រាជធានីភ្នំពេញ៖ តារាចម្រៀងបែបយុវវ័យកញ្ញា ពេជ្រ សូលីកា បានបង្ហាញវត្តមានក្នុងផលិតកម្មរស្មីហង្ស មាស ជាមួយនឹងអតីតតារារួមទ្រនំគឺលោកណុប សម្បត្តិនីកូ ហៅនីកូ ។
សម្រាប់តារាស្រីដែលទើបតែចូលវិស័យសម្ដែង និងចម្រៀងឡើងវិញ ពេជ្រ សូលីកា ធ្លាប់បានចូលជ្រកកោននៅក្រោមដំបូលផលិតកម្មរស្មីហង្សមាសម្ដងរួចមកហើយ ប៉ុន្តែត្រូវហង្សមាសបញ្ឈប់ទាំងកណ្តាលទីកាលពីឆ្នាំ២០១០ ខណៈដែលបទចម្រៀងថតសម្តែង ជាមួយលោកឆន សុវណ្ណរាជ បានចំនួន១វ៉ុល (Solo Album) មិនត្រូវបានផលិតកម្មនេះបញ្ចេញឡើយរយៈពេលជាង៧ឆ្នាំមកនេះ ។
អ្នកតាមដានសកម្មភាពសិល្បៈបានឲ្យដឹងថា ទោះជាយ៉ាងណាក្តីការឈានជើងមកជាន់ទឹកដីហង្សមាសសាជាថ្មីរបស់ស្រីស្រស់ ពេជ្រ សូលីកា នាពេលនេះ នាងមិនទាន់ត្រូវហង្សមាស ប្រគល់ឲ្យថតបទចម្រៀងឡើងវិញទេ ដោយរុញស្រីស្អាតនេះទៅថតភាពយន្តជាមួយតារាចម្រៀង នីកូ តាមរយៈរឿង «អាពាហ៍ពិពាហ៍ចៃដន្យ» ដោយត្រូវប៉ះជាមួយរៀមច្បងសិល្បៈ គឺអ្នកស្រីឌី សាវ៉េត និងខាត់ សុឃីម ជាដើម ។
កាលពីពេលថ្មីៗកន្លងមកអ្នកសិល្បៈ បានលើកឡើងថា ពេជ្រ សូលីកា មិនមានចំណុចលើសខ្វះពីទេព បូព្រឹក្ស ឡើយ ប្រសិនបើហង្សមាសចង់លើកស្ទួយនាងសាជាថ្មីវិញនោះ ព្រោះទាំងរូបសម្រស់ ទឹកដមសំឡេង ការសម្តែងជាដើម ពេជ្រ សូលីកា ធ្វើបានល្អ ។
ហេតុនេះហើយបានជាមហាជនគិតថា តារាទាំង២ដួងនេះអាចនឹងមានការប្រជែងទីផ្សារគ្នាខ្លាំងជាមិនខាន ប្រសិនបើសូលីកា ត្រូវបានថៅកែហង្សមាស លើកនាងម្តងទៀតឲ្យល្បី ពោលគឺមិនពិបាកឡើយ ។
លោក នីកូ និង ពេជ្រ សូលីកា ធ្លាប់ជាគូច្រៀង និងគូសម្តែងដ៏សក្តិសម ។ ជាពិសេសនោះគឺអ្នកគាំទ្រចង់ឲ្យគាត់ទាំង២ ក្លាយជាគូស្នេហ៍ ពិតៗដោយបើកចំហ ។ ដោយសារអ្នកទាំងពី២មើលទៅសក្តិសមគ្នាណាស់ និងមានការទាក់ទងគ្នាស្អិតរមួតថែមទៀតផង ។
ជាក់ស្តែងកញ្ញា ពេជ្រ សូលីកា ធ្លាប់បញ្ជាក់ថា «ខ្ញុំគ្រាន់តែដឹងថាឥឡូវនេះខ្ញុំមានចិត្តទៅលើគាត់(នីកូ) ហើយក្រោយពីបងប្អូនអ្នកគាំទ្រគាត់ចាប់គូឲ្យ តែខ្ញុំអត់ដឹងថាអារម្មណ៍មួយនេះអាចរក្សាបានប៉ុនណានោះទេអាស្រ័យទៅលើពេលវេលានៅថ្ងៃខាងមុខទៀត»។
កំលោះសង្ហា នីកូ វិញកន្លងមកធ្លាប់និយាយថា ពេជ្រ សូលីកា គឺជានារីម្នាក់ចាំជួយផ្ដល់កម្លាំងចិត្តដល់លោកគ្រប់ពេលដែលមានបញ្ហាអ្វីមួយកើតឡើងចំពោះខ្លួន ។ មួយវិញទៀតពេលនៅក្បែរនាង ម្ដងៗលោកមានអារម្មណ៍ល្អសប្បាយច្រើនជាងកើតទុក្ខ ។ លើសពីនេះ នីកូ បានដាក់រហស្សនាមឲ្យដៃគូស្រីរបស់ខ្លួនថា Sushi Girl ទៀតផង ក្នុងឱកាសខួបកំណើតរបស់សូលីកា ៕
ចែករំលែកព័តមាននេះ