ខេត្តប៉ៃលិន ៖ មានសេចក្តីរាយការណ៍បានឱ្យដឹងថា យុវជន១ក្រុមមានគ្នាជិត១០នាក់បានចូលទៅរាំលេងកំសាន្តនៅក្នុងក្លឹបកាស៊ីណូមួយកន្លែង ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ លុះផឹកស៊ីរាំរែកយូរៗទៅរហូតដល់យប់ជ្រៅ ស្រាប់តែរាំជាន់ជើង និងប៉ះដៃគ្នា…
ខេត្តប៉ៃលិន ៖ មានសេចក្តីរាយការណ៍បានឱ្យដឹងថា យុវជន១ក្រុមមានគ្នាជិត១០នាក់បានចូលទៅរាំលេងកំសាន្តនៅក្នុងក្លឹបកាស៊ីណូមួយកន្លែង ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ លុះផឹកស៊ីរាំរែកយូរៗទៅរហូតដល់យប់ជ្រៅ ស្រាប់តែរាំជាន់ជើង និងប៉ះដៃគ្នា បណ្តាលឱ្យក្លាយទៅជាកំហឹងឈ្លោះប្រកែកគ្នា ។
លុះពេលចេញមកក្រៅក្លឹបកំសាន្តក៏វាយតប់គ្នារហូតឈានដល់កាប់ចាក់គ្នាខាងក្រៅក្លឹបរងរបួសតែម្តង ។ ចំណែកជនសង្ស័យ និងបក្ខពួកបានរត់គេចខ្លួនបាត់ស្រមោល ខណៈជនរងគ្រោះត្រូវគេបញ្ជូនទៅសង្គ្រោះនៅមន្ទីរពេទ្យបង្អែកខេត្ត ។
ហេតុការណ៍រាំជាន់ជើង និងប៉ះដៃគ្នារហូតឈានដល់ទាញកាំបិតកាប់ប្រហារនេះបានកើតឡើងនៅវេលាម៉ោង១២និង១០នាទីរំលងអធ្រាត្រឈានចូលថ្ងៃទី១៥ ខែធ្នូ ឆ្នាំ២០១៨ នៅចំណុចស្ថានីយ៍ប្រេងឥន្ធនៈ ស៊ុន ជាង ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីលោក រី ដារ៉ា អធិការនគរបាលនៃអធិការដ្ឋានស្រុកសាលាក្រៅបានឱ្យដឹងថា ជនសង្ស័យមានឈ្មោះ ចាន់ ថៃ ភេទប្រុស អាយុ១៨ឆ្នាំ មានទីលំនៅក្នុងភូមិបឹងព្រលិត ឃុំស្ទឹងកាច់ ស្រុកសាលាក្រៅ ខេត្តប៉ៃលិន និងមានបក្សពួកចំនួន៥នាក់ទៀតប្រដាប់ទៅដោយដំបង និងកាំបិត (បានរត់គេចខ្លួនហើយនគរបាលកំពុងតាមចាប់ខ្លួន) ។
ប្រភពបន្តទៀតថា ជនរងគ្រោះមានគ្នា៣នាក់ទី១-ឈ្មោះ រ៉ន ដៅ ភេទប្រុស អាយុ២៥ឆ្នាំ រងរបួសធ្ងន់ (ចំក្បាល), ទី២-ឈ្មោះ រ៉ន ដេត ភេទប្រុស អាយុ១៨ឆ្នាំ បានរបួសចំមុខ និងទី៣-ឈ្មោះ រ៉ន ដន ភេទប្រុស អាយុ១៩ឆ្នាំ បានរបួសចំមុខ ទាំង៣នាក់ មានទីលំនៅក្នុងភូមិទឹកចេញ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ពាក់ព័ន្ធនឹងបញ្ហានេះបច្ចុប្បន្នជនរងគ្រោះត្រូវបានសាច់ញាតិយកទៅព្យាបាលនៅមន្ទីរពេទ្យបង្អែកខេត្តប៉ៃលិន រីឯជនសង្ស័យត្រូវកម្លាំងជំនាញកំពុងស៊ើបអង្កេត និងតាមរកចាប់ខ្លួនយកទៅផ្តន្ទាទោសតាមច្បាប់ ៕
ចែករំលែកព័តមាននេះ