ខេត្តរតនគិរី ៖ មន្ត្រីប៉ូលិសយាមពន្ធនាគារខេត្តឃាត់ខ្លួនបុរសម្នាក់រត់ម៉ូតូឌុបដឹកជញ្ជូនគ្រឿងញៀនអោយអ្នកជាប់ពន្ធនាគារ បើតាមរបាយការណ៍របស់សមត្ថកិច្ចប៉ូលិសជំនាញបានអោយសារព័ត៌មានដឹងថា ហេតុការណ៍នេះបានកើតឡើងនៅវេលាម៉ោង៩និង៥នាទីព្រឹក ថ្ងៃទី១៥ ខែធ្នូ ឆ្នាំ២០១៨ ចាប់នៅប៉ុស្តិ៍យាមមុខពន្ធនាគារខេត្ត ស្ថិតនៅភូមិភ្នំស្វាយ សង្កាត់បឹងកន្សែង ក្រុងបានលុង ។
ជនសង្ស័យមានឈ្មោះ វណ្ណា វុន ភេទប្រុស អាយុ៣៦ឆ្នាំ មុខរបររត់ម៉ូតូឌុប មានទីលំនៅភូមិ០៧មករា សង្កាត់ទ្បាបានសៀក ក្រុងបានលុង ខេត្តរតនគិរី ។ មន្ត្រីយាមពន្ធនាគារបានអោយដឹងថា នៅមុនពេលឃាត់ខ្លួនជនសង្ស័យខាងលើបានឃើញបុរសនេះយកបាយ និងម្ហូបរួមមានចេកទុំ១ស្និតផងដែរ រួចសមត្ថកិច្ចយាមគុកមានការសង្ស័យក៏បានធ្វើការត្រួតពិនិត្យ និងហែកចេកទុំចំនួន៣ផ្លែក៏ប្រទះឃើញគ្រឿងញៀនចំនួន៣កញ្ចប់ក៏ឃាត់ខ្លួនអោយមន្ត្រីជំនាញគ្រឿងញៀនខេត្តចាត់ការបន្ត ។
ក្នុងករណីខាងលើនេះខាងប៉ូលិសការិយាល័យគ្រឿងញៀនខេត្តបានអោយសារ ព័ត៌មានដឹងថា ដកហូតវត្ថុតាងរួមមានគ្រឿងញៀនក្រាមសថ្លាចំនួន០៣ថង់តូច ទម្ងន់ ១.៨៥ក្រាម ទូរស័ព្ទ២គ្រឿង ម៉ូតូ១គ្រឿង ក្រោយពីឃាត់ខ្លួនជនសង្ស័យមានឈ្មោះ វណ្ណា វុន បានសារភាពប្រាប់មន្ត្រីប៉ូលិសជំនាញថា គ្រឿងញៀនខាងលើនេះមិនមែនជារបស់គាត់ទេ ព្រោះគាត់ជាអ្នករត់ម៉ូតូឌុបមានបុរសម្នាក់បានជួលម៉ូតូឌុបគាត់តម្លៃ៥០០០រៀលទៅអោយគ្នាគាត់ដែលជាប់ពន្ធនាគារ ។
ជុំវិញនៅរឿងខាងលើនេះសមត្ថកិច្ចជំនាញមិនបានផ្តល់ ព័ត៌មានលំអិតដល់សារ ព័ត៌មាននោះទេ ទី១- អ្នកផ្ញើគ្រឿងញៀនឈ្មោះអ្វីនោះទេ ទី២-អ្នកជាប់ពន្ធនាគារនោះមានឈ្មោះអ្វីនោះដែល ទី៣- តើវាសនាអ្នករត់ម៉ូតូជាប់គុក ឫអត់ ?
បច្ចុប្បន្នជនសង្ស័យជាអ្នករត់ម៉ូតូឌុបដែលទទួលបញ្ញើគ្រឿងញៀនទៅអោយអ្នកទោសក្នុងពន្ធនាគារខេត្តនោះកំពុងឃុំខ្លួនបណ្តោះអាសន្ននៅការិយាល័យគ្រឿងញៀនខេត្តដើម្បីកសាងសំណុំរឿងទៅសាលាដំបូងខេត្ត ៕
ចែករំលែកព័តមាននេះ