ខេត្តបន្ទាយមានជ័យ ៖ នគរបាលបានបង្ក្រាបទីតាំងលួចលាក់បើកល្បែងស៊ីសង តាមអនឡាញខុសច្បាប់២កន្លែង ដោយឃាត់ខ្លួនជនបរទេស៥៥នាក់ ក្នុងនោះស្រី១០នាក់ កាលពីវេលាម៉ោង១ និង៣០នាទីរសៀលថ្ងៃទី១១ ខែធ្នូ នៅក្នុងក្រុងប៉ោយប៉ែត ។
ក្នុងប្រតិបត្តិការបង្ក្រាបនេះ គេឃើញមានវត្តមានលោកឧត្តមសេនីយ៍ត្រី សិទ្ធិ ឡោះ ស្នងការរងនគរបាលខេត្ត និងសម្របសម្រួលនីតិវិធីដោយលោក តេង សម័យ ព្រះរាជអាជ្ញារងអមសាលាដំបូងខេត្ត ដោយមានការចូលរួមពីកម្លាំងជំនាញនៃស្នងការដ្ឋានខេត្ត និងនគរបាលក្រុងប៉ោយប៉ែតជាច្រើននាក់ ។ ទីតាំងដែលត្រូវបានបង្ក្រាបមាន ៖
ទី១-នៅភូមិសាមគ្គីមានជ័យ សង្កាត់ប៉ោយប៉ែត ត្រូវបានបង្ក្រាបនាវេលាម៉ោង២និង៣០នាទីរសៀល ឃាត់ខ្លួនជនបរទេសចំនួន២៥នាក់(ស្រី៣នាក់) ក្នុងនោះមានជនជាតិចិន៥នាក់ និងជនជាតិម៉ាឡេស៊ី២០នាក់ ។ ទី២-នៅភូមិព្រៃព្រិច សង្កាត់ប៉ោយប៉ែត ឃាត់ខ្លួនជនបរទេស៣០នាក់(ស្រី៧នាក់) ក្នុងនោះជនជាតិចិន៣នាក់ និងជនជាតិម៉ាឡេស៊ី២៧នាក់ ។
លោកស្នងការរង សិទ្ធិ ឡោះ ថ្លែងថា ជនបរទេសទាំង៥៥នាក់ដែលត្រូវបានឃាត់ខ្លួនទាំង២កន្លែងនេះ នៅពេលធ្វើការត្រួតពិនិត្យគឺពួកគេសុទ្ធតែមានលិខិតឆ្លងដែនត្រឹមត្រូវ តែបានឃុបឃិតគ្នាលួចលាក់បើកល្បែងស៊ីសងដោយខុសច្បាប់ ។
ក្រោយពីឃាត់ខ្លួន ក៏បានបញ្ជូនទៅស្នងការដ្ឋាននគរបាលខេត្ត ដើម្បីសាកសួរនិងកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ