ប្រទេសថៃ ៖ មនុស្សជិត៣០.000 នាក់កាលពីចុងសប្ដាហ៍នាំគ្នា រត់ភៀសខ្លួនទៅកាន់ជម្រកនានា ក្រោយទឹកជំនន់និងការដាច់ភ្លើង បណ្ដាលមកពីការវាយប្រហាររបស់ព្យុះឈ្មោះPABUK ខណៈបណ្ដាកោះទេសចរណ៍ថៃក្នុងឈូងសមុទ្រថៃគេចផុតពីភ្នែកព្យុះនេះ។ PABUKជាព្យុះត្រូពីកាល់ដំបូងគេវាយប្រហារលើថៃចាប់តាំងពិី៣០ឆ្នាំមកហើយ នាំឲ្យមានខ្យល់បោកបក់ខ្លាំង…
ប្រទេសថៃ ៖ មនុស្សជិត៣០.000 នាក់កាលពីចុងសប្ដាហ៍នាំគ្នា រត់ភៀសខ្លួនទៅកាន់ជម្រកនានា ក្រោយទឹកជំនន់និងការដាច់ភ្លើង បណ្ដាលមកពីការវាយប្រហាររបស់ព្យុះឈ្មោះPABUK ខណៈបណ្ដាកោះទេសចរណ៍ថៃក្នុងឈូងសមុទ្រថៃគេចផុតពីភ្នែកព្យុះនេះ។
PABUKជាព្យុះត្រូពីកាល់ដំបូងគេវាយប្រហារលើថៃចាប់តាំងពិី៣០ឆ្នាំមកហើយ នាំឲ្យមានខ្យល់បោកបក់ខ្លាំង មានល្បឿនដល់ទៅ៧៥គីឡូម៉ែត្រក្នុងមួយម៉ោង ហើយរលកសមុទ្រមានកម្ពស់ពី៣ដល់៥ម៉ែត្រព្រមទាំងភ្លៀងធ្លាក់ខ្លាំង បណ្ដាលឲ្យមានទឹកជំនន់ច្រើនកន្លែង។ តុល្យការនៃព្យុះនោះដែលបោកបក់ចាប់តាំងពីថ្ងៃទី៣មករាមក អ្នកស្លាប់មាន៤នាក់ហើយមនុស្សម្នាក់បាត់ខ្លួន។ ព្យុះនោះនាំឲ្យមានការជម្លៀសអ្នកទេសចរចេញច្រើនពាន់នាក់ និងនាំឲ្យមានការស្ទះនៅតាមកោះទេសចរថៃទាំងឡាយ ព្រោះបណ្ដាជើងហោះហើរនៃយន្តហោះត្រូវលុបចោល។
កាលពីឆ្នាំ១៩៨៩ព្យុះទីហ្វុងមួយឈ្មោះGAYវាយប្រហារលើតំបន់នោះ ក្នុងដំណាក់កាលដូចគ្នានេះដែរ បណ្ដាលឲ្យមនុស្សស្លាប់ច្រើនរយនាក់។
ព្យុះPABUKកាលពីព្រឹកថ្ងៃទី៥មករាបានចុះថមថយកម្លាំងមកជាវិសម្ពាធមួយ ហើយរំកិលទៅលើសមុទ្រANDAMAN ដែលនៅទីនោះមានទីតាំងទេសចរណ៍ កោះក្រាប៊ីនិងកោះភូកេតមុនពេលចាកចេញពីប្រទេសថៃ។ មុននេះភ្នែកព្យុះនោះបានចៀសផុតដោយប្រផិតប្រផើយកោះសាមុយ កោះផាន់ហ្គាននិងកោះតាវ ក្នុងឈូងសមុទ្រថៃ។ កោះទាំងនោះពេញនិយមបំផុតសម្រាប់ពួកអ្នកទេសចរនាដំណាច់ឆ្នាំ។ អ្នកទេសចរច្រើនរយនាក់នៅជាប់លើកោះទាំងនោះ ខណៈនាវាត្រូវស្ថិតនៅកំពង់ផែខ្លាចព្យុះ រួចព្រលានយន្តហោះតំបន់ត្រូវបិទ។ អ្នកទេសចរមួយចំនួនអាចចាកចេញនាថ្ងៃទី៥មករា ជាមួយការបើកឡើងវិញព្រលានយន្តហោះនិងសេវាកម្មនាវាដឹកជញ្ជូន។
លោកKRIKKRAI SONGTHANEE អភិបាលស្រុកកោះផានហ្គានជាកោះទេសចរណ៍សំខាន់មួយនិយាយថា អ្វីៗត្រូវបានបញ្ចប់ហើយ។ អ្នកទេសចរ១០.០០០នាក់ស្ថិតលើកោះរបស់យើងដោយសុខសប្បាយ។លោកបន្តថាខ្យល់បោកបក់ខ្លាំងបណ្ដាលឲ្យមានការខូចខាតខ្លះប៉ុណ្ណោះ។
អាជ្ញាធរថៃបានចេញការព្រមានជាច្រើនហើយបើកជម្រកនានាខ្លាចក្រែនកើតមានការខូចខាតធ្ងន់ធ្ងរ។ នៅលើដីមកពីការបាក់ដើមឈើនិងរលំបង្គោលភ្លើង មនុស្សជាង២០០.០០០គ្រួសារគ្មានអគ្គិសនីប្រើ ក្នុងខេត្ត៤ពិសេសខេត្តណាខនសីុថាមរ៉ាតនិងខេត្តស៊ូរ៉ាតថានី ដែលរងការប៉ះពាល់ខ្លាំងដោយសារព្យុះនោះ៕
ចែករំលែកព័តមាននេះ