់ឡើយ។ ប៉ុន្តែតាមមើលទៅគ្មានអ្វីក្រៅពីទ្រង់ទៅរៀបអភិសេកជាមួយអតីតបវរកញ្ញារុស្ស៊ីនោះឡើយ៕
ចែករំលែកព័តមាននេះ