ខេត្ដពោធិ៍សាត់ ៖ កាលពីថ្ងៃទី២៥ ធ្នូ លោកឆាយ សារ៉េត ប្រធានក្រុមប្រឹក្សាខេត្ដ និងលោកជំទាវ រួមដំណើរដោយមេបញ្ជាការកងកម្លាំងប្រដាប់អាវុធទាំង៣ និងថ្នាក់ដឹកនាំមន្ទីរមួយចំនួនក្នុងខេត្ដបានអញ្ជើញសំណេះសំណាលសួរសុខទុក្ខ និងនាំយកអំណោយទៅចែកជូនដល់បងប្អូនប្រជាពលរដ្ឋ និងកងកម្លាំងការពារព្រំដែនគោកនៅឃុំ ថ្មដា ស្រុកវាលវែង ព្រំប្រទល់ខ្មែរ-សៀម ដែលមានចំងាយប្រមាណជិត២០០គីឡូម៉ែត្រ ពីក្រុងពោធិ៍សាត់ និងមានការលំបាកក្នុងការធ្វើដំណើរបំផុត ។
លោកឆេ ឈីវ អភិបាលស្រុកវាលវែង មានប្រសាសន៍ថា ការចុះសំណេះសំណាលសួរសុខទុក្ខកងទ័ព និងប្រជាពលរដ្ឋឃុំថ្មដានេះគឺជាការគិតគូររបស់លោកប្រធាន ក្រុមប្រឹក្សាខេត្ដ ដែលជានិច្ចកាលលោកតែងតែចុះមកជាញឹកញាប់ មិនថាកាល លោកនៅជាអភិបាលខេត្ដនោះទេ។ លោកឆេ ឈីវ បានឱ្យដឹងថា ឃុំថ្មដា ជាឃុំ មួយក្នុងចំណោមឃុំទាំង៥របស់ស្រុកវាលវែងនៅជាប់ព្រំប្រទល់ខ្មែរ-សៀម ផ្លូវធ្វើដំណើរមានការលំបាកខ្លាំងណាស់ក្នុងការឡើងភ្នំចុះភ្នំកំពស់១.៥០០ម៉ែត្រ ប្រថុយប្រថាននឹងគ្រោះថ្នាក់បំផុត ពិសេសនៅរដូវវស្សា ។ សណ្ឋានដីចែកចេញជាតំបន់ភ្នំ និងតំបន់ខ្ពង់រាប ។ តំបន់ភ្នំមានព្រៃឈើក្រាស់ សត្វព្រៃរស់នៅច្រើន និងជាកន្លែងអភិរក្ស ដែនជំរកសត្វព្រៃភ្នំសំកុស ឯតំបន់ខ្ពង់រាប សំរាប់ប្រជាជនរស់នៅប្រកបរបរកសិកម្មដាំ ដំណាំបន្លែផ្លែឈើ ចិញ្ចឹមសត្វ និងដំណាំ ឧស្សាហកម្មដូចជាពោត, សណ្ដែក, ដំឡូងមី និងដើមកៅស៊ូជាដើម ។ ឃុំថ្មដាកាលសម័យ សង្គ្រាមជាសមរភូមិក្ដៅ និងបន្សល់ទុកគ្រាប់ មីនកប់ក្នុងដីច្រើន ហើយសព្វថ្ងៃនេះក៏នៅតែ មានកងទ័ព ក៏ដូចជាប្រជាពលរដ្ឋដើរយាមល្បាត ឬកាប់ព្រៃធ្វើចំការផ្ទុះមីនស្លាប់ និងរងរបួសពិការជាញឹកញាប់ផងដែរ ។ លោកអភិបាលស្រុកបានឱ្យដឹងទៀតថា ប្រជាពលរដ្ឋ ដែលមកទទួលអំណោយថ្ងៃនេះមានចំនួន៣៧៣គ្រួសារ មកពីភូមិចំនួន៣ គឺភូមិសង្គម ថ្មី, ភូមិកណ្ដាល និងភូមិឯកភាព ។
លោកឆាយ រ៉េត ក្នុងនាមប្រធានក្រុម ប្រឹក្សាខេត្ដ និងជាទីប្រឹក្សាផ្ទាល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានសំដែង ទឹកចិត្ដរីករាយក្នុងដំណើរចុះមកសួរសុខទុក្ខ កងទ័ព និងប្រជាពលរដ្ឋនៅព្រំដែនខ្មែរ-សៀមនេះ ។ លោកបានញំនាំការផ្ដាំផ្ញើសួរសុខទុក្ខពីសំណាក់សម្ដេចទាំង៣ និងលោក ជំទាវ ប៊ុនរ៉ានី ហ៊ុន សែន ដែលសម្ដេច និងលោកជំទាវបានយកចិត្ដទុកដាក់អំពីជីវភាព រស់នៅ និងសុខទុក្ខគ្រប់ពេលវេលាចំពោះកងកម្លាំងការពារព្រំដែន និងប្រជាពលរដ្ឋនៅទីនេះ។ កងកម្លាំងរបស់យើងមានតួនាទីសំខាន់ ណាស់ក្នុងការការពារបូរណភាពទឹកដី និងអាយុជីវិតរបស់ប្រជាពលរដ្ឋ ហើយបើកន្លងមកគ្មានកងកម្លាំងការពារព្រំដែន និងប្រជាពលរដ្ឋរស់នៅទីនេះទេ ប្រាកដជាខ្មាំងសត្រូវចូលឈ្លានពានទឹកដីជាក់ជាមិនខាន ។ លោក ឆាយ សារ៉េត បានឱ្យដឹងថា អំណោយដែលនាំមកចែកជូននាពេលនេះ គឺជារបស់រាជរដ្ឋាភិបាល តាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទា និងមួយចំណែកទៀត ជារបស់លោកជំទាវ ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តាមរយៈលោកជាប្រធានក្រុមប្រឹក្សាខេត្ដផ្ទាល់។ អំណោយមនុស្សធម៌នេះទោះបីតិចតួចក្ដី ប៉ុន្ដែជាទឹកចិត្ដធំទូលាយ និងបានរួមចំណែក យ៉ាងសំខាន់ក្នុងការជួយសំរួលដល់ការលំបាក ខ្វះខាតរបស់បងប្អូនបានមួយកំរិតក្នុងរយៈ ពេលខ្លីផងដែរ។
អំណោយដែលចែកជូនដល់បងប្អូនប្រជាពលរដ្ឋក្នុងឃុំថ្មដា ស្រុកវាលវែងទាំង៣៧៣គ្រួសារនេះ គឺក្នុងមួយគ្រួសារទទួលបានអង្ករ២០គីឡូក្រាម, ក្រមា១, សារុង១ និងថវិកា៥.០០០រៀល ។ គ្រូពេទ្យ១០នាក់ និងគ្រូបង្រៀន១២នាក់ ក្នុងម្នាក់ៗទទួលបានសារុង១, ក្រមា១ និងថវិកា២០.០០០រៀល។ សិស្សានុសិស្សចំនួន២២៤នាក់ ក្នុងម្នាក់ៗ ទទួលបានសៀវភៅ២ក្បាល, ប៊ិច១ និង ថវិកា២.០០០រៀល ។ ដោយឡែកកងកម្លាំង ៣អង្គភាព មានកងការពារព្រំដែនគោក លេខ៥០១, វរសេនាតូចនគរបាលការពារព្រំដែនគោកលេខ៨២៥ និងវរសេនាតូចលេខ ៥០៨ ក្នុងមួយអង្គភាពទទួលបានមី៧៥កេស, បារី២ប៊ិច ព្រមទាំងបានប្រគេនអង្ករ៥០គីឡូក្រាម, មី១កេស និងថវិកា៥០.០០០រៀល ដល់វត្ដថ្មដាផងដែរ ។
សូមបញ្ជាក់ថា អំណោយរបស់រាជរដ្ឋាភិបាលតាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ដមានចំនួន២៥០គ្រួសារ, អំណោយរបស់លោកជំទាវ ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ចំនួន១២៣គ្រួសារ ។ ដោយឡែកមី, បារី, ថ្នាំពេទ្យ, សៀវភៅ, ប៊ិច និងថវិកាចែកជូន គ្រូ, សិស្ស, ពេទ្យ, កងទ័ព ជាអំណោយ របស់លោកឆាយ សារ៉េត ប្រធានក្រុមប្រឹក្សាខេត្ដ និងលោកជំទាវ ៕ ថ្មកែវ
ចែករំលែកព័តមាននេះ