រាជធានីភ្នំពេញ ៖ សេចក្តីរាយការណ៍ឱ្យដឹងថា រថយន្តស៊េរីទំនើបម៉ាកPORSCHEមួយគ្រឿង បានជ្រុលបុករថយន្តស្ទូចពីក្រោយ បណ្តាលឱ្យខូចខាតមួយកំណាត់មុខយ៉ាងធ្ងន់ ខណៈពេលដែលរថយន្តស្ទូចបង្អង់ល្បឿនឱ្យរថយន្តដឹកដែកមួយគ្រឿងឆ្លងផ្លូវ ។ គ្រោះថ្នាក់ចរាចរណ៍នេះ កើតឡើងកាលពីវេលាម៉ោង២រសៀលថ្ងៃទី២២ ធ្នូ ស្ថិតតាមបណ្តោយផ្លូវជាតិលេខ៦ ក្នុងភូមិខ្ទរ សង្កាត់ព្រែកលៀប ខណ្ឌជ្រោយចង្វារ
សេចក្តីរាយការណ៍បន្តថា រថយន្តខាងលើ ពណ៌.ស ពាក់ស្លាកលេខភ្នំពេញ2BA-9996 បើកបរដោយបុរសម្នាក់ពុំស្គាល់អត្តសញ្ញាណម្នាក់ ។ ចំណែករថយន្តស្ទូច ពណ៌.ស ពាក់ស្លាកលេខភ្នំពេញ3C-5554 ។
តាមប្រភពបានឱ្យដឹងបន្តថា នៅមុនពេលកើតហេតុ គេឃើញរថយន្តស្ទួចមួយគ្រឿង ធ្វើដំណើរក្នុងទិសដៅពីជើងទៅត្បូងតាមបណ្តោយផ្លូវជាតិលេខ៦ ខណៈពេលធ្វើដំណើរមកដល់កន្លែងកើតហេតុ ស្រាប់មានរថយន្តដឹកដែកមួយគ្រឿងទៀត លុះកំពុងតែបង្អង់ល្បឿន ប្រុងបត់ឆ្លងផ្លូវ ហើយរថយន្តស្ទួចបានបង្អង់ល្បឿនដែរ ក៏ត្រូវបានរថយន្តPORSCHEបើកមកពីក្រោយ បុកពេញទំហឹងបណ្តាលអោយខ្ទេចមួយកំណាត់មុខ ។
ដោយឡែក រថយន្តស្ទូចពុំរងការខូចខាតឡើយ ។ បន្ទាប់ពីគ្រោះថ្នាក់ភាគីទាំង២ ក៏បានសម្របសម្រួលដោះស្រាយគ្នា តែពុំដឹងថាខាងណាសងនោះទេ ៕
ចែករំលែកព័តមាននេះ