ខេត្តកំពង់ចាម ៖ រឿងរ៉ាវគួរឱ្យអាម៉ាស់របស់ឧកញ៉ាថៃ ដៃមឹកក្នុងរឿងបង្កហេតុជាមួយនារីបំរើការងារក្នុងខារ៉ាអូខេនោះ ត្រូវបានបញ្ចប់ហើយ។
គួរកត់សម្គាល់ថា អតីតឈ្មួញរកស៊ីឈើដ៏ល្បីនៅស្រុកអូររាំងឪ គឺឧកញ៉ាថៃ ដែលបានមកចូលខារ៉ាអូខេយីហោ «វីឡា» ស្ថិតនៅក្នុងសង្កាត់វាលវង់ ក្រុងកំពង់ចាម កាលពីយប់ថ្ងៃទី០៥ មករា ២០១៩ ដោយជាប់ចោទបានប្រើអំពើហិង្សាលើស្ត្រីរត់តុម្នាក់ក្នុងបន្ទប់លេខ៦៦៦៦ ហើយត្រូវបានកម្លាំងអាវុធហត្ថនិងនគរបាលបានចុះមកអន្តរាគមន៍នាំខ្លួនមកកាន់ស្នងការដ្ឋាននគរបាលខេត្តទាំងយប់ ដើម្បីសួរនាំ។ ហើយបានបង្កឲ្យមានការភ្ញាក់ផ្អើលពេញក្រុងកំពង់ចាម ព្រោះនេះជាលើកទី០១ហើយ ដែលមានឧកញ៉ា ត្រូវបាននាំខ្លួនបែបនេះ ហើយក៏មិនធ្លាប់កើតមាននៅតាមហាងខារ៉ាអូខេណាមួយនាពេលកន្លងមក ក្នុងក្រុងកំពង់ចាម។
សូមបញ្ជាក់ថា ក្រោយពីមានហេតុការណ៍កើតឡើងខាងលើ រហូតមកដល់ព្រឹកថ្ងៃទី០៦ មករា ភ្នាក់ងារកោះសន្តិភាពបានព្យាយាមទាក់ទងមកលោកនាយការិយាល័យព្រហ្មទណ្ឌកំរិតស្រាលខេត្តជាច្រើន
លើក ថែមទាំងមកដល់ព្រឹកថ្ងៃទី០៧ មករា ២០១៩ ដើម្បីចង់ដឹងពីរឿងរបស់លោកឧកញ៉ាថៃ ដោយបានឆ្លើយថា រវល់ជាប់ប្រជុំមិនចង់និយាយនោះទេ សូម្បីតែចូលទៅយកព័ត៌មានក៏មិនឲ្យចូលដែរ។
ទោះបីជារឿងដែលបានកើតឡើងនៅក្នុងហាងខារ៉ាអូខេវីឡានោះ សមត្ថកិច្ចហាក់បីដូចជាព្យាយាមបិទបាំងមិនចង់ឲ្យមានព័ត៌មានលេចចេញមកខាងក្រៅក្តី ក៏កោះសន្តិភាពបានដឹងពីប្រភពព័ត៌មានពីនគរបាលតូចតាចខ្លះដែរ ។
តែទោះជាជាប់ចោទបទហិង្សាក៏ដោយ នៅយប់ថ្ងៃទី០៦ មករា ឧកញ៉ាថៃ អតីតឈ្មួញរកស៊ីឈើដ៏ល្បីនៅស្រុកអូររាំងឪ ខេត្តត្បូងឃ្មុំ ត្រូវបានប៉ូលិសដោះលែងឲ្យត្រឡប់ទៅផ្ទះវិញ ដោយមានការសងជាសំណងទៅឲ្យស្ត្រីរងគ្រោះនៅខារ៉ាអូខេវីឡា តែមិនដឹងជាចំនួនប៉ុន្មាននោះទេ ត្រូវបានគេលាក់បិទជិតយ៉ាងល្អ សូម្បីតែលោកសត្យា បងប្រុសរបស់អ្នករងគ្រោះក៏មិនបានឆ្លើយប្រាប់ដែរ ដោយលើកហេតុផលថា រវល់ៗ ។
គេថា មុននឹងឲ្យលោកឧកញ៉ាល្បីល្បាញខាងលើចេញទៅវិញ ក៏បានផ្តិតមេដៃសរសេរលាយលក្ខណ៍អក្សរ ដោយបានសុំទោសជាសាធារណៈនូវរឿងហេតុដែលបានកើតឡើងនោះ ។ ដោយឡែកថៅកែហាងខារ៉ាអូខេវីឡាក៏បានបិទទូរស័ព្ទដោយមិនអាចទាក់ទងសុំការបំភ្លឺបានទេ ព្រឹកថ្ងៃទី០៧ មករា ២០១៩ ហាក់បីដូចលាក់នូវរឿងហេតុខាងលើ ។
សូមបញ្ជាក់ថា នៅព្រឹកថ្ងៃទី០៧ មករា ដំបូងមានគេអះអាងច្បាស់ថា ឧកញ៉ាថៃ នឹងត្រូវបានបញ្ជូនខ្លួន
មកតំណាងអយ្យការអមសាលាដំបូងខេត្ត តែមិនបានដូច្នោះទេ សូម្បីតែស្រមោលឧកញ៉ាក៏មិនបាន
ឃើញ ទ្វាររបងសាលាដំបូងខេត្តត្រូវបានបិទ ព្រោះចំថ្ងៃបុណ្យឈប់សំរាក ដោយបើកតែម្ខាង។
ព័ត៌មានពិស្តារនឹងមានផ្សាយជូននៅកាសែតកោះសន្តិភាព
ចែករំលែកព័តមាននេះ